O Le Faatuatua e Tatalo ai mo se Vavega

O lagomeli sa avea o se faatosinaga sili ia Brother Joseph Price o le Siteki o Papatoetoe i Aukilani Niu Sila. Na te faitau e uiga i lagomeli i tusitusiga paia—i le ala na aveina ai e sa Iareto anamua lagomeli (tagai Eteru 2:3), ma le ala na aai ai Liae ma lona aiga i meli vao (tagai 1 Nifae 17:5).

E fiafia foi Joseph e pese e uiga i lagomeli i se viiga e fiafia i ai e uiga i le Uluai Faaaliga ma na te mafaufau loloto i le faamoemoega faavavega o lagomeli i le lalolagi. “A aunoa ma i latou e faapoleniina laau,” na fai mai ai Joseph, “e le ola a tatou faatoaga.”

Na ia moemiti na te tausia ni ana lava lagomeli i se aso, ma i le 2018, o Joseph—ua avea nei ma tamā matua—ua iu lava ina maua lona avanoa. Sa ia faatauina ni ofaga se lua ma ia faatutuina ma le naunautai i ona tuafale ma aumaia se suti mo le saogalemu e ofuina i taimi uma na te asia ai lagomeli. Na vave lava ona avea lona naunau e tausia lagomeli ma mea e sili ona fiafia i ai.

“O se auala faafiafiaina e talisapaia ai foafoaga a le Tama Faalelagi, ma e le toe tali mai lagomeli ia te oe,” na ata o ia. O ia o se tagata tuuto i ana ofaga lagomeli lea e masani lava ona fesili ai lona afafine pe o a mai ana “bee children” (fanau lagomeli) . . . ma e pei lava ona faia e tamaiti, na aoao foi e lagomeli ia te ia ni lesona taua o le olaga.

“I se tasi aso sa ou asiasi ai i ofaga lagomeli e aunoa ma lou suti mo le saogalemu,” o le tala lea a Joseph. “O lo tatou perofeta, o Russell M. Nelson, sa saunoa i se aulotu i le itulagi i Aukilani i le aso na sosoo ai—ma na ou alu e faataunuu lou valaauga i lena sauniga ma se mata na aafia i le u a le lagomeli.”

O lena aafiaga na aoaoina ai o ia i le taua o le puipuia o ia lava i taimi uma, i le faaletino ma le faaleagaga.

O le mea mataina o le faigamalaga a Joseph i le tausia o lagomeli o le taimi na maua ai e ana ofaga o lagomeli le 60 kilokalama o meli vao matagofie. Na ia tufaina le tele o taseni o fagu ma maua ai ni faamatalaga lelei. “E oo lava i lau uo e faafoeina se pisinisi meli sa fai mai o au meli e sili atu ona lelei lona tofo nai lo meli o loo latou gaosia,”o le tala fiafia lea a Joseph. Sa le mafai ona faatali o ia e vaai pe faapefea mai ana ofaga lagomeli i le isi vaitau e selesele ai.

Ona oo lea i se tasi taeao, sa ia mauaina se tasi o ofaga lagomeli ua gaogao. Ua o ese uma lagomeli!

Sa sailia e Joseph le vai aai atoa, ae sa lei manuia. “O nisi taimi e filifili ai le masiofo o lagomeli e alu ese ma ave uma le kolone,” na ia faamatalaina. “O nisi taimi e mafai ona e toe mauaina, ma o nisi taimi e leai.”

Sa ia iloa o le taimi lava e tuua ai e le kolone lona ofaga, e foliga lava e le toe foi mai. E faapena foi, e le mafai e lagomeli ona latou aveina se ofaga a se isi kolone. Ona o nei mafuaaga, o lea e tausia ai e le au tausi lagomeli ni ofaga se tele—ae na o le lua ofaga a Joseph.

O le mea e faanoanoa ai, i ni nai masina mulimuli ane, o lana ofaga lona lua sa aunoa ma ni lagomeli.

Na nutimomoia le loto o Joseph: “Sa ou matuai faanoanoa lava. Na ou lagona e pei na i ai sa’u meatotino ua leiloa.”

Sa ia faatautau i luga lona suti mo le saogalemu ae alu atu e tau atu i lona toalua, o Atelaite, e uiga i le tala faanoanoa. “Ua leai ni ta lagomeli,” na fai atu ai Joseph ia te ia. Sa ia faamalosiau mai e tatalo.

Mai lena taeao, sa tatalo ma le naunautai le ulugalii, i aso uma, mo a laua lagomeli. La te faafetai atu i le Tama Faalelagi mo le avanoa na la tausia ai lagomeli, ma le olioli na aumaia e lena aafiaga ia i laua, ona la tatalo ai lea mo se vavega—ina ia toe foi mai lagomeli.

Peitai, i le mavae ai o le toeititi atoa le lua vaiaso, na amata ona tau leai se faatuatua o Joseph. Na ia tau atu ia Atelaite ua ia sauni e tuu i lalo ana ofaga gaogao ma faatau mai nisi lagomeli i le isi vaitau e sosoo ai. “O mea nei na tutupu,” na ia fai atu ai. “Ta tuu ia i le natura e pule ai.”

Ae sa lei sauni Atelaite e faamaamulu. Sa i lona loto upu a Amuleka:

Ioe, ia outou faalotomaualalo outou lava, ma tatalo atu pea ia te ia . . . Tagi atu ia te ia pe a outou i ai i o outou fanua, ina ia outou manuia ai . . . ina ia faateleina. (Alema 34:19–20, 24–25)

Sa lei muta lava ana tatalo.

I se tasi taeao o le Aso Toonai, na matauina e Joseph lagomeli o faapepepepe i luga o fugalaau o lana togalaau. I le vaai ai a se tagata tomai faapitoa i le tausia o lagomeli, na ia vaaia le tele o lagomeli o feaveaia poleni, ma o loo latou aga atu i ana ofaga o lagomeli.

Na faanatinati atu Joseph e tui lona suti ma alu atu loa e vaavaai. Sa felelei faataamilo atu lagomeli i se tasi o ana ofaga, ma ina ua ia tatalaina, sa faatumulia i le faitau afe o lagomeli.

Sa maligi loimata o Joseph ma fai sana tatalo faafetai le leoa. Sa ia sueina le masiofo o lagomeli ma faafetai atu i ai mo le toe aumaia o lana kolone i lenei ofaga. Ona ia tamoe atu lea i le fale e tau ia Atelaite.

“Sa ou fai atu, ‘Si a’u pele, e te iloa oe? Ua toe foi mai lagomeli!’” Na ia opo ma sogi atu i lona toalua, ona ia fai atu lea, “Ua sili atu lou faatuatua nai lo a’u.”

E oo mai i le asō, e le o iloa e Joseph pe o lagomeli lava ia na tuua lana ofaga, pe o se kolone fou lea ua nofoia le ofaga. Ona o lea tulaga e le mailoa, pau le mea o loo ia iloa o se vavega na tupu, ma na afua e ala i le faatuatua.

“Toeitiiti lava a ou fiu ma ‘tuu, ia pulea e le natura,’” o le tala lea a Joseph, “ae sa lei fiu lava lou toalua. Ua ou aoao ia le tuua lava a tatou tatalo ma ia faalagolago i le Tama Faalelagi. E le tupu i taimi uma se vavega, ae afai e tupu, e na te aumaia le olioli.”