O Uunaiga Loto Toa a Tamaitai Amiotonu

Ata

o se vaega o teineiti ma se ata o se taulaga

O nisi o ou manatuaga ou te fiafia lava i ai ao ou laititi o lo’u faapupuu lea i lo’u ieafu, o loo uuina ai lau moliuila a o ou faatele’a’i le faitauina o itulau faaiu o se tusi faapelepele. Sa manumalo le taua, sa saogalemu tagata sa ou fiafia i ai, ma sa ou fiafia. Ou te taotooto, ma mafaufau pe o le a faapei lagona o le tagata ua manumalo, ma ina a ou fia moe, o le a i ai se ataata i ou foliga.

Sa ou fiafia e ola faafoliga i tagata o loo ta’ua i a’u tusi ona sa ou mautinoa e le mafai lava ona avea se tagata faatauvaa e pei o a’u o se toa.

Sa ou taofimau ma le filemu i lenei talitonuga seia oo ina luiina au i ni nai vaiaso talu ai i lau vasega o sailiiliga o le mafaufau ma lona faagaoioiga (Psychology) i le kolisi ina ua fesiligia au e tusi se tusiga e uiga i a’u toa. O foliga muamua lava na oo mai i lou mafaufau o tamaitai i lou olaga. I le taimi muamua, sa ou toe tulei atu i tua lenei manatu, ma mafaufau ai e toatele tagata e tusi e uiga i auala ua avea ai o latou tina ma uso o tina poo taitai o Tamaitai Talavou ma o latou toa. Ae na ou iloaina o le tulaga tonu lava lena.

O le toatele o tagata o e na suia lou olaga e le o ni toa i ala o faasalalauga faaagafesootai po o ni pilionea po o ni tagata popoto lauiloa. O a’u toa o tagata ia na faaaluina le taimi e faaali mai ai ia te au le alofa faaKeriso ma fesoasoani ia te au ia malamalama po o ai moni au.

O lo tatou mana o ni tamaitai amiotonu e oo mai i le iloaina o lo tatou lava taua, lo tatou faasinomaga paia, ma lo tatou gafatia mo le ausiaina o le tele o mea. O le mea moni, o le iloaina o lo tatou lava taua o le a mafai ai ona tatou fesoasoani atu i isi ia malamalama i o latou malosiaga ma lo latou taua e le iu.

Sa uunaia i tatou e Sister Jean B. Bingham, le Peresitene Aoao o le Aualofa, “e saili a tatou meaalofa ma atiina ae, ma manatua pe o ai na tuuina mai ia i tatou, ona faaaoga lea mo Ona faamoemoega. A o tatou faasoa atu a tatou meaalofa ina ia faamanuiaina ai isi, ua tatou mauaina le mana o le perisitua i o tatou olaga.”¹ E taua tele mo tamaitai le malamalama i taimi uma o le lalolagi “e manaomia lo outou malosi, lo outou liua, lo outou talitonuga maumaututu, lo outou tomai e taitai ai, lo outou atamai, ma o outou leo.”²

E le gata i lea, e pei o le malosi e mafai ai ona tatou avea o ni tagata taitoatasi, e sili atu ona tatou malolosi atu pe a tatou tutu faatasi. E mafai ona mamafa avega pe a tatou tutu i fafo pe tutu na o i tatou, ae e mafai ona tatou “tauave avega a le tasi” i le faanoanoa “faatasi ma e e faanoanoa” ma ia faamafanafana atu ia te “i latou o e e manaomia le faamafanafanaga” (Mosaea 18:8–9). E manaomia ona tatou tuu le faamasino atu ma le faatautava o le tasi i le isi e pei ona faia e le lalolagi. O loo tatou manaomia le tasi ma le isi i le Toefuataiga faifai pea o le talalelei.

A o ou laitiiti, sa ou faauigaina le toa o se tagata e toatasi ua faasaoina le lalolagi e ala i se taulaga maoae. O le toa o se mea o le a e vaaia i se tala fou—o se fuimu lototele o loo toso ae se pepe mai se fale o loo mu po o se taifau lototoa o laveai lona pule i le taimi o se afa matautia o le taumalulu. Ae o lau faauigaga o le toa ua faalauteleina. O le toa o le pāpā falaoa mai se tuafafine o auaunaga ona sa musuia o ia e auauna atu ia te oe. O le toa o le auina atu lea o se tusiga faamalosiau i se tasi ona sa e lagonaina se uunaiga e tatau ona latou faalogo i au upu. O le toa o le ofoina atu lea o lou tauau ina ia pisipisia i loimata o se uso o faavauvau. O le toa o le lotomaualalo, filemu, ma lototele. O le toa o le lototele lea e faia ai ni laasaga laiti e auauna atu ai ma alofa i isi, e oo lava i taimi o le vaivai, le mautonu, po o le musuā. O le toa o le mamanuina lea i auala faatauvaa, auā “o mea laiti ma faatauvaa e faataunuu ai mea tetele” (Alema 37:6).

E ui e le foliga mamao le iloga o lo tatou toa faaletagata, ae o le tutu faatasi e oo atu ai le malamalama o le alofa o Iesu Keriso i tulimanu uma o le lalolagi. E pei ona sa saunoa mai lo tatou perofeta pele, o Peresitene Russell M. Nelson, e faapea: “Ou tuafafine pele, e leai se isi mea e sili ona taua i lou ola e faavavau nai lou lava liua. O tamaitai ua liua ma tausi-feagaiga … o o latou soifua amiotonu o le a tu matilatila atili i se lalolagi ua fai ifo, ma o le a vaaia e iloga lava ma e ese foi i auala e sili ona fiafia.”³

E pei o le matautia o tarako ma maneta ma taua iloga, i se aso—pe a ou faitau i le tusi o lo’u olaga—ou te fia vaai atu na ou onosai i le feagai ai ma faigata, agalelei i taimi o sauaga, ma le agamalu i taimi o le inosia. Ou te fia faitau e uiga ia te au o loo talanoa ma le ua tuuatoatasi ma tu atu mo e ua ta’ufaatauvaaina, ma fesoasoani ia i latou ia vaai ia i latou lava i le ala e silasila mai ai le Atua ia i latou. Ou te fia iloa lena mea ona sa ou mautinoa pe o ai au ma iloa le mana o a’u aafiaga, sa ou fesoasoani ai e suia le lalolagi mo le lelei, ma fesoasoani e faalautele le galuega a le Alii (e oo lava i ni auala faatauvaa), ma fesoasoani e tapena le lalolagi mo Lona toe afio mai. Ma pe a ou faia, o le a ou iloa sa ou faia ma le fesoasoani ma uunaiga a ou uso ma tamaitai pele o e na avea ma faataitaiga ofoofogia o le avea ma soo.