Ua Tutu Faatasi le Au Paia o Aso e Gata Ai ma Tagata Lautele e Toe Faaleleia le Mudgeeraba Showgrounds i le Ma’ea ai o Lologa

I le maea ai o ni lologa i le amataga o le tausaga nei, o le Mudgeeraba Showgrounds—o se nofoaga e fai ai faaaliga ma se malae o faafiafiaga i Mudgeeraba, Gold Coast, Ausetalia—sa ufitia i faaputuga o otaota. Na talosagaina e le Komiti o Faaaliga a Mudgeeraba ia tagata lautele e fesoasoani i le faamamaina, vali ma le toe faaleleia.

I le aso 27 o Fepuari, o le vaega o Tinei Mū i Nuu i Tua i Mudgeeraba, o tagata volenitia i le nuu ma sui e 130 o le Siteki o Gold Coast i Ausetalia o Le Ekalesia a Iesu Keriso o le Au Paia o Aso e Gata Ai na galulue faatasi e toe faaleleia le fanua.

O Ella Parsons, o le Peresitene o Faaaliga i Mudgeeraba, sa saunoa mai, “Matou te faafetai tele atu i tagata uma mo a latou taumafaiga. O se ausiaga maoae. Matou te faafetai i le i ai o Le Ekalesia a Iesu Keriso o le Au Paia o Aso e Gata Ai o se vaega o la tatou faapotopotoga. Ua tele tausaga o tatou taumafaia lenei galuega tele.”

“Talu ai ona o le toatele o volenitia lea na mafai ai ona māmā le galuega,” na saunoa ai Marina Taulepa, o se sui auai o le Ekalesia mai le Uarota a Robina. “Ua matou fiafia i le mafai ai ona matou saofaga atu i le tatou nuu.”