Na’o Tusiga Faatekinolosi
O Le Aoao e uiga i Tu ma Aga faa-Kerisiano na Faataua Atili ai ia te A’u le Eseta
Ina ua uma ona aveina se vasega i le kolisi e uiga i tapuaiga i le lalolagi, sa ou iloaina e mafai ona ou faia le Eseta ia sili atu le anoa ia te a’u i le avea ai ma se tagata o le Au Paia o Aso e Gata Ai.
I le aluga o le kosi o le semesa i le iunivesite, a o ou nofo ai i se fale faafiafia laitiiti e aoao ai e uiga i tapuaiga i le salafa o le lalolagi, e masani lava ona ou mauaina se mea e fesootai ma la’u malaga patino o se soo o Iesu Keriso, a le o se sauniga, o se mataupu faavae taiala, po o se fuaiupu o tusiga paia.
O le mea sili na ou maua mai le vasega o le malamalamaaga lea e musuia e le Atua Ana fanau i soo se mea. Ou te fiafia i le saunoaga a Elder Dieter F. Uchtdorf o le Korama a Aposetolo e Toasefululua:
“Tatou te faamamalu ma faaaloalo i agaga faamaoni mai lotu uma, e le afaina po o fea a o le a foi le taimi sa soifua ai, o e sa alolofa i le Atua, tusa lava pe le o i ai le atoaga o le talalelei. … Tatou te taliaina i latou o ni uso ma ni tuafafine, o fanau a lo tatou Tama Faalelagi. …
“E faafofogaina e Ia tatalo a ē faamaulalo ma le faamaoni a atunuu taitasi, gagana, ma tagata. Na te tuuina atu le malamalama ia i latou e sailia ma faamamaluina o Ia, ma ua naunau e usitai i Ana poloaiga.”1
Faatasi ai ma le lalata mai o le vaitau o le Eseta, o nisi nei o faataitaiga o loo maua i le lalolagi atoa lea ou te lagonaina ai le musuia. E ui lava o i tatou o tagata o le Ekalesia e le faatinoina nei tu ma aga masani uma, ma vaavaai pe faapefea e nisi Kerisiano ona manatua e mafai ona fesoasoani le Faaola ia i tatou ia sili atu ona anoa a tatou lava faamanatuga o le Eseta.
Fagafulu
O le fagafulu o se tu masani e faamanatu e nisi o Kerisiano i le lalolagi atoa. O se vaitaimi o le lotomaualalo faaleagaga ma le tuputupu ae e amata i le ono vaiaso a o lei oo i le Eseta, lea e saunia ai e tagata talitonu i latou lava mo le aso malolo e ala i osigataulaga patino. E aofia ai aso faapitoa o le anapogi ma meaalofa. I le taimi o le Fagafulu, e uunaia ai foi tagata talitonu ina ia aloese mai se mea faaletino—e pei o se meaai e sili ona fiafia i ai, taaloga, se faaaliga i le TV, po o se mea masani e fiafia i ai—ma tuuto atu le taimi faaopoopo lea semanu e faaaluina i lena mea i suesuega faaleagaga ma tatalo.
Ou te fiafia i le manatu e faapea, o le Eseta e mafai ona avea ma se aafiaga maoae i le va o le Faaola ma a’u. I le avea ai ma Au Paia o Aso e Gata Ai, tatou te le faatinoina le Fagafulu, ae o le aoao i ai, ua ou manao ai e tuuina atu atili lo’u taimi e manatua ma saunia ai faaleagaga mo le Eseta, pe e ala i le anapogi, suesue atili i le soifuaga o le Faaola i tusitusiga paia, pe fai ai foi le galuega o talafaasolopito o aiga po o le faasino igoa e fesoasoani ia te au e manatua ai le taua o le taulaga a le Faaola ia te au ma o’u tuaa uma.
Fuamoa o le Eseta
Sa ou ola ae i se aiga lea sa avea ai le valiina o fuamoa saka ma se tu masani faapelepele. I nisi o atunuu i Europa (e pei o Iukureini ma Lithuania), e lavelave lava le faagasologa. Nai lo fuamoa saka valivali, e faagaogao fuamoa, teuteuina auiliili i mamanu mananaia, ona valiina lea. I le faaiuga o le a i ai se fuamoa gaogao lea e faatusaina i le tuugamau avanoa ma le faamoemoe matagofie e aumai e le Toetu.
E faigofie lava ona faagalo le uiga mamana i tua atu o le tele o tu masani o loo ia i tatou, ae e taua le faaalu o sina taimi e mafaufau loloto ai i o latou uiga ma auala o fesoasoani ai ia i tatou. O le isi taimi ou te valiina ai ni fuamoa, ou te manao e faaalu se taimi tele e fatu ai ma le faaeteete se faatusa matagofie o o’u manatu.
O Le Tausamaaga a le Alii
E toatele Kerisiano na taumamafa i le Tausamaaga a le Alii, po o le faamanatuga. O le tele lava o lo’u aoao e uiga i le faatusa o le faamanatuga ma le taua i le tele o lotu, aemaise lava i Le Ekalesia a Iesu Keriso o le Au Paia o Aso e Gata Ai, o le tele foi lena o lo’u iloa ua ou le talisapaiaina lena meaalofa faalevaiaso.
E toatele Kerisiano e taulai atu i le sauniuniga faalemafaufau ma le faaleagaga mo le faamanatuga ae latou te lei tagofia. Sa aafia a’u i le mana lea e umia e le faamanatuga mo nei tagata talitonu ona o a latou sauniuniga. O a latou faataitaiga na ou manatunatu ai i a’u lava sauniuniga mo le faamanatuga. Ua ou mafaufau nei i le tele o auala e mafai ona ou saunia ai faaleagaga mo le faamanatuga i vaiaso taitasi, ma faia ia anoa le sauniga i lou olaga ao ou taulai atu i le mea moni e faatusa i ai.
Aoao mai Isi
I le lalolagi atoa, e eseese auala e faamanatu ai e tagata, ae loloto lava. I Sepania, e taofia ai le taina o logo mo ni nai aso a o lumanai le Eseta e faamamalu ai puapuaga ma le maliu o Keriso, ona latou toe faaauau ai lea i le Eseta. I Rusia, o aiga, uo, ma tagata ese e faafeiloai e le tasi le isi e ala i le fai atu, “Ua toetu mai o Ia,” ma e tali mai le isi tagata, “Ioe, ua toetu mai o Ia.”
O le Eseta o se aso faamanatu sili ona olioli i le talafaasolopito o le lalolagi, o se mea na tupu lea ou te maua ai pea le faamoemoe e le aunoa. O faataitaiga o tagata talitonu ma aganuu i le salafa o le lalolagi ua faamanatu mai ai ia te au ina ia anoa lo’u faamanatuina faatasi ai ma sauniuniga anoa ma ia tuuto atu taimi e tele e faalatalata atili atu ai i le Atua. Ma le mea e aupito sili ona taua, ua latou faamanatu mai ia te au le pogai tatou te faamanatuina ai lenei aso malolo ma le auala e mafai ai ona tatou latalata atili atu ai ia Keriso.