E Na’o Tusiga Faatekinolosi: Talavou Matutua
O La’u Pea Ofuvae e Tasi: O Se Vaaiga Faale-Talalelei e Uiga i le Olaga Faigofie
Ua ou iloa le tele o le olioli i se olaga e lagolagoina le faamoemoe o le tausia o le lalolagi.
E na o le tasi lava la’u ofuvae—o se ofuvae uliuli mamā. E foliga e le masani ai, ae o lena mea moni faatauvaa ua aumaia ai ia te au le olioli tele. Ina ua uma le kolisi, sa tatau ona ou aluese mai lo’u potu mautotogi i Finelani, ma talu ai sa ou fuafuaina se malaga e lua masina i le Iunaite Setete, sa tatau ona ou fuafua po o le a le mea e fai i au meatotino uma. O lea sa ou faia ai se lisi o mea uma sa ou umia ma iloa ai e itiiti lava mea ou te manaomia nai lo mea na ia te au. Ina ua mavae ni mafaufauga faamaoni, sa ou filifili ai e faatau atu isi au meatotino ae ou te lei malaga ese. Sa ou fiafia i lena lagona, ma e ui lava o ni nai tausaga, ae o le lagona o le le i ai o ni meatotino se tele o se saolotoga tele lea e oo mai i le asō.
E ui e le mafai ona ou faapea atu o au o se tagata faatauvaa atoa, ua ou suia moni lava lou ituaiga olaga i lena itu. O le sili atu ona nofouta i mea ma le tele ou te faaaogaina ua mafua ai ona ou mafaufau e uiga i a’u matafaioi patino mo le siosiomaga, ae maise lava mai se vaaiga faale-talalelei.
Tele vs. Lē Sili Atu
I tusitusiga paia, ua tatou aoao ai e faapea na foafoaina le lalolagi mo i tatou ina ia ainā (tagai i le 1 Nifae 17:36) ma o mea uma i le lalolagi sa faia mo lo tatou lelei (tagai Mataupu Faavae ma Feagaiga 59:16–19). Ua uma ona fautuaina i tatou ia avea ma tausimea lelei o lenei lalolagi, lea e uunaia ai le fesili i le ala e mafai ona tatou faataunuuina lena tiutetauave taua. O se tasi o auala o le iloiloina lea po o a punaoa tatou te faaaogaina.
Ua saunia e le Alii mo i tatou nei punaoa ina ia mafai ai ona tatou “maua [mea e] tele” (Mataupu Faavae ma Feagaiga 49:19). Ae Na te silafia foi le natura faaletagata, o lea na Ia lapataia ai i tatou e faasaga i le faaaogaina o nei punaoa i le sili atu atu (tagai Mataupu Faavae ma Feagaiga 59:20). O le soona faaaogaina e mafai ona afua ai lo tatou le talisapaia o mea, lea e iu ina le gata i le faamaaa o tatou loto po o le leiloa poo ai na aumai ai o tatou manuia, ae le gata i lea, i lenei tulaga, o faafitauli o le siosiomaga. O lenei mea e masani ona ou manatunatu ai: o fea le laina i le va o le “maua tele” ma le i ai o mea e tele naua?
O le Mataupu Faavae ma Feagaiga 59:18–19 ua folasia mai ai le manatu faapea “o mea uma e mai i le eleele … ua faia mo le lelei ma le faaaogaina e le tagata, e faafiafia ai mata ma faaolioli ai le loto; … e faamalosi ai le tino ma faaolaola ai le Agaga.” E mafai ona tatou malamalama o punaoa e le tuuina mai mo na o le ola ai—na foafoaina foi i latou e saofaga i lo tatou olioli.
Mauaina o le Olioli i le Itiiti o Mea e Umia
A o ou filifili po o le fea lavalava e aveese ae o a foi e tatau ona tuu, sa ou taofia na o mea sa ou lagona na ou manaomia moni, faapea foi ma mea sa sili ona ou fiafia i ai. Sa ou iloaina o le mauaina o le tele o se mea, e pei o lavalava, sa faigata ai lava ia te au ona talisapaia. Ina ua uma ona tuu le ofuvae lea sa sili ona ou fiafia i ai ma faaaogaina, sa ou lagonaina le olioli sili atu i le ofuina o lea ofu. E faapena foi i le tele o isi a’u meatotino.
O nisi taimi atonu e lelei le faia o ni nai iloiloga i o tatou olaga ma faia ni suiga i a tatou sootaga ma nei punaoa na tuuina mai e le Atua. I lo’u tulaga, sa mafai ona ou maua le olioli i le itiiti o mea ou te umia, ma na iu ai i se suiga o le olaga na fesoasoani ia te au i le tausia o le lalolagi.
E ui lava o a tatou taumafaiga taitoatasi e tausia le lalolagi atonu e foliga mai e faia se eseesega taua, e mafai ona tatou naunau e aoao i tatou lava ma faatino. E mafai ona tatou saili le taitaiga a le Agaga a o tatou iloilo o tatou olaga ma faia filifiliga e uiga i a tatou meatotino faaletino ma a tatou amioga. A o silafia e le Alii Ana foafoaga uma—e oo lava i le lau o le vao—tau ina ia tatou manatunatu lelei i lenei lalolagi e ala i le faia o suiga e tatau ai, o le mauaina o mea tatou te fiafia i ai, ma le liua o o tatou loto e faasaoina ai.