Te Onimaki n Tataro Ibukin te Kakai

Manibeeru ngaia n tainako mamaten nanon te Tari Joseph Price mai Auckland New Zealand Papatoetoe Stake. E wareki taekan manibeeru man koroboki aika tabu—n aroia Iaretaite n taai akekei ni uoti karewen te manibeeru (taraa Ita 2:3), ao aroia Riaai ma ana utu n amwarake ni karewen te manibeeru (taraa 1 Nibwaai 17:5).

Iotebwa e tatangiria naba n anenea kunaia manibeeru ni kunana ae tatangiria n te Moan Kaotioti ao e iangoa kamimiin aia mwakuri manibeeru n te aonaaba “Ngkana akea ngaiia ao aki kona ni kabooaki uaan aroka,” e taku Iotebwa, “ara ununiki ana bon aki maiu.”

E iangoia bwa n te bong teuana e na kawakin oin ana manibeeru, ao imwiina n 2018, Iotebwa—n te tai aei ai te tibu te mwaane—n tokin te tai e a reke ana tai. E kabooa uoua ngaon te manibeeru ao e ingainga ni katei inanon ana bwaranta mai bukin ana auti ao e karekea kunnikaina are e na kabongana ni katoa tai are e kawariia iai manibeeru. N te tai ae waekoa nanona ni kan kawakini manibeeru e a riki bwa mamaten nanona.

“Bon te kawai ae kakukurei ni kakaitau n ana karikibwai Tamara are I Karawa, ao manibeeru aki kabotaeka nakoiu,” e ngare. E rang ni bane nanona nakon ana ngao n te aro are natina te aine e titiraki n tainako bwa a uara “natina manibeeru” marurungiia . . . ao n aia aron are a karaoia ataei, manibeeru a tia n reireina reirei n te maiu ae kakaawaki.

“N te bong teuana I kawara ngaon te manibeeru n akea kunnikaiu are nangoau,” e kauringnga Iotebwa. “Ara burabeti, Russell M. Nelson, e taetae n te bootaki n Taromauri n te aono I Auckland te bong are imwiina—ao I nako ni kakoroa nanon weteakiu n te boowi anne ma matau ae tenaaki n te manibeeru.”

Te taneiai anne e reireina te reirei ae kakaawaki bwa e na teimatoa ni katanna n tainako, n rabwata ao n tamnei.

Kakaongoraan karakinan Iotebwa ma ana manibeeru ngke e karekea 60 kirokuraem ana karewe te manibeeru ae moan te tikiraoi. E anganako 12 bwatoro n ao e karekei kaeka aika tamaroa. “Riki raraou ae e wakina ana bitineti iaon ana karewe te manibeeru e taku bwa e kangkang riki au anii nakon are e karekea,” e wingare Iotebwa. E aki kan tataninga n noora aron ana ngao ni manibeeru n tain taiakina are imwiina.

Ngkanne n te ingabong teuana, e kunea ana ngao bwa ai akea kanoana. Te korone ni manibeeru a bane n nako!

Iotebwa e kakaia nakoia kain rarikina, ma aki reke. “N tabetai te ueannaine [ni manibeeru] e baireia bwa e na nako ao e kairiia nako ana korone,” e kabwarabwara. “N tabetai a kona n reke iroum, ma n tabetai ko aki kona.”

E ataia bwa n te tai are a kiitana iai am ngao te korone, e kangaanga bwa a na manga oki. Ae ririki naba, manibeeru aki kona n onomwi ni ngaoia korone ake tabeman. Ibukin aei, taan kawakin manibeeru a kawakin ngao aika a mwaiti—ma Iotebwa bon ti uoua ana ngao.

Te kananokawaki, uoua te namwakaina imwiina, ana kauoua ni ngao e manga kiitanaki naba.

E uruaki nanon Iotebwa: “I rangi n nanokawaki. I rangi n namakinna ae iai te bwai ae bua mai irou.”

E katinea kunnikaina are nangoana ao e nako n tuanga buuna, Atelaite, te rongorongo ae kananokawaki. “A bane n akea ara manibeeru,” e taku Iotebwa nakoina. E kaunga neiei bwa e na tataro.

Man te ingabong anne, te taanga a tataro raoi ma nanoia, ni katoabong, ibukin aia manibeeru. A kaitaua Tamaia are I Karawa ibukin te tibwanga are a kona ni karekea ni karikirakeia manibeeru, ao ibukin te namakin ni kimwareirei are e a tia n uotia nakoia, ao imwiina a tataro ibukin te kakai—bwa a na kona n oki manibeeru.

Imwiina e kaniia uoua te wiiki, e ngae n anne, Iotebwa e a moanna ni bua ana onimaki. E tuanga Atelaite bwa e a tauraoi ni karuoi ana ngao ake akea kanoaia ao e a kabooi manibeeru aika boou ibukin taiana are imwiina. “Bwaai aikai a bon ririki,” e taku nakon neienne. “Tia kariaia te karikibwai bwa e na touanako kawaina.”

Ma Atelaite e tuai n tauraoi n taenikai. Iai inanona ana taeka Amureka:

Eng, kananorinanoingkami, ao reitinako n tataro nakoina. . . . Tang nakoina ibukin arokami n ami marae, ami nanai ni man ake n ami marae . . . bwa a na kamwaitaki riki. (Aramwa 34:19–20, 24–25)

Neiei e aki toki n tataro.

Ni moaningabongin te Kaonobong teuana, Iotebwa, e nooria manibeeru n ubara i etan ana beera n uee n ana onaroka. Ma matan te tia kawakin manibeeru ae taneiai, e nooria bwa a mwaiti aika a uoti bwautan uee, ao kibaia a kaineti nakon ana ngao.

Iotebwa e waekoa ni karina kunnikaina are otangana mairouia manibeeru ao e nako ni mataku. Manibeeru a katobibi I etan teuana ana ngao, ao ngke e kaukia, e a kaonaki irouia manibeerua aika ngaa ma ngaa.

E bwaro rannimatan Iotebwa ao e tataro ni kainabwaabu ma te kakaitau. E taratara te manibeeru are te ueannaine ao e karabwa ibukin kairakiia ana korone nakon te ngao aei. Imwiiina e biri nakon ana auti n tuanga Atelaite.

“I taku, ‘Ani, keetinna bwa tera? A oki manibeeru!’” E inga ao e kiitina buuna, ao imwiina e taku nakoina, “Am onimaki e korakora riki nakoiu.”

Ni karokoa te bong aei, Iotebwa e aki ataia ngkana manibeeru n ana ngao bon ngaiia naba ake a tia ni kiitanna, ke ngkana te korone ae boou are a roko ni bwaina te ngao. Ke ni kaibibiti e kona n riki, e ti ataia bwa e a riki te kakai, ao e riki imwiin te onimaki.

“I kuri n nanokokoraki ao bon imwain, ‘anganakin te karikibwai bwa e na touanako kawaina,’” Iotebwa e taku, “ma kainnabau e aki kona. I a tia n reiakinna bwa N na aki bwarannano n au tataro ao n onimakina Tamara are I Karawa. Te kakai e aki kona n riki n tainako, ma ngkana e riki, e uota te kimwareirei ae korakora.”