Ang Simbahan Naghatag og Tabang ug Kahupayan

Sa panahon sa krisis ug bisan asa sa kalibotan nga adunay panginahanglan og tabang, ang Simbahan padayon sa pagbuhat sa tanan nga mahimo sa pagtanyag og tabang ug kahupayan, sa kasagaran makigtambayayong sa ubang manggihatagon nga mga organisasyon ug sa dili panggobyerno nga mga ahensiya. Atol sa milabay nga unom ka bulan, ang Latter-day Saint Charities, ang makitawhanon nga katambayayong sa Simbahan, naghatag og suporta sa:

Paghimo sa organisayon nga walay ginansiya sa pagtaod og tubig sa mga panimalay sa hilit nga mga dapit sa Nasod sa Navajo sa New Mexico, Arizona, ug Utah, USA.
Pag-apud-apod og mga 2 ka bilyon nga doses sa COVID-19 nga bakuna ngadto sa namiligro nga mga populasyon sa 121 ka nasod ug mga teritoryo.
Paghatag og mga suplay nga makahupay ngadto sa Ethiopian nga mga refugee nga nagpuyo sa Sudan ug sa grabe nga nabahaan nga mga balangay sa Sudan. Pagsuporta usab sa pagtabang sa mga mag-uuma nga makabawi human sa baha ug makasangkap og pagkaon alang sa ilang mga kaugalingon ug sa uban ug mitabang sa mga pamilya nga makabarog sa kaugalingon pinaagi sa pagpalambo sa ilang kaugalingong mga negosyo.
Pagtabang sa 9,000 ka bakwit ug sa mga milalin pinaagi sa dul-an ka 190 ka manggihatagon nga mga organisasyon sa Estados Unidos, nagtanyag og sunod-sunod nga mga tabang nga mikabat og U.S. $5 million
Pagpadayon sa pagbansay ug sa paghatag og mga computer alang sa mga buta ug may kakulian sa panan-aw nga mga indibidwal sa French Polynesia.
Pagpakigsabot sa ubang relihiyoso ug komunidad nga mga organisasyon aron tabangan ang mga milalin nga mga pamilya diha sa temporaryong pasilidad sa Houston, Texas, USA.
Pagpasiugda sa 20 ka proyekto sa kahupayan sa pandemya sa Paraguay.
Pagdala og kahupayan ngadto sa Haiti human sa grabe nga linog, nga ang mga gambalay sa Simbahan gigamit isip mga kapasilongan ug ang Simbahan nga naghatag og pagkaon, tubig, ug ubang mga suplay.
Pagtubag sa importanting mga panginahanglan sa Afghan nga mga refugee nga nagpuyo sa Qatar, Europe, ug Estados Unidos.

Ang Simbahan mitanyag usab og tabang sa mga Isla sa Caribbean sa Saint Vincent ug sa Grenadines atol sa paglihok sa bolkan sa dapit; miorganisar og mga boluntaryo nga motabang sa pagpanglimpyo ug pagbangon sa dihang ang usa ka dakong bagyo miigo sa Gulf Coast ug sa Louisiana, USA; ug mihatag og tabang sa dihang ang pagbaha mibilin og daghang nangaguba sa mga bahin sa Germany, Belgium, sa Netherlands, Luxembourg, ug Switzerland.