Pakighiusa ni Kristo: Ang Sambingay sa Bakilid
Diha sa panahon sa Ginoo, dili kini diin kita magsugod, apan asa kita nagpadulong ang labing importante.
Isip usa ka batang lalaki, ako adunay dagkong mga pangandoy. Usa ka adlaw human sa klase ako nangutana: “Ma, mag-unsa ako inig ka dako nako: propesyonal nga magdudula sa basketball o usa ka rock star?” Sa kawalay swerte, si Clark ang “pangag” nga kahibulongan walay gipakita nga mga timaan sa pagkaatleta o pagkamaayo sa musika. Ug bisan pa sa nagkalain-laing mga paningkamot, balik-balik akong gibalibaran nga makasulod sa nag-uswag nga programa sa akademya. Sa katapusan ang akong mga magtutudlo misugyot nga motutok lamang ako sa kasagaran nga klase. Sa wala madugay, nakapalambo ako og mga kinaiya nga makatabang sa pagtuon. Apan dili hangtod sa akong misyon ngadto sa Japan nga gibati ko ang akong inteliktwal ug espirituwal nga mga oportunidad nga misugod sa pagpanggula. Mipadayon ako sa pagtrabaho og maayo. Apan sa unang higayon sa akong kinabuhi, akong gihan-ay ang pag-apil sa Ginoo diha sa akong paglambo, ug kini mihimo sa tanang kalainan.
Mga kaigsoonan, niini nga Simbahan, kita nagtuo sa balaanong potensyal sa tanang anak sa Dios ug sa atong gahom nga mahimong usa ka butang nga labaw diha ni Kristo. Diha sa panahon sa Ginoo, dili kini diin kita magsugod, apan asa kita magpadulong ang labing importante.1
Sa pagpakita niini nga baruganan, mogamit ako og yano nga matematika. Karon, ayaw kakulba nga makadungog sa pulong nga matematika sa kinatibuk-ang komperensiya. Ang atong pundok sa magtutudlo og matematika sa BYU–Idaho mipasalig kanako nga bisan ang nagsugod makasabot sa importanting konsepto. Kini nagsugod sa pormula alang sa usa ka linya. Ang hunonganan, alang sa atong katuyoan, mao ang sinugdanan sa atong linya. Ang hunonganan mahimong usa ka habog o ubos nga sinugdanang dapit. Ang pagsaka-kanaog sa linya mahimong positibo o negatibo nga nagharag.
Kitang tanan adunay nagkalain-laing mga hunonganan sa kinabuhi––nagsugod kita sa nagkalain-laing mga dapit nga may nagkalain-laing mga pagtoga sa kinabuhi. Ang pipila natawo nga may maayong mga hunonganan, puno sa oportunidad. Ang uban nagsugod sa pag-atubang og mga kahimtang nga mahagiton ug daw walay kaangayan.2 Dayon kita nagpadayon subay sa pagsaka-kanaog sa personal nga paglambo. Ang atong kaugmaon pagatinoon og gamay ra pinaagi sa atong pagsugod ug labaw kaayo diha pinaagi sa atong pagsaka-kanaog. Si Jesukristo nagtan-aw sa balaanong potensyal sa walay pagsapayan diin kita nagsugod. Siya nakakita niini diha sa makililimos, sa makasasala, ug sa masakiton. Siya nakakita niini diha sa mangingisda, sa magbubuhis, ug gani sa panatiko. Walay pagsapayan kon diin kita nagsugod, si Kristo naghunahuna kon unsay atong gibuhat sa unsay gihatag kanato.3 Samtang ang kalibutan nagpunting sa atong hunonganan, ang Dios nagpunting sa atong pagsaka-kanaog. Sa matematika sa Ginoo, buhaton Niya ang tanan nga Siya makahimo sa pagtabang kanato sa pagpaduol sa atong mga pagsaka-kanaog ngadto sa langit.
Kini nga baruganan kinahanglang mohatag og paghupay ngadto kinsa nakigbisog, ug naghunong sa makadiyot niadto kinsa ingon og aduna sa tanang kahigayonan. Pasogda ako pinaagi sa pagsulti ngadto sa mga indibidwal nga adunay malisod nga kahimtang sa pagsugod, lakip ang kakabos, limitado nga purohan sa pag-eskwela, ug mahagitong mga sitwasyon sa pamilya. Ang uban nag-atubang og pisikal nga mga hagit, mental ug panglawas nga mga limitasyon, o kaliwat nga daling matakboyan og sakit.4 Alang ni bisan kinsa nga nakigbisog sa pagsugod sa malisod nga dapit, palihog hibaloi nga ang Manluluwas nasayod sa atong mga pakigbisog. Siya modala “diha kaniya sa [atong] mga kahuyang, nga ang iyang kasingkasing [mahimo] nga mapuno uban sa kalooy … nga siya [mahimo] nga masayod … unsaon pagtabang [kanato] sumala sa [atong] mga kahuyang.”5
Mopakigbahin ako og duha ka mga dapit sa pag-awhag alang niadtong nag-atubang og malisod nga mga kahimtang sa pagsugod. Una, tutok kon asa ikaw padulong ug dili kon diin ikaw misugod. Mahimong sayop ang pagbale-wala sa imong mga kahimtang––kini mga tinuod ug nagkinahanglang tubagon. Apan ang sobrang pagtutok sa usa ka malisod nga pagsugod makahimo sa pagpatin-aw kanimo ug gani pagpugong sa imong abilidad sa pagpili.6
Sa mga tuig nga milabay, miserbisyo ako uban sa usa ka grupo sa kabatan-onan sulod sa siyudad sa Boston, Massachussetts, kinsa kadaghanan bag-o ngadto sa ebanghelyo ug sa mga gipaabot sa Simbahan. Makatintal ang paglibog sa akong kalooy ug kabalaka alang sa ilang sitwasyon uban sa usa ka tinguha sa pag-ubos sa mga sumbanan sa Dios.7 Sa kadugayan akong naamgohan nga ang labing gamhanang paagi sa pagpakita sa akong gugma mao ang dili gayod ipaubos ang akong mga gipaabot. Uban sa tanang ako kahibalo sa pagbuhat, dungan namong gitutokan ang ilang potensyal, ug ang matag usa kanila misugod sa pagpauswag sa ilang pagsaka-kanaog. Ang ilang pagtubo diha sa ebanghelyo inanay apan kanunay. Karon sila nagserbisyo og mga misyon, migradwar sa kolehiyo, nakasal sa templo, ug nagpuyo sa maayo nga personal ug propesyonal nga mga kinabuhi.
Ikaduha, apila ang Ginoo diha sa proseso sa pagpausbaw sa inyong pagsaka-kanaog. Samtang nagserbisyo isip presidente sa BYU–Pathway Worldwide, nahinumdoman ko nga naglingkod sa usa ka dakong debosyonal sa Lima, Peru, diin si Elder Carlos A. Godoy mao ang mamumulong. Samtang gitan-aw niya ang kongregasyon, ingon og nalipay siya nga nagtan-aw sa daghan kaayong matinud-anon nga unang henerasyon nga mga estudyante sa unibersidad. Tingali naghunahuna sa iyang kaugalingong dalan pinaagi sa sama nga malisod nga mga kahimtang, si Elder Godoy mipahayag nga mabination: ang Ginoo “motabang kaninyo labaw kay sa kamo makatabang sa inyong kaugalingon. [Busa] iapil ang Ginoo niini nga proseso.”8 Si propeta Nephi mitudlo “nga pinaagi sa grasya kami maluwas, human sa tanan nga atong mabuhat.”9 Kinahanglan gayod nga buhaton nato ang atong labing maayo,10 nga naglakip sa paghinulsol, apan kini pinaagi lamang sa grasya sa Ginoo nga kita makaamgo sa atong balaanong potensyal.11
Sa katapusan, tugoti akong makigbahin og duha ka tambag alang niadtong may pasaka nga mga dapit sa pagsugod. Una, kita ba makapakita og pagpaubos alang sa mga kahimtang nga tingali wala nato himoa sa atong kaugalingon? Ingon nga gikutlo sa kanhi Presidente sa BYU nga si Rex E. Lee ngadto sa iyang mga estudyante, “Kitang tanan nakainom gikan sa mga atabay nga dili kita ang nagkalot ug nagpainit sa atong mga kaugalingon sa mga kalayo nga dili kita ang naghaling.”12 Dayon siya mitawag sa iyang mga estudyante sa paghatag og balik ug sa pagpuno pag-usab sa mga atabay nga pang-edukasyon nga gitukod sa mga pioneer. Ang wala pagpugas og balik sa uma sa ubang tawo katugbang sa pag-uli sa usa ka talanton nga walay tubo.
Ikaduha, ang pagtutok diha sa habog nga sinugdanang dapit kasagarang makalit-ag kanato ngadto sa pagbati nga kita nag-uswag nga sa labing tinuod ang atong sulod nga pagsaka-kanaog wala na magsibog. Ang Harvard nga propesor Clayton M. Christensen mitudlo nga ang labing malampusong mga tawo mao ang labing mapainubsanon tungod kay sila may igong pagsalig nga makorihian ug sa pagkat-on gikan sa uban.13 Si Elder D. Todd Christofferson mitambag kanato sa “pag-andam [pagpangita og paagi] nga modawat ug gani sa pagtinguha og koreksyon ”14 Bisan kon ang mga butang makita nga maayo ang dagan, kinahanglan gayod nga mangita kita og mga oportunidad sa paglambo pinaagi sa mainampoong paghangyo.
Walay pagtagad kon kita nagsugod ba sa kabuhong o sa kalisod nga kahimtang, kita makaamgo lamang sa atong labing taas nga potensyal kon atong himoon ang Dios nga atong kapares. Ako bag-o nga nakig-istoryahay uban sa usa ka bantugan sa nasod nga magtutudlo kinsa nag-usisa mahitungod sa kalamposan sa mga estudyante sa BYU–Pathway. Siya maalamon ug ang iyang pag-usisa sinsero, apan klarong gusto niya ang kalibutanong tubag. Gipakigbahin nako kaniya ang atong mga programa sa pagpabilin ug ang mga paningkamot sa pagtudlo. Apan akong gitapos pinaagi sa pag-ingon, “Tanan niini maayo nga mga praktis, apan ang tinuod nga rason nga ang among mga estudyante nag-uswag tungod kay nagtudlo kami kanila sa ilang balaanong potensyal. Handurawa nga ikaw gisultihan nga sa imong tibuok kinabuhi ikaw dili gayod makalampos. Dayon hunahunaa ang impluwensiya sa pagka-natudloan nga ikaw usa ka tinuod nga anak nga lalaki o babaye sa Dios nga may balaanong kahimoan.” Mihunong siya sa makadiyot, dayon yanong mitubag, “Gamhanan kana.”
Mga kaigsoonan, usa sa mga milagro niini, sa Simbahan sa Ginoo, mao nga ang matag usa kanato makahimo og mas labaw diha ni Kristo. Ako walay nahibaloan nga laing organisasyon nga naghatag sa mga miyembro niini og mas daghang oportunidad sa pagserbisyo, paghatag og balik, paghinulsol, ug paghimo nga mas mamaayong mga tawo. Nagsugod man kita sa kabuhong o kalisod nga espirituwal nga mga kahimtang, ipabilin nato ang atong pagtan-aw ug ang atong mga pagsaka-kanaog nga nagtudlo paingon sa langit. Samtang atong gibuhat, mobayaw kanato si Kristo ngadto sa usa ka mas habog nga dapit. Sa ngalan ni Jesukristo, amen.