E Na Tauaki Am Taeka

Iesu e reireiniira bwa tina tataro ma te onimaki ae bwanin ao onimakinan te Atua. E tuangiia ana moan reirei, “Ngkana kam tataro, ao kangai. . . . E na roko ueam. E na tauaki am taeka I aonaaba, n ai aron tauana I karawa” (Ruka 11:2).

Te taeka ae kakaawaki iai, “E na tauaki am taeka.”

E bon ririki nakoira bwa tina raraoma ibukin kainnanora, ngaia are I taku bwa ti ewekia n tainako te kaetieti aei. Ke n tabetai, ti kangai “E na tauaki am taeka,” ni kaanga te iango are imwiina, ma e riai n aki karaoaki.

Te Atua e atai bwaai ni kabane ao e mwaaka ni bwai ni kabane. Ti kaboraoira nakon ana kantaninga ibukina bwa E kaonaki n te tangira ae akea tiana ao te kantaninga ae akea tokina ni kantaningaia bwa e na katoka kainnanora n te kawai ae riai. Onimakinan Ana kantaninga ibukira bon aan are te atibu n te tataro ae nakoraoi.

Ara Tia Kamaiu Iesu Kristo e kamatata te reirei aei ngke, I Keketemwane, e mwauku man korakoran rawawatan buren te aonaaba. E bubuti, “O Tamau, ngkana tao e konaki, ao e na nako mai Rou te mwangko aei: ma akea au taeka, ma bon ane i roum” (Mataio 26:39).

Ara tataro a kona n aki kaekaaki n tainako n te kawai are ti kantaningaia, ma ngkana ti kariaia bwa E na tokanikai ana kantaninga, Tamara are I Karawa e a tia ni berita nakoira te rau inanon tain te kangaanga.

N te bwakanakontai n te tairiki teuana ngke tamau e rang n aoraki, I katorobubua irarikin ana kainiwene ao n tataro ma korakorau ni kabane mai inanou ao tamneiu ibukin te Uea bwa e na buokai bwa N na kona n ata te bwai are N na karaoia ni buoka tamau. I tataro ma te onimaki ni kabane ao onimakinan Tamau are I Karawa. I tataro ao imwiina I toki, ao n tataro ao ni manga toki, ao ni manga tataro riki, ao ni manga toki riki, ni kataia ni kabotoa raoi au iango. I rang ni kataia ni kakauongo nakon te Tamnei ae Raoiroi.

Ao imwiina te namakin e roko irou, ao I taku ibon irou, “Ko teimatoa ni bubutiia te Uea bwa e na anganiko te bwai are ko tangiria. Ma tera aron are E tangiria?”

Te taeka are imwiina mai wiiu, “Tamara are I Karawa, I rang n tangiria bwa e na maiu au karo, I rangi n tangiria bwa e na tiku irarikira. Ma ngkana tiaki aei am babaire ibukina, ngkanne I tauraoi ni kariaia bwa e na nako. I a tauraoi ni butimwaea am kantaninga.”

Te Uea e taetae inanou n tuangai, “Natiu te aine ae kakaonimaki, ibukina bwa ko tauraoi ni butimwaea Au kantaninga ao tiaki mai iroum, kona karaua nanom ao kona kakabwaiaki ma te rau.”

Te ingabong are imwiina, tamau ae tangiraki e okira mweengana iroun Tamara are I Karawa . . . ao I namakina te rau ae tamaroa ao te raunnano inanou. I namakina ana tangira ae itiaki te Atua ibukiu.

E ngae ngke I nanokawaki, te Uea e kamaraua te aki raunnano ao e kabebetea te maraki nakoiu are N na uotia. I reitinako n namakina Ana karaunano ni kawai aika a kakaokoro, ao mairouia raraou aika a mwaiti ao kain au utu. I namakinna bwa I kakabwaiaki, n ai aron are e berita iai te Atua bwa e na riki.

I taekina au tataro teuana ni karabwa, ao ni kaota mwaitin au tangira Nakoina.

I rang kakaitau ibukin kakaawakin ao te bwaintangira ae moan te tamaroa n te tataro. Reitakira ma Tamara are I Karawa bon te tibwanga raoi ni koaua. Tina karekea te onimaki ni butimwaea Ana kantaninga ni bwaai ni kabane, ao n onimakina bwa Ana tangira ae akea tokina e na raoniira rinanon kakaewenako ni kabane n te maiu.