Duol ngadto kang Kristo ug Ayaw Pag-inusara
Ang labing maayong paagi aron inyong mapalambo ang kalibotan mao ang pag-andam sa kalibotan alang ni Kristo pinaagi sa pagdapit sa tanan sa pagsunod Kaniya.
Bag-ohay lang nakadawat ko og sulat gikan sa usa ka mausisaon nga batan-ong babaye. Siya misulat: “Wala ko milambo. … Dili ko sigurado kinsa ako, apan gibati nako nga ania ako alang sa usa ka talagsaon nga katuyoan.”
Nasinati ba ninyo sukad ang pagbati nga nagpangita, naghunahuna kon ang Langitnong Amahan nakaila ba kaninyo ug kon Siya nagkinahanglan kaninyo? Minahal kong mga kabatan-onan, ug sa tanan, ako mopamatuod nga ang tubag oo! Ang Ginoo adunay plano alang kaninyo. Siya miandam kaninyo alang niini nga panahon, karon gayod, aron mahimong kusog ug pwersa alang sa maayo diha sa Iyang dakong buhat. Nagkinahanglan kami kaninyo! Dili gayod kini mahimong ingon ka talagsaon kon wala kamo!
Ubos sa sagradong mga kahimtang, ang atong pinalanggang propeta, si Presidente Russell M. Nelson, kausa nagpahinumdom kanako og duha ka yano nga kamatuoran nga sukaranan sa inyong talagsaon ug mahimayaong buhat.
Samtang naglingkod ko sa sopa uban ang akong bana, ang atong propeta mibira sa iyang lingkoranan paduol, nga hapit na magsangko ang among tuhod, ug ang iyang asul nga mga mata dulot nga mitutok kanako. Dili ko sigurado kon gabuto-buto akong dughan o hingpit nga mihunong sa dihang gitawag ako niya aron moserbisyo isip Kinatibuk-ang Presidente sa Young Women. Aduna siyay pangutana nga hangtod karon ako pang mabati sa akong kasingkasing, “Bonnie, unsay labing importanting butang nga gikinahanglan sa [kabatan-onan] nga mahibaloan?”
Namalandong ako og kadiyot ug miingon, “Sila kinahanglang masayod kon kinsa sila.”
“OO!” siya mituaw, “ug sila kinahanglang masayod unsa ang ilang katuyoan.”
Atong Balaanong Pagkatawo
Kamo pinalanggang anak sa Langitnong Amahan. Siya nahigugma kaninyo sa hingpit nga Siya mipadala sa Iyang Anak, si Jesukristo, aron sa pagtubos alang kaninyo ug alang kanako.1 Ang gugma sa Manluluwas alang kanato walay pagkapakyas—bisan pa og kita mapakyas! Walay makapahimulag kanato gikan sa gugma sa Dios.2 Ang paghinumdom niini nga gugma makatabang kaninyo sa pagsalikway sa negatibo nga mga hunahuna sa kalibotan nga mosulay sa paghuyang sa inyong pagsalig diha sa inyong balaanong pagkatawo ug butahan kamo sa inyong potensiyal.
Sa usa ka komperensiya sa FSY, nahimamat nako ang duha ka batan-ong babaye kinsa nanglimbasog. Parehas nga gihisgotan sa batan-ong mga babaye ang pagdangop sa iyang patriyarkal nga panalangin aron madiskobrehan pag-usab ang personal nga gugma ug giya sa Ginoo alang kaniya. Pangitaa ang inyong patriyarkal nga panalangin, tayhopa ang mga abog kon gikinahanglan, apan tun-i kini kanunay. Kon wala pa ka, pagkuha—sa dili madugay. Ayaw paglangan sa pagdiskobre og unsay gusto sa Ginoo nga isulti kaninyo karon mahitungod sa kon kinsa kamo.
Atong Mahangturon nga Katuyoan
Ang ikaduhang kamatuoran ni Presidente Nelson nga gisulti kanamo nianang adlawa mao ang pagkahibalo sa atong katuyoan. Mao kini ang atong talagsaon ug halangdong katungdanan.
Pipila ka tuig ang milabay, ang akong anak nga lalaki si Tanner mga singko anyos pa lamang dihang midula siya sa iyang una nga dula sa soccer. Naghinamhinam siya!
Dihang kami miabot alang sa dula, nakaamgo kami nga ang iyang team naggamit og usa ka regular ang gidak-on nga soccer goal—dili ang para sa gagmayng mga bata nga mabitbit ra apan usa ka dako kaayo nga net nga dako ra gayod kaayo para sa singko anyos nga mga bata.
Ang dula nahimong importante kaayo dihang nakita nako nga si Tanner maoy anaa sa posisyon nga maoy tigbantay sa goal. Ingon og nakalitan ako. Nakasabot ba kaha siya sa iyang katuyoan diha sa net?
Mitingog na ang pito, ug nalingaw kaayo mi nga nagtan-aw diha sa dula nga nakalimot mi bahin ni Tanner. Kalit lang usa ka sakop sa kaatbang nga team nakakuha sa bola ug paspas nga nagdagan samtang nagpatid sa bola padulong niya. Mitan-aw ko sa direksyon ni Tanner aron maniguro kon anaa siya sa posisyon ug andam modepensa sa goal. Akong nakita ang usa ka butang nga wala ko damha.
Sa usa ka higayon sa dula, si Tanner nalinga ug misugod sa pagsuksok sa iyang wala nga bukton sa lainlaing lungag diha sa net. Dayon mao pod ang iyang gibuhat sa iyang tuo nga bukton. Sunod, ang iyang wala nga tiil. Ug sa kataposan, ang iyang tuo nga tiil. Si Tanner hingpit gayod nga nasambod diha sa net. Nakalimtan niya ang iyang katuyoan ug sa unsay gisalig kaniya nga pagabuhaton.
Bisan kon wala magdugay ang tahas ni Tanner sa soccer, ang iyang pagtulon-an niana nga adlaw para kanako dili gayod makalimtan. Kita usahay malinga gikan sa nganong ania kita dinhi ug gibalhin ang atong mga tinguha ngadto sa lahi nga mga butang. Ang usa sa labing kusgan nga mga hinagiban ni Satanas mao ang paglinga nato sa maayo ug labi ka maayo nga mga kawsa diin, sa mga oras sa panginahanglan, mahimong mohalap ug mogapos kanato palayo gikan sa mismong buluhaton nga nagtawag kanato dinhi sa kalibotan.3
Ang atong mahangturon nga katuyoan mao nga moduol ngadto ni Kristo ug aktibo nga moabag sa Iyang talagsaon nga buhat. Sama kini ka yano sama sa pagbuhat sa unsay gitudlo ni Presidente Nelson: “Bisan kanus-a nga mobuhat kita og bisan unsa sa pagtabang ni bisan kinsa … sa paghimo ug pagtuman sa ilang mga pakigsaad sa Dios, nagtabang kita sa pagpundok sa Israel.”4 Ug kon kita mobuhat sa Iyang trabaho uban Kaniya, kita mahimong makaila ug labaw nga mahigugma Kaniya.
Mopadayon kita nga magtinguha nga mas maduol ngadto sa Manluluwas pinaagi sa hugot nga pagtuo, paghatag og bili sa paghinulsol, ug sa pagtuman sa mga sugo. Samtang gibugkos nato ang atong kaugalingon ngadto Kaniya pinaagi sa mga pagkigsaad ug mga ordinansa, gihatagan nato ang atong mga kinabuhi og pagsalig,5 proteksyon,6 ug lig-on ug malungtarong hingpit nga kalipay.7
Sa atong pagduol ngadto Kaniya, kita motan-aw sa uban sa susama nga paagi sa Iyang pagtan-aw.8 Duol ngadto kang Kristo. Duol na karon, apan ayaw pag-inusara!9
Ang ebanghelyo ni Jesukristo dili lang maanindot; kini mahinungdanon alang sa tanan. “Walay lain nga paagi o mga pamaagi diin [kita] maluwas, diha lamang ug pinaagi ni Kristo.”10 Nagkinahanglan kita kang Jesukristo! Ang kalibotan nagkinahanglan ni Jesukristo.11
Hinumdomi, ang labing maayong paagi aron inyong mapalambo ang kalibotan mao ang pag-andam sa kalibotan alang ni Kristo pinaagi sa pagdapit sa tanan sa pagsunod Kaniya.
Adunay makapatandog nga istorya diha sa Basahon ni Mormon bahin sa nabanhaw nga Kristo nga nakigkauban sa mga Nephite. Inyo bang mahunahuna kon sama sa unsa kadto?
Samtang si Kristo mipahibalo nga Siya kinahanglan gayod nga mobalik ngadto sa Amahan, “siya milib[o]t sa iyang mga mata pag-usab.”12 Nakakita nga ang mga tawo naghilak, Siya nasayod nga ang ilang kasingkasing nangandoy nga Siya magpabilin og diyutay pa nga panahon.
Siya nangutana: “Aduna ba kamo dihay mga masakiton? Dad-a sila ngari. Aduna ba kamo dihay mga bakol, o mga buta, … bungol, o kadto nga gitakbuyan sa tanan nga mga matang sa sakit? Dad-a sila ngari ug Ako moayo kanila.”13
Sa pagbaton og dakong kalooy, Siya wala magpili ug mitawag alang sa tanan “nga gitakbuyan sa tanan nga mga matang sa sakit.” Ganahan ko nga walay bisan unsa nga dako kaayo o gamay kaayo alang ni Jesukristo sa pag-ayo.
Siya nasayod usab sa atong pag-antos ug nagtawag, Dad-a ang nabalaka ug naguol, ang gikapoy, ang mapahitas-on ug wala masabti, ang nagsubo, o kadtong kinsa “gitakbuyan sa tanan nga mga matang sa sakit.”
Ug ang tanan “miduol … ; ug siya miayo kanila matag usa kanila. …
“… Ug silang tanan, kadto kinsa nangaayo ug kadto kinsa mga maayo, miluhod sa iyang tiilan, ug misimba kaniya.”14
Matag higayon nga mobasa ko niini, mangutana ko sa akong kaugalingon: Kinsa ang akong dad-on ngadto ni Kristo? Kinsa ang inyong dad-on?
Mahimo ba kita nga motan-aw pag-usab, sama sa gibuhat ni Jesus, aron masiguro nga walay bisan usa nga dili maapil ug modapit sa matag usa sa pagduol aron makaila Kaniya?
Tugoti ako sa pagpaambit og usa ka panig-ingnan kon unsa kini ka yano. Akong amiga nga si Peyton nga nag-edad og 15 adunay tumong nga mobasa og lima ka bersikulo sa kasulatan atol sa tingpamahaw matag adlaw, apan wala niya kini buhata nga nag-inusara. Mitan-aw pag-usab, si Peyton midapit sa iyang mga ginikanan ug mga igsoon, bisan ang iyang singko anyos nga igsoong lalaki. Kining mora og gamay nga buhat mao ang gitudlo ni Kristo dihang Siya midapit, “Dad-a sila ngari.”
Kini nga pagdapit gikan sa Ginoo nagpadayon gihapon karon. Mga batan-ong babaye ug mga batan-ong lalaki, pagsugod na kamo karon, diha sulod sa inyong panimalay. Mahimo ba og mag-ampo ug mangayo kamo sa Langitnong Amahan unsaon ninyo pagsuporta inyong ginikanan samtang sila nagpadayon sa pagduol ngadto kang Kristo? Sila nagkinahanglan kaninyo sama nga kamo nagkinahanglan kanila.
Dayon motan-aw pag-usab diha sa inyong mga igsoon, mga higala, ug mga silingan. Kinsa ang inyong dad-on ngadto kang Kristo?
Ang atong Manluluwas namahayag, “Tan-awa Ako mao ang kahayag; Ako nagpakita og usa ka panig-ingnan alang kaninyo.”15 Kita mobati sa gugma ug kalinaw sa Manluluwas samtang kita moabag Kaniya diha sa pagluwas sa Iyang pamilya, kay Siya misaad, “Ang mosunod kanako dili na gayod maglakaw diha sa kangitngit, kondili makabaton hinuon sa kahayag sa kinabuhi.”16
Unsa ka mahimayaong panahon nga maapil sa kawsa ni Kristo!
Oo, ania kamo alang sa talagsaong katuyoan. Mouyon ko ni Presidente Nelson, kinsa miingon, “Ang Ginoo nagkinahanglan kaninyo sa pag-usab sa kalib[o]tan. Sa inyong pagdawat ug pagsunod sa Iyang kabubot-on alang kaninyo, makita ninyo ang inyong kaugalingon nga nakahimo sa imposible!”17
Ako maisogon nga mopamatuod nga ang Ginoo nakaiIa kinsa kamo, ug Siya nahigugma kaninyo! Maghiusa, atong palamboon ang Iyang katuyoan hangtod nga moabot kanang mahinungdanong adlaw nga si Kristo Mismo mobalik dinhi sa yuta ug motawag sa matag usa kanato sa pagduol “ngari.” Kita hingpit nga magmalipayon nga magkatigom, tungod kay kita mao kadtong kinsa moduol ngadto kang Kristo, ug kita moduol nga dili mag-inusara. Sa ngalan ni Jesukristo, amen.