Pag-atubang sa Atong Espirituwal nga mga Bagyo pinaagi sa Pagtuo kang Kristo
Atong maatubang sa kinamaayohang paagi ang atong espirituwal nga mga bagyo pinaagi sa pagtuo kang Kristo ug pagtuman sa Iyang mga sugo.
Sulod sa milabayng unom ka tuig, ang akong pinalangga nga si Ann, ug ako nagpuyo sa Texas duol sa Gulf Coast, diin pipila sa dagkong mga bagyo miigo sa Estados Unidos, nga nagbilin og labihan ka grabing kadaot ug gani daghan ang nangamatay. Uban sa kasubo, sa bag-ong mga bulan lang mibalik-balik ang ingon nianang makadaot nga mga hitabo. Ang among gugma ug mga pag-ampo gipadangat ngadto sa tanan nga naapektohan sa bisan unsang paagi. Niadtong 2017, personal namong nasinati ang Bagyo nga Harvey, nga nagtala og rekord sa bunok sa ulan ngadto sa 60 pulgadas (150 siyentemetros).
Ang mga balaod sa kinaiyahan maoy makahulma og mga bagyo. Ang temperatura sa dagat kinahanglan nga pinakaminos 80 degrees Fahrenheit (27 degrees Celsius), nga moabot hangtod sa 165 ka piye (50 metros) ubos sa dagat. Samtang ang hangin motagbo sa init nga tubig sa dagat, mopaulbo kini og singaw ug mosaka ngadto sa kawanangan nga didto molanay. Dayon mahulma ang mga panganod, ug ang mga hangin mohimo og naglikos nga porma ibabaw sa dagat.
Ang mga bagyo dagko kaayo, moabot og 50,000 ka piye (15,240 metros) o mas dako pa ngadto sa kawanangan ug sa labing minos nga gilapdon nga 125 ka milya (200 kilometros). Makaikag gayod, samtang ang bagyo moabot na sa yuta, magsugod kini sa pagkahinay kay wala na man kini sa ibabaw sa init nga tubig nga maoy magsugnod nga maghatag og kusog niini.1
Kamo posibling dili gayod mag-atubang og makadaot nga pisikal nga mga bagyo. Hinoon, matag usa kanato nag-antos, ug mag-antos, og espirituwal nga mga bagyo nga mohulga sa atong kalinaw ug mosulay sa atong hugot nga pagtuo. Sa karon nga kalibotan, nagkadaghan kini ug nagkakusog. Salamat, kay ang Ginoo mihatag kanato og siguradong paagi alang sa malipayong pagbuntog niini. Pinaagi sa pagsunod sa ebanghelyo ni Jesukristo, gipaniguroan kita nga kon “kasamok man mopatigbabaw ug mohulga sa kalinaw, na[t]o pagla[o]m mopahiyom.”2
Si Presidente Russell M. Nelson mipasabot:
“Ang mga santos mahimong magmalipayon sa bisan unsang kahimtang. Mahimo kitang mobati og kalipay bisan og bati ang atong adlaw, bati ang semana, o bisan bati ang tuig!
“… Ang kalipay nga atong gibati dili kaayo konektado sa mga sirkumstansya sa atong kinabuhi apan konektado kaayo sa gitutokan sa atong kinabuhi.
“Kon ang sentro sa atong kinabuhi mao … si Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong kinabuhi.”3
Sama nga ang mga balaod sa kinaiyahan maoy mohulma sa mga bagyo, ang balaanong mga balaod maoy mohatag og kalipay atol sa atong espirituwal nga mga alimpulos. Ang kalipay o kaalaot nga atong bation samtang makigbugno kita sa mga bagyo sa kinabuhi gibugkos sa mga balaod nga gipahimutang sa Ginoo. Si Presidente Nelson mipaambit, “Gitawag kini og mga sugo, apan parehas ra gayod kini sa balaod sa pagpakawan, sa balaod sa pagbitad [gravity], [ug] sa balaod nga nagdumala sa pitik sa kasingkasing.”
Si Presidente Nelson mipadayon nga, “Kini nahimo nga usa ka yano nga pormula: Kon gusto ka nga malipay, sunda ang mga sugo.”4
Ang pagduhaduha kontra sa hugot nga pagtuo ug kalipay. Sama nga ang init nga tubig sa dagat maoy hulmahan sa mga bagyo, ang pagduhaduha maoy hulmahan sa espirituwal nga mga alimpulos. Sama nga ang pagtuo usa ka pagpili, mao usab ang pagduhaduha. Kon mopili kita sa pagduhaduha, mipili kita nga kita angay pang pagaaghaton, mosanong sa gahom sa kaaway, nga maoy maghimo kanatong huyang ug dali nga madutlan.5
Si Satanas nagtinguha nga modala kanato ngadto sa hulmahan sa pagduhaduha. Tinguha niya ang pagpatig-a sa atong kasingkasing aron kita dili motuo.6 Ang hulmahan sa pagduhaduha makaagni kay makita kini nga malinawon, ang init nga mga tubig wala magkinahanglan nga kita magsunod “sa matag pulong nga mogula gikan sa ba-ba sa Dios.”7 Niana nga mga tubig si Satanas motintal kanato sa pag-relaks sa atong espirituwal nga pagkamabinantayon. Kana nga pagkawalay pagtagad makaagni og kakulang sa espirituwal nga kombiksiyon, diin kita “dili gayod init ug dili usab bugnaw.”8 Kon kita wala maangkla kang Kristo, ang pagduhaduha ug paghaylo mobira kanato ngadto sa katapol, diin didto wala kitay makaplagan nga mga milagro, malungtaron nga kalipay, ni “kapahulayan sa [atong] mga kalag.”9
Sama sa mga bagyo nga mohuyang inig-abot sa yuta, ang pagduhaduha mapulihan og hugot nga pagtuo samtang magpalig-on kita sa atong pundasyon diha kang Kristo. Dayon atong makita ang tukma nga kakusgon sa espirituwal nga mga bagyo, ug ang atong kapasidad sa pagbuntog niini mas modako. Dayon, “kon ang yawa mopadala sa iyang mapintas nga mga hangin, oo, ang iyang mga panâ diha sa alimpulos, kini walay gah[o]m … sa pagbitad [kanato] ngadto sa bung-aw sa pagkauyamot ug walay katapusan nga pagkaalaot, tungod sa lig-on nga sukaranan diin kamo natukod nga mao ang tinuod nga tuk[o]ranan.”10
Si Presidente Nelson nagtudlo:
“Ang hugot nga pagtuo kang Jesukristo mao ang pundasyon sa tanan nga tinuohan ug agianan sa balaang gahom. …
“Ang Ginoo wala magkinahanglan og hingpit nga hugot nga pagtuo aron kita makagamit sa Iyang hingpit nga gahom. Apan Siya mihangyo kanato nga motuo.”11
Sukad sa Abril nga kinatibuk-ang komperensiya, ang akong pamilya ug ako nagtinguha sa paglig-on sa among hugot nga pagtuo kang Jesukristo ug sa Iyang Pag-ula aron matabangan kami sa “pagbalhin sa [among] mga hagit ngadto sa dili hitopngan nga kalamboan ug oportunidad.”12
Ang among apo nga si Ruby napanalanginan og lig-on, dali rang mopahiangay sa bisan unsa nga sitwasyon. Sa dihang natawo siya, ang iyang tilaokan wala masumpay sa iyang tiyan. Bisan sa masuso pa, si Ruby, pinaagi sa tabang sa iyang mga ginikanan, misugat niini nga pagsulay uban sa dili kasagaran nga determinasyon. Si Ruby singko anyos na karon. Bisan og bata pa kaayo siya, usa siya ka gamhanang ehemplo sa dili pagtugot sa iyang kahimtang nga maoy mokontrolar sa iyang kalipay. Kanunay siyang malipayon.
Niadtong Mayo, si Ruby nag-atubang og laing bagyo sa iyang kinabuhi uban sa hugot nga pagtuo. Natawo usab siya nga wala kaayo motubo ang iyang kamot mao nga nagkinahanglan nga operahan. Sa wala pa kining komplikado nga pag-opera, mibisita mi niya ug gihatagan siya og drowing nga matahom kaayong nagpakita sa usa ka kamot sa bata nga mainitong naggunit sa kamot sa Manluluwas. Sa dihang nangutana mi niya kon gikulbaan ba siya, mitubag siya, “Wala, malipayon ko!”
Dayon nangutana mi niya, “Ruby, nganong wala ka kulbai?”
Si Ruby mapaniguroong miingon, “Kay nasayod ko nga si Jesus mogunit sa akong kamot.”
Ang pagkaayo ni Ruby milagroso kaayo, ug padayon siya nga malipayon. Ang pagkatiunay sa hugot nga pagtuo sa usa ka bata sukwahi sa kaboang sa pagduhaduha nga sa kasagaran motintal kanato samtang kita magkahingkod!13 Apan kitang tanan mamahimong sama sa gagmayng bata ug makapili sa paghikling sa atong kawalay pagtuo. Yano ra kini nga pagpili.
Usa ka mapinanggaong amahan makugihong nangaliyupo sa Manluluwas, nga nag-ingon, “Tabangi intawon kami, … kon makahimo ka.”14
Dayon si Jesus miingon kaniya:
“Ang tanan mahimo sa tawo nga may pagtuo.
“Ug dihadiha ang amahan sa bata miingon … nga naghilak, Duna koy pagtuo apan dili pa kini igo.”15
Kining mapaubsanon nga amahan maalamong mipili sa pagsalig sa iyang pagtuo diha ni Kristo kay sa iyang pagduhaduha. Si Presidente Nelson mipaambit nga, “Ang inyong pagkawalay pagtuo lamang maoy magpugong sa Dios sa pagpanalangin kaninyo sa mga milagro aron sa pagbalhin sa mga bukid sa inyong kinabuhi.”16
Pagkamaloloy-on sa atong Dios nga Siya nagpaabot lang nga kita motuo niini ug dili sa pagkahibalo!
Si Alma mitudlo:
“Bulahan siya nga mituo sa pulong sa Dios.”17
“[Kay] ang Dios maloloy-on ngadto sa tanan kinsa mituo diha sa iyang ngalan; busa siya nagtinguha, sa unang bahin, nga kamo kinahanglan motuo.”18
Oo, sa unang bahin, ang Dios nagtinguha nga kita motuo Kaniya.
Atong maatubang sa kinamaayohang paagi ang atong espirituwal nga mga bagyo pinaagi sa pagtuo kang Kristo ug pagtuman sa Iyang mga sugo. Ang atong pagtuo ug kamasulundon magsumpay kanato ngadto sa gahom lapas sa atong kaugalingon sa pagbuntog “[bisan unsa] pay mahitabo—o wala mahitabo—sa atong kinabuhi.”19 Oo, ang Dios “diha-diha mopanalangin [kanato]” tungod sa pagtuo ug pagsunod.20 Gani, paglabay sa panahon ang kahimtang sa atong kaugalingon mausab ngadto sa kalipay ug “[kita] nahimo nga buhi diha ni Kristo” samtang kita mogamit sa atong pagtuo ug motuman sa Iyang mga sugo.21
Kaigsoonan, hinaot nga kita mopili karon sa “ayaw pagduha-duha, apan pagmatinuohon.”22 “Ang sakto nga paagi mao ang pagtuo kang Kristo.”23 Kita “[gi]kulit … diha sa mga palad sa [Iyang] mga kamot.”24 Siya ang atong Manluluwas ug Manunubos, kinsa nagtindog sa atong pultahan ug nanuktok.25 Sa ngalan ni Jesukristo, amen.