Te Kaotioti ni Bon Nakoim—Te Kakoaua mairoun te Atua, Tamara

Burabeti tiaki ti ngaiia aomata aika a na karekea te kaotioti. Ni kaineti ma am kakaonimaki, ko kona ni karekea te kaotioti are e na buokiko ma kainnanom ae onoti, tibwangam, ao titiraki ao e na buokiko ni kakorakora am koaua¹.

N tanrikaaki nakon e raka iaon 40 te ririki n nako ni kainakin ana Ekaretia Iesu Kristo ibukiia aika itiaki ni Boong aika Kaitira, I mimi ao I rang kakaitau ibukin bwaai aika I rinanona, aika a raraoi, aika bita maiu bwa te kaotioti are I karekea mairoun Tamara are i Karawa ae tangira e a tia ao e bon teimatoa ni karekea, inanon maiu.

I Uringnga raoi n au moan tai n rinanon te kaotioti are e kaineti nakoiu, bon 17 au ririki, e riki ni mweengaia au karo i Suva, Fiji. I mena n te ruu ni matu n tii ngai, I wareware man Ana Boki Moomon ma te nanomwaaka ni kan ataia ibon irou ngkana e bon koaua te boki. Aio te kakaewenako are a anganai mitinare aika a bwanin aia tai Elder Rian Nelson ao Elder Randy Price imwiin aia reirei iaon te burabeti Iotebwa Timiti ao aron karekean bwatua aika koora mai iroun te anera, ao imwiina e raira taekana nakon te Ingiriti.

Mitinare akanne a wareki kibu man Ana Boki Moomon n tain te maroro, ao a tibwai koaua aika korakora man kamatata. I rang n riingaki, ao I tangiria n ataia ibon irou ngkana baike a tia n tibwai bon mairoun te Atua . . . ao I tangiria n taekina are a taekinna ma te koaua raoi n ae I bon namakinna.

I wareka 3 Nibwaai mwakoro 11; n te tai ae waekoa I moanna n ota ao n rang mataata. I katamneia te Tia Kamaiu, Iesu Kristo, n ruo mai karawa ao n tei I nuukaia aomata aika uanao n taakini baina, ni kaoia bwa a na nakoina, n namakina mwiin te neera I baina ao I waena. Aio are a karaoia temanna imwiin temanna, ao imwiina, a bwakan nako aontano ao a taromauriia bwa te meetia are e beritanaki².

Namakinan te aabue, te mweraoi ao te rau e ninia rabwatau ao I tang ma te tangira, kakaitau, ao te karabwarabwa ibukin te Uea ao ibukin Ana mwakuri n tangira ao n nanoanga. N te tai ae waekoa I a ataia bwa aio bon te kakoaua n te tamnei mai karawa . . . bwa are I warekia ao n namakinna a bon koaua ao bon mairoun te Atua.

Te namakin ae tamaroa are I rinanona ma mitinare te bong are imwaina e oki, ma n te tai ae ai bon ti ngai. Namakinan te Tamnei ae Raoiroi e onoti nakoiu ao e korakora. I aki tangiria bwa e na toki te tai ae kakaawaki aei. I ataia man te tai anne aekakira te kaotioti ae bon nakoim. N te tai are I tibwa iai te taneiai anne ae riaon 40 te ririki n nako, te kakoaua ae karewe mairoun te Tamnei ae Raoiroi e kaona nanou.

Teuana riki te taneiai are I karekea iai te kaotioti ibon irou e riki ngke ngai te tamanuea n te Titeiki. I rang mimi ao n mangori ni karekean te kaotioti mairoun te Tamnei ae Raoiroi ni katoa tai are I katokai iai baiu iaoia membwa ake a roko bwa a na karekea aia kakabwaia n tamanuea. Ni katoa tai te namakin are I karekea e bon rang n tamaroa n tiku n au iango ao I kona n anga nako aoia aomata nako te kakabwaia are te Atua, Tamaia, e tangiriia bwa a na karekea. Tibwangau bwa N na kakauongo raoi . . . ao n taekina te bwai are I karekea.

Ngkai taneiai aika uoua aikai a kakaokoro, te bwai ae okioki bwa I kainnanoa te kaotioti mairoun te Atua n angareirei, kairi ao ni karaua nanou; ao iai au onimaki bwa E na kakabwaiai ni kaineti ma kainnanou.

Ara burabeti ae maiu, Beretitenti Russell M. Nelson, e reireiniira te tua iaon te kaotioti n Eberi 2020 n te Maungatabu ni Kabuta. E taku:

“Te Burabeti Iotebwa Timiti e katea te beaten ibukira bwa tina iria ibukin kaekan ara titiraki. Kairakina man te berita mairoun Iakobo are ngkana akea ana rabakau temanna mai ibuakomi, ao e na butiia te Atua, te ataeinimwaane are Iotebwa e uota ana titiraki nakon Tamara are I Karawa. E ukoukora te kaotioti ibon irouna, ao ana ukeuke e kauka te kabanea ni bong aei.

“N te aro anne, tera ae e na kaukaki nakoim n am ukeuke? Tera te rabakau ae akea iroum? Tera ae ko namakinna bwa te kainnano ae kawaekoaki bwa kona ataia ke n ota iai? Ira ana banna ni katooto te Burabeti Iotebwa. Kakaea te tabo ae rau are ko kona n nanako iai. Kona nanorinano imatan te Atua. Bunra nanom nakon Tamam are I Karawa. Rairaki nakoina ibukina kaeka ao karaunano.

“Tataro n aran Iesu Kristo ibukin am tabeaianga, maakum, mamaaram—eng, te bwai are e tangiria nanom. Ao imwiina kakauongo! Korea te iango are e roko n am iango. Korei namakin ao irii ma te mwakuri are ko kairaki bwa kona karaoi. Ngkai ko kaokioka kaoran aei te bong teuana imwiin teuana, namwakaina imwiin namwakaina, ririki imwiin ririki, ko na “rikirake inanon tuan te kaotioti”.³