Ang Ngalan sa Simbahan Dili Mausab
Kon kita andam nga mosunod sa tambag sa Ginoo nga gipadayag pinaagi sa Iyang buhi nga propeta, ilabi na kon kini supak sa atong una nga gihunahuna, nagkinahanglan og pagpaubos ug sakripisyo, ang Ginoo mopanalangin kanato og dugang espirituwal nga gahom.
Sa usa ka komperensiya kauban ang taga press niadtong Agosto 16, 2018, si Presidente Russell M. Nelson miingon: “Ang Ginoo midasig sa akong hunahuna sa kaimportante sa ngalan nga Iyang gihatag alang sa Iyang Simbahan, bisan Ang Simbahan ni Jesukristo sa mga Santos sa Ulahing mga Adlaw.1 Aduna pa kitay daghang buluhaton aron mapahiangay ang atong kaugalingon subay sa Iyang kabubut-on.”2
Paglabay sa duha ka adlaw, kaniadtong Agosto 18, kauban nako si Presidente Nelson didto sa Montreal, Canada. Pagkahuman sa among miting uban sa mga miyembro diha sa dalaygon nga Palais de Congré, si Presidente Nelson mitubag og mga pangutana gikan sa mga reporter. Iyang giila nga mahimong “hagit ang [pag-establisar og balik sa ngalan sa Simbahan, ug] usbon ang usa ka tradisyon nga labaw pa sa usa ka gatos ka tuig.” Apan, siya midugang, “Ang ngalan sa Simbahan dili mausab.”3
Pito ka semana ang milabay, si Presidente Nelson namulong diha sa kinatibuk-ang komperensiya. “Ang Ginoo midasig sa akong hunahuna sa kaimportante sa ngalan nga Iyang gihatag alang sa Iyang Simbahan, bisan Ang Simbahan ni Jesukristo sa mga Santos sa Ulahing mga Adlaw. … Ang Manluluwas Mismo ang nag-ingon,‘Kay sa ingon ang akong simbahan pagatawgon.’” Dayon si Presidente Nelson misubli, “Ang ngalan sa Simbahan dili mausab.”4
Usa ka Maayong Pangutana
Usa ka maayo nga pangutana mitumaw: Nganong karon ra man, nga daghan nang dekada nga atong gihangop ang angga nga “Mormon”? “Ang Mormon Tabernacle Choir,” ang mga video spot [mugbo nga mga video] nga “Ako usa ka Mormon,” ang kanta sa Primary nga “I Am a Mormon Boy [Ako usa ka Mormon nga Lalaki]”?
Ang doktrina ni Kristo dili mausab ug walay kataposan. Apan piho ug importante nga mga lakang sa buhat sa Manluluwas gipadayag sa ilang eksakto nga panahon. Kaganinang buntag si Presidente Nelson miingon, “Ang Pagpahiuli usa ka proseso, dili usa ka hitabo.”5 Ug ang Ginoo miingon, “Ang tanan nga mga butang kinahanglan gay[o]d mahinabo diha sa ilang panahon.”6 Karon mao ang atong panahon, ug kita mi-establisar pag-usab sa gipadayag nga ngalan sa Simbahan.
Ang ilhanan ug padulngan sa Ang Simbahan ni Jesukristo sa mga Santos sa Ulahing mga Adlaw nagkinahanglan nga kita pagatawgon pinaagi sa Iyang ngalan. Bag-ohay lang didto ko sa Kirtland, Ohio, diin si Propeta Joseph Smith, uban ang pipila lang ka miyembro sa Simbahan, nanagna, “Kini nga Simbahan molukop sa Amihanan ug Habagatang Amerika––molukop kini sa kalib[o]tan.”7 Ang Ginoo mihulagway sa buluhaton niini nga dispensasyon nga “usa ka kahibulongan nga buhat ug usa ka katingalahan.”8 Siya mihisgot og usa ka “pakigsaad [nga] matuman sa ulahing mga adlaw,” magtugot nga “ang tanan … sa yuta mapanalanginan.”9
Ang mga pulong niini nga komperensiya gihubad nga live ngadto sa 55 ka pinulongan. Sa kataposan, kini nga mga pulong madungog ug mabasa diha sa 98 ka pinulongan sa labaw sa 220 ka nasod ug mga teritoryo.
Kon ang Manluluwas mobalik diha sa kahalangdon ug himaya, ang matinud-anon nga mga miyembro sa Ang Simbahan ni Jesukristo sa mga Santos sa Ulahing mga Adlaw maanaa sa tanang kanasoran, tanang katawhan, tanang kaliwatan, tanang pinulongan, ug tanang kultura sa kalibotan.
Ang Nagtubo nga Impluwensiya sa Simbahan
Ang impluwensiya sa gipahiuli nga Simbahan ni Jesukristo dili lamang maanaa niadtong mga miyembro sa Simbahan. Tungod sa langitnong mga pagpakita sa atong panahon, tungod sa sagrado nga kasulatan nga napahiuli sa yuta, ug ang gamhanang gasa sa Espiritu Santo, kita mahimong kahayag diha sa bungtod samtang ang kawalay pagtuo kang Jesukristo mongitngit sa kalibotan. Bisan kon daghan ang motugot sa kalibotan sa pagwagtang sa ilang pagtuo diha sa Manunubos, kita “dili pagakuhaon [sa atong] dapit.”10 Ang mga Kristiyano kinsa dili lakip sa atong pagkamiyembro mohangop sa atong tahas ug sa atong sigurado nga pagsaksi bahin ni Kristo. Gani kadtong mga Kristiyano kinsa nagtan-aw nato nga naay pagduha-duha moabot ang adlaw nga mohangop nato isip mga higala. Niining umaabot nga mga adlaw, kita pagatawgon sa ngalan ni Jesukristo.
Salamat sa inyong halangdon nga mga paningkamot sa pagtabang nga mapalambo ang tinuod nga ngalan sa Simbahan. Sa komperensiya tulo ka tuig ang milabay, si Presidente Nelson misaad kanato: “ang atong kanunay nga pagmatngon sa paggamit sa husto nga ngalan sa Simbahan sa Manluluwas … [modala kanato] sa paglambo sa pagtuo ug pag-angkon og dugang nga espirituwal nga gah[o]m.”11
Kini nga saad natuman pinaagi sa mapahinungoron nga mga disipulo sa tibuok kalibotan.12
Si Brother Lauri Ahola gikan sa Sidlakang bahin sa Estados Unidos miangkon nga adunay mga panahon nga alang niya kiwaw ang pagpakigbahin sa kompleto nga ngalan sa Simbahan. Apan tungod sa tambag sa propeta, siya nagpadayon. Usa ka okasyon, mibisita siya sa usa ka higala diha sa simbahan sa laing tinuohan. Kini ang iyang mga pulong:
Usa ka kaila nangutana, “Usa ka ba ka Mormon?”
“‘Usa ako ka miyembro sa Ang Simbahan ni Jesukristo sa mga Santos sa Ulahing mga Adlaw, oo,’ miingon ko. Siya misugod sa pagpangutana nako og pipila ka pangutana, matag usa niini nagsugod sa: ‘Ang Simbahan sa Mormon nagtuo ba…?’ Ug sa matag higayon, misugod ko sa akong tubag sa mga pulong: ‘Diha sa gipahiuli nga Simbahan ni [Jesu]kristo, kami nagtuo …’
“… Dihang nakamatikod siya nga dili ko modawat sa titulo nga ‘Mormon,’ nangutana siya nako sa direkta, ‘Di ba Mormon ka?’
“Mao nga nangutana ko niya kon nasayod ba siya kinsa si Mormon—wala siya masayod. Giingnan nako siya nga si Mormon usa ka propeta … [ug akong] dungog nga napasuod [kaniya].
“‘Apan,’ mipadayon ko, ‘si Mormon wala magpakamatay alang sa akong mga sala. Si Mormon wala … mag-antos sa Getsemani o namatay sa krus [alang kanako]. … Si Jesukristo mao ang akong Dios ug ang akong Manluluwas. … Ug kini pinaagi sa Iyang ngalan nga gusto ko nga mailhan. …’
“… Human sa pipila ka segundo sa kahilom, [ang kaila miingon], ‘Nan, Kristiyano diay ka!’”13
Nakahinumdom mo sa mga pulong ni Presidente Nelson? “Mosaad ko kaninyo nga kon kita mobuhat sa atong labing maayo sa pagpahiuli sa saktong ngalan sa Simbahan sa Ginoo, Siya kansang Simbahan mao kini mobu-bu sa Iyang gah[o]m ug mga panalangin diha sa mga ulo sa mga Santos sa Ulahing mga Adlaw, sa mga paagi nga wala nato makita sukad.”14
Ang Ginoo Kanunay nga Mobukas sa Agianan
Ang Ginoo kanunay nga motuman sa Iyang mga saad. Ang Ginoo kanunay nga mobukas sa agianan alang kanato samtang himoon nato ang Iyang buhat.
Sulod sa daghang tuig kita naglaom sa pagpalit sa internet domain nga mga site nga ChurchofJesusChrist.org [SimbahanniJesukristo.org] ug ChurchofJesusChrist.com [SimbahanniJesukristo.com]. Bisan usa niini walay gibaligya. Sa duol na ang panahon sa pahibalo ni Presidente Nelson, kalit lang ang duha anaa na. Usa kadto ka milagro.15
Ang Ginoo mipalambo sa atong mga paningkamot sa pagbag-o sa mga ngalan nga dugay na nga nalambigit sa Simbahan.
Sa pagpadayon sa unahan inubanan sa hugot nga pagtuo, ang ngalan sa Mormon Tabernacle Choir giusab ngadto sa The Tabernacle Choir at Temple Square [Ang Tabernacle Choir sa Temple Square]. Ang website nga LDS.org, nga nakadawat og sobra sa 21 ka milyon nga pagbisita matag bulan, gibalhin ngadto sa ChurchofJesusChrist.org.16 Ang ngalan sa LDS Business College giusab ngadto sa Ensign College. Ang website nga Mormon.org giusab ngadto sa ChurchofJesusChrist.org. Sobra sa usa ka libo nga produkto nga adunay ngalan nga “Mormon” o “LDS” nga nalambigit niini giusab ang ngalan. Matinud-anon nga mga Santos sa Ulahing mga Adlaw mipahiangay sa ilang mga website, mga podcast, ug Twitter nga mga account.
Gisagop nato ang bag-o nga simbolo nga nakasentro diha ni Jesukristo.
“Anaa sa sentro sa simbolo ang usa ka representasyon sa marmol nga estatuwa nga hinimo ni Thorvaldsen nga mao ang Christus. Nagpakita kini sa nabanhaw, buhi nga Ginoo nga mituyhad sa Iyang mga bukton aron hangupon ang tanan nga moduol Kaniya.
“Sa simbolikanhong paagi, si Jesukristo nagbar[o]g ubos sa usa ka arko [nga nagpahinumdom] kanato bahin sa nabanhaw nga Manluluwas nga migawas gikan sa lubnganan.”17
Ang typography [bag-ong simbolo ug disenyo] sa Ang Simbahan ni Jesukristo sa mga Santos sa Ulahing mga Adlaw, gipahiangay diha sa labaw sa 50 ka pinulongan. Bag-ong mga ngalan sa domain nakuha sa tibuok kalibotan.
Pagpasalamat alang sa Tabang sa Uban
Mapasalamaton kita sa daghang maayo ug mabination nga mga tawo kinsa mipasidungog sa atong tinguha nga pagatawgon pinaagi sa atong sakto nga ngalan. Ako nakabasa og usa ka artikulo bag-ohay lang nga mikutlo sa usa ka Katoliko nga kardinal nga nagpasabot ngadto “sa mga Santos sa Ulahing mga Adlaw.”18 Samtang nakig-istorya ko sa usa ka lider sa usa ka simbahan sa mga Kristiyano didto sa sidlakang Estados Unidos sa miaging bulan, iyang gitawag ang Simbahan sa iyang unang pagpasabot gamit ang tibuok nato nga ngalan, ug gisundan kini og, “ang Simbahan ni Jesukristo.”
Nakaamgo kami nga ang pagdugang og unom ka pulong sa atong ngalan dili ideyal alang sa media, apan, sama sa gipanagna ni Presidente Nelson, “ang responsable nga media makasab[o]t sa pagtubag sa atong hangyo.”19 Daghang salamat sa paghatag ngari kanamo sa sama nga konsiderasyon nga gihatag sa mga organisasyon sa kultura, atletiko, politika, o komunidad pinaagi sa paggamit sa among gusto nga ngalan.
Adunay pipila kinsa, naglaom nga makuhaan o maminosan ang pagkaseryoso sa atong misyon, magpadayon sa pagtawag nato nga “Mga Mormon.” or “ang Simbahan sa Mormon.” Uban ang maayong pamatasan, gipangayo nato pag-usab ang patas nga hunahuna sa media nga tahuron ang atong tinguha nga pagatawgon kita sa atong ngalan sa hapit 200 na ka tuig.
Ang Kaisog sa mga Santos sa Ulahing mga Adlaw
Adunay liboan ug liboan nga mga Santos sa Ulahing mga Adlaw kinsa maisugon nga nagpahayag sa ngalan sa Simbahan. Kon atong buhaton ang atong bahin, ang uban mosunod. Ganahan ko niini nga istorya gikan sa Tahiti.
Ang diyes anyos nga si Iriura Jean mihukom sa pagsunod sa tambag ni Presidente Nelson.
“Diha sa iyang klase sa eskwelahan naghisgot sila sa ilang kataposan sa semana … ug si Iriura misulti bahin sa … simbahan.
“Ang iyang titser, si Vaite Pifao, miingon, ‘Uy, Mormon diay ka?’
“Si Iriura maisugon nga mipahayag, ‘Dili … ako usa ka miyembro sa Ang Simbahan ni Jesukristo sa mga Santos sa Ulahing mga Adlaw!’
“Ang iyang titser mitubag, ‘Oo, … ikaw usa ka Mormon.’
“Si Iriura mi-insister, ‘Dili titser, ako usa ka miyembro sa Ang Simbahan ni Jesukristo sa mga Santos sa Ulahing mga Adlaw!’
“Si Ms. Pifao nahingangha sa pagtuo ni Iriura ug natingala ngano nga siya mi-insister sa paggamit [sa] taas nga ngalan sa iyang simbahan. [Siya mihukom sa pagkat-on og dugang mahitungod sa Simbahan.]
“[Sa kaulahian, samtang si Sister] Vaite Pifao nabunyagan [siya nagpahayag og pasalamat] nga si Iriura naminaw sa tambag ni Presidente Nelson.”20
“Ang ngalan sa Simbahan dili mausab.” Mopadayon kita sa unahan uban sa hugot nga pagtuo. Kon kita andam nga mosunod sa tambag sa Ginoo nga gipadayag pinaagi sa Iyang buhi nga propeta, ilabi na kon kini supak sa atong unang gihunahuna, nagkinahanglan og pagkamapainubsanon ug sakripisyo, ang Ginoo mopanalangin kanato og dugang espirituwal nga gahom ug mopadala sa Iyang mga anghel aron sa pagsuporta kanato ug mobantay kanato.21 Kita makadawat sa pagpamatuod sa Ginoo ug sa Iyang pagtugot.
Usa ako ka saksi sa gahom sa langit nga anaa sa atong minahal nga propeta, si Presidente Russell M. Nelson. Ang iyang tinguha mao lamang ang pagpahimuot sa Ginoo ug panalanginan ang mga anak sa atong Langitnong Amahan. Gikan sa sagrado, personal nga kasinatian, ako mopamatuod sa gugma sa Ginoo alang kaniya. Siya mao ang propeta sa Dios.
Mosaksi ko nga si Jesus mao ang Kristo, ang Anak sa Dios. Sa ngalan ni Jesukristo, amen.