Pagkahimong Tinuod nga Sumusunod ni Kristo

Sa akong personal nga pagtuon sa mga kasulatan, nakadayeg ko sa pagkakabig ni Saulo sa Tarso, kinsa sa wala madugay nailhan nga Pablo, sigon sa gihulagway sa Biblia.

Si Pablo usa ka aktibo nga tawo sa paglutos sa Simbahan ug sa mga Kristiyano. Apan tungod sa gahom sa langit ug sa Pag-ula ni Jesukristo, hingpit ang iyang pagkausab, ug nahimo siya nga usa sa talagsaong mga sulugoon sa Dios. Ang Iyang modelo sa kinabuhi mao ang Manluluwas nga si Jesukristo.

Sa usa sa mga pagtulon-an ni Pablo ngadto sa mga Taga-Corinto, siya midapit kanila nga mamahimo niya nga iyang mga sumusunod kay siya mismo sumusunod man ni Kristo (tan-awa sa 1 Mga Taga-Corinto 11:1). Usa kini ka sinsero ug balido nga pagdapit gikan sa kapanahonan ni Pablo hangtod karon: pagkahimong tinuod nga sumusunod ni Kristo.

Nagsugod ko sa pagpamalandong unsay ipasabot sa pagkahimong sumusunod ni Kristo. Ug ang mas importante, nagsugod ko sa pagpangutana, “Unsaon nako sa pagsundog Kaniya?”

Ang pagkahimong sumusunod ni Kristo mao ang pagpaningkamot nga maparehas ang atong linihokan, kinaiya, ug kinabuhi ngadto sa Manluluwas. Kana mao ang pag-angkon og mga hiyas. Kana mao ang pagkahimong tinuod nga disipulo ni Jesukristo.

Nakatuon ako og pipila ka aspeto sa kinabuhi sa Manluluwas, ug diri kanako nagpabilin kini, isip kabahin sa akong mensahe karon, ang upat sa Iyang mga kalidad nga gipaningkamotan nakong masundog ug kana akong ipaambit kaninyo.

Ang unang kalidad sa Manluluwas mao ang pagpaubos. Si Jesukristo mapainubsanon kaayo gikan pa sa premortal nga kinabuhi. Didto sa konseho sa Langit, Iyang giila ug gitugot nga ang kabubut-on sa Dios mopatigbabaw sa plano sa kaluwasan alang sa katawhan. Miingon siya, “Amahan, ang imong pagbuot mao ang matuman, ug ang himaya imo sa kahangt[o]ran” (Moises 4:2).

Nasayod kita nga si Jesukristo mitudlo og pagpaubos ug nagpaubos sa Iyang kaugalingon aron sa paghimaya sa Iyang Amahan.

Magpakabuhi kita nga magpaubos tungod kay magdala kini og kalinaw (tan-awa sa Doktrina ug mga Pakigsaad 19:23). Ang pagpaubos mag-una sa himaya, ug magdala kini og pabor sa Dios ngari kanato: “Oo, pagpaubos kamong tanan ug pag-alagad sa usag-usa kay ang kasulatan nag-ingon, Kontra sa Dios ang mga garboso apan maluoy siya sa mga mapaubsanon” (1 Pedro 5:5). Ang pagpaubos magdala og malumo nga mga tubag. Tinubdan kini sa matarong nga taras.

Si Elder Dale G. Renlund nagtudlo:

“Ang mga indibidwal kinsa magkinabuhi diha sa mapaubsanong pakig-uban sa Dios mahinumdom unsay nahimo sa Langitnong Amahan ug ni Jesukristo kanila.”

“Kita madungganong molihok uban sa Dios pinaagi sa pagkinabuhi diha sa mapaubsanong pakig-uban Kaniya” (“Pagbuhat sa Kaangayan, Pagpakita sa Makanunayong Gugma, ug Pagkinabuhi diha sa Mapaubsanong Pakig-uban sa atong Dios,” Liahona, Nob. 2020, 111, 109).

Ang ikaduha nga kalidad sa Manluluwas mao ang kaisog. Kon maghunahuna ko ni Jesukristo sa edad nga 12, nga naglingkod sa templo sa Dios kauban sa mga batid nga abogado ug nagtudlo kanila sa balaan nga mga butang, makaingon ko nga siya nakabaton na, sa sayo kaayo nga bahin sa Iyang kinabuhi, og maayong panabot sa kaisog, usa ka tinuod nga kaisog. Samtang ang kadaghanan magtuo nga makakita nianang bata nga lalaki nga gitudloan sa mga batid nga abogado, Siya ang nagtudlo kanila “sila [ang] naminaw kaniya, ug nangutana kaniya og mga pangutana” (Hubad ni Joseph Smith, Lucas 2:46 sa Lucas 2:46).

Miserbisyo kami og full-time nga misyon sa Democratic Republic of the Congo Mbuji-Mayi Mission sugod 2016 hangtod 2019. Ang among pagbiyahe sa misyon gikan sa usa ka zone ngadto sa lain mao ang pagsubay sa karsada. Usa ka panghitabo ang mitumaw niana nga dapit diin adunay mga tulisan nga magdala og hait nga mga hinagiban moatang sa mga karsada ug mosamok sa mga nagbiyahe.

Lima ka misyonaryo nga nagbiyahe gikan sa usa ka zone ngadto sa lain isip kabahin sa ilang mga transfer nahimong mga biktima niini nga mga pagsamok. Kay kami mismo mga biktima niini nga panghitabo kaniadto, nagsugod kami sa pagkahadlok sa among kinabuhi ug kasiguroan kanamong tanan, gani sa pagpanuko nga mobiyahe niini nga mga dalan sa pagbisita sa mga misyonaryo ug mopahigayon og mga zone conference. Wala kami masayod hangtod kanus-a kini matapos. Mihimo ko og report, nga akong gipadala ngadto sa Kapangulohan sa Area, ug akong gipahayag ang akong mga pagbati sa kahadlok bahin sa padayong pagbiyahe kay mao ra kadto ang karsada aron makaabot sa among mga misyonaryo.

Sa iyang tubag, si Elder Kevin Hamilton, nga among presidente sa Africa Southeast Area, misulat ngari nako: “Ang akong tambag mao ang paghimo sa pinakamaayo nga imong mahimo. Pagmaalamon ug pagmainampoon. Ayaw tuyoa nga ibutang ang imong kaugalingon o ang imong mga misyonaryo sa peligro, apan sa samang higayon padayon uban sa hugot nga pagtuo. ‘Kay kita wala sa Dios hatagig espiritu sa katalaw kondili sa espiritu sa gahom, ug sa gugma, ug sa pagpugong sa kaugalingon’ (2 Timoteo 1:7).”

Kini nga pag-awhag nakalig-on kaayo kanamo ug nagtugot nga kami mopadayon sa pagbiyahe ug moserbisyo uban sa kaisog hangtod sa kataposan sa among misyon, tungod kay nakadungog kami sa direksiyon gikan sa among Amahan sa Langit pinaagi niana nga kasulatan.

Sa modernong kasulatan, atong mabasa ang dinasig nga mga pulong ni Propeta Joseph Smith nga namalandong sa giawhag sa Ginoo ngari kanato: “Mga kaigsoonan, kita dili ba mopadayon sa hilabihan nga mahinungdanon nga katuyoan? Padayon ug ayaw pagsibog. Pagmaisugon, mga kaigsoonan; ug sa kanunay, ngadto sa kadaogan!” (Doktrina ug mga Pakigsaad 128:22).

Magbaton kita og kaisog sa paghimo unsay husto, bisan og dili kini popular—sa kaisog sa pagdepensa sa atong hugot nga pagtuo ug sa paglihok inubanan sa hugot nga pagtuo. Magbaton kita og kaisog nga mohinulsol matag adlaw, sa kaisog nga modawat sa kabubut-on sa Dios ug mosunod sa Iyang mga sugo. Magbaton kita og kaisog sa pagpakabuhing matarong ug pagbuhat sa unsay gilaoman kanato sa atong nagkadaiyang mga responsibilidad ug mga kahimtang.

Ang ikatulo nga kalidad sa Manluluwas mao ang pagpasaylo. Atol sa Iyang mortal nga pangalagad, napugngan sa Manluluwas gikan sa mga pagbato ang usa ka babaye kinsa gisumbong nga nanapaw. Mimando Siya kaniya nga “lakaw ug ayaw na pagpakasala” (Juan 8:11). Kini nagdasig kaniya sa paghinulsol ug sa ngadto-ngadto nga kapasayloan, kay sama sa girekord sa mga kasulatan, “Ang babaye mihimaya sa Dios sukad niana nga takna, ug mituo sa iyang pangalan” (Hubad ni Joseph Smith, Juan 8:11 ).

Atol sa debosyonal sa Pasko niadtong Disyembre 2018, ang atong pinalangga nga si Presidente Russel M. Nelson namulong mahitungod sa upat ka gasa nga atong nadawat gikan sa Manluluwas. Miingon siya nga ang usa ka gasa nga gitanyag sa Manluluwas mao ang abilidad sa pagpasaylo:

“Pinaagi sa Iyang walay kinutoban nga Pag-ula, kamo makapasaylo niadtong kinsa nakapasakit kaninyo ug kinsa dili gayod modawat sa responsibilidad sa ilang pagkabangis nganha kaninyo.

“Sa kasagaran sayon ra kaayo ang pagpasaylo sa usa ka tawo kinsa sinsero ug mapainubsanong nangayo sa inyong pasaylo. Apan ang Manluluwas mohatag kaninyo sa abilidad sa pagpasaylo ni bisan kinsa nga miabusar kaninyo sa bisan unsa nga paagi” (“Upat ka Gasa Nga Gitanyag ni Jesukristo Kaninyo” [Debosyonal sa Pasko sa Unang Kapangulohan, Dis. 2, 2018], broadcasts.ChurchofJesusChrist.org).

Sa sinserong paagi mopasaylo kita sa usag usa aron makaangkon og kapasayloan gikan sa Amahan. Ang pagpasaylo mohimo kanatong gawasnon ug maghimo kanatong takos sa pag-ambit sa sakramento matag Dominggo. Ang pagpasaylo gikinahanglan ngari kanato alang sa pagkahimong tinuod nga mga disipulo ni Jesukristo.

Ang ikaupat nga kalidad sa Manluluwas mao ang sakripisyo. Usa kini ka bahin sa ebanghelyo ni Jesukristo. Ang Manluluwas mihatag sa labihan ka dako nga sakripisyo sa Iyang kinabuhi alang kanato aron kita matubos. Mibati sa kasakit sa sakripisyo, mihangyo Siya sa Iyang Amahan nga isaylo ang kopa, apan mipadayon Siya ngadto sa kataposan sa mahangtoron nga sakripisyo. Mao kini ang Pag-ula ni Jesukristo.

Si Presidente M. Russell Ballard mitudlo niini: “Ang sakripisyo usa ka pagpakita sa tiunay nga gugma. Ang gidak-on sa atong gugma alang sa Ginoo, alang sa ebanghelyo, ug alang sa atong isigkatawo masukod pinaagi sa unsa ang andam nato nga isakripisyo alang kanila” (“The Blessings of Sacrifice,” Ensign, Mayo 1992, 76).

Mahimo nga isakripisyo nato ang atong panahon sa pagpangalagad, sa pagserbisyo sa uban, sa paghimo og maayo, sa paghimo og buhat sa family history, ug paglihok sa atong calling sa Simbahan.

Kita mahimo nga mohatag sa atong pinansyal nga butang pinaagi sa paghatag og ikapulo, mga halad sa puasa, ug ubang mga donasyon sa pagtukod sa gingharian sa Dios dinhi sa yuta. Nagkinahanglan kita nga mosakripisyo aron makatuman sa mga pakigsaad nga atong gihimo sa Manluluwas.

Ang akong pag-ampo mao nga pinaagi kang Jesukristo ug pagkab-ot sa mga panalangin sa Iyang Pag-ula, magkaanam kita sa pagka mas mapainubsanon, mas maisogon kita, mas mopasaylo kita, ug mas mosakripisyo kita alang sa Iyang gingharian.

Mopamatuod ko nga ang atong Langitnong Amahan buhi ug nga Siya nakaila kanato sa tagsatagsa, nga si Jesus mao ang Kristo, nga si Presidente Russel M. Nelson propeta sa Dios karon. Mopamatuod ko nga Ang Simbahan ni Jesukristo sa mga Santos sa Ulahing mga Adlaw mao ang gingharian sa Dios dinhi sa yuta ug ang Basahon ni Mormon tinuod. Sa ngalan ni Jesukristo, atong Manunubos, amen.