Mataupu Faavae o le Auaunaga

Lagolagoina e le Tasi le Isi i a Tatou Taumafaiga e Faaaoga ma le Atamai ia Ala o Faasalalauga

O nei manatu ma punaoa e mafai ona fesoasoani pe afai o i ai ni fesili a i latou e te auauna atu i ai e uiga i le faaaogaina o tekinolosi.

Ata

mother and daughter sitting on a couch and using a tablet

Ata pue mai le Getty Images

O se tasi o fesili masani taatele e feagai ma aiga i le tele o aganuu i aso nei o le auala e faaaoga lelei ai ala o faasalalauga ma tekinolosi. O masini faatekinolosi i aso nei ua vave lava ona avea ma ni vaega taua i le tele o aganuu, ua suia ai le tele e oo lava i a tatou gaoioiga e sili ona faigofie o aso taitasi.

Faatasi ai ma ona faamoemoega e foliga mai e le iu mo le lelei ma le leaga, o loo saili ai e le toatele o tagata taitoatasi ma aiga ni faamatalaga lelei e uiga i le auala e faaaoga ai ma le saogalemu ia ala o faasalalauga.

Ua vaaia e Marta (ua suia igoa), o se taitai o le Ekalesia i Sepania, le auala na faaleleia ai e lana telefoni feaveai ana suesuega o le talalelei, na faigofie ai ona tumau i le fesootai atu ma i latou na ia auauna i ai, fesoasoani i lona atinaega patino ao ia faaaogaina le polokalama o le Ola i le Talalelei, ma mafai ai ona ia faataunuuina le tele o mea i lona valaauga. Ae peitai, ua ia iloa lona tauivi ai e tuuese lana telefoni pe a i ai i fegalegaleaiga ma lona aiga.

O Kwan, o se alii talavou i Korea, na te faaaogaina soo le komepiuta a lona aiga mo sailiiliga a le aoga, meaaoga, ma galuega faatino. A uma ona fai ana meaaoga, ona ia faaaluina lea o ona taimi avanoa i taaloga i luga o le Initoneti. E popole lava ona matua.

E vaaia e Declan, o se talavou matua i Kenia, tagata ma a latou telefoni feaveai i aso uma. E foliga mai e mafai ona latou vave maua ni faamatalaga ia e fesoasoani e faafaigofie ma faaleleia atili ai lona olaga, e aofia ai tusitusiga paia, mekasini, ma isi anotusi o le Ekalesia. Ae, a uma ona totogi atu ana tupe faaalu, e leai se tupe e totoe mo se telefoni feaveai. Sa lagona e Declan lona toilalo.

A o tatou auauna atu, e mafai faapefea ona tatou lagolago ma faamalosia o tatou uso ma tuafafine i a latou sailiga mo tali e uiga i lenei autu e foliga mai e le mautonu i nisi taimi? O nisi nei o manatu ma punaoa mo ni auala e faaaoga ai ma le atamai ia ala o faasalalauga.

Ata

young African woman listening to music and looking sideways

Fautuaga mo le Faaaogaina ma le Atamai o Ala o Faasalalauga ma Tekinolosi

Saili ni auala lelei e faaalu ai lou taimi taua i fafo atu o tekinolosi, e aofia ai le auauna atu i isi, atiina ae o tomai ma taleni, ma le auai faatasi ma isi i ni faatinoga anoa ma isi gaoioiga.
Ia i ai se faamoemoega patino mo le faaaogaina o le tekinolosi, ma faaitiitia lona faaaogaina pe a e malolo, tuuatoatasi, ita, po o le atuatuvale. O nei vaega ma le anoanoai o isi lagona eseese e mafai ona faaleagaina pe aafia ai oe i le faaaogaina ma le le tatau o le tekinolosi. Saili ni auala lelei e tali atu ai i lagona.
Ia lotopulea. Faaaoga faatulagaga e faataga ai oe e siaki pe faatapulaa le taimi e faaalu i lau masini.
Avea e pei o le Faaola. Tuu atu le gauai atoatoa i se tagata pe a talanoa atu ia te oe.
Faatulaga lelei fesootaiga patino. Ia faatumauina le paleni i le va o ituaiga o fesootaiga faaeletonika ma vaega le faaeletonika, aemaise lava pe a faasoa atu ni lagona loloto po o ni mafaufauga taua.
Fai ma faia ni malologa. Valaaulia tagata uma o le aiga ina ia filifili e faatulaga ni malologa mai a latou masini.
Ia faamasani oe lava ia aua nei e tali vave atu i faaaliga ma faailoilo uma.

Amataina o se Talanoaga

Amata se talanoaga i lenei autu taua i le faasoaina atu o tauiviga po o fesili o ia te oe e faatatau i le faaaogaina o tekinolosi ma ala o faasalalauga.
Fesili atu po o a mea na latou maua e fesoasoani ia i latou. E tele mea e mafai ona e aoao ai i le faaaogaina o lenei auala. E mafai foi ona maua ai ni avanoa e faasoa atu ai nisi o mea na e aoaoina.
Mau e mafai ona e faasoa atu: Ua valaaulia i tatou e perofeta ina ia atamamai (tagai i le Iakopo 6:12), ina ia faautauta i mea uma (tagai i le Alema 7:23), ia vaavaai mo o tatou mafaufauga, upu, ma galuega (tagai Mosaea 4:30), ma avea ma faataitaiga lelei (tagai 1 Timoteo 4:12).