Pagpangandam alang sa Ikaduhang Pag-anhi ni Kristo

Sigon sa narekord diha sa Basahon ni Mormon, unom ka tuig sa wala pa matawo si Jesukristo, si Samuel, usa ka matarong nga Lamanite, nanagna ngadto sa usa ka Nephite nga katawhan kinsa niadtong higayona ang kadaghanan nahimong mga masinupakon,¹ kabahin sa mga timailhan nga magauban sa pagkatawo sa Manluluwas. Alaot lang, kadaghanan sa mga Nephite misalikway niadto nga mga timailhan tungod kay kadto “dili makataronganon nga ang usa sama sa giingon nga Kristo [kinahanglan nga] moanhi.”²

Subo lang, sumala sa mga rekord sa kasulatan, daghan sa mga Judeo, sa samang paagi, wala makadawat nga ang usa ka tawo nga ginganlan og Jesus, gikan sa wala kaayo mailhi nga probinsiya sa Galilea, mao gayod ang dugay nang gipaabot nga Mesiyas.³ Si Jesus, kinsa miabot gayod aron sa pagtuman sa daghang panagna sa Hebreohanon nga mga propeta, gisalikway ug gani gilansang sa krus tungod kay, sigon sa gitudlo sa Basahon ni Mormon nga propeta nga si Jacob, ang mga Judeo “[n]agtan-aw lapas sa tumong.” Tungod niini, si Jacob nanagna nga ang “Dios mibawi sa iyang kayano gikan kanila, ug mitugyan ngadto kanila og daghan nga mga butang nga sila dili makasab[o]t, tungod kay sila mitinguha niini. Ug tungod kay sila mitinguha niini ang Dios mibuhat niini, nga sila unta mapandol.”⁴

Ingon og katingalahan man kini, walay pagtulon-an, walay milagro, ug walay pagpakita bisan sa usa ka langitnong anghel, sama sa nasaksihan ni Laman ug Lemuel,⁵ nga makitang adunay gahom sa pag-awhag aron makombinser ang ubang mga indibidwal sa pag-usab sa ilang pamaagi, panglantaw, o pagtuo nga ang usa ka butang tinuod. Mahitabo kini ilabi na kon ang mga pagtulon-an o mga milagro dili mauyon sa gihunahuna nang daan nga mga tinguha, mga pangandoy, o mga ideya sa usa ka indibidwal.

Palihog itandi sa makadiyot ang mosunod nga duha ka kasulatan, ang una gikan kang Apostol Pablo nga namulong kabahin sa ulahing mga adlaw, nga naghulagway sa mga pamaagi sa tawo, ug ang ikaduha gikan kang propeta Alma nga nagpakita kon giunsa sa Dios sa paghimo sa Iyang buhat taliwala sa katawhan. Una gikan ni Pablo:

“Timan-i kini: sa kataposang mga adlaw moabot ang mga malisod nga panahon.

“Ang mga tawo maghunahuna lamang sa ilang kaugalingon ug sa kuwarta. Hambugiro sila, mapahitas-on, bugalbugalon, masupilon sa ilang mga ginikanan, dili mapasalamaton ug dili diosnon,

“Wala silay kaluoy, walay puangod, tigbutangbutang, mapatuyangon, bangis, madinumtanon sa maayo,

“Mabudhion, mapasagaron ug garboso kaayo, palabihon nila ang kahilayan kay sa Dios; …

“Naningkamot nga makakat-on apan dili gayod sila makasabot sa kamatuoran.”⁶

Ug karon gikan kang Alma, nga nagpahayag og sukaranang baroganan sa ebanghelyo ni Jesukristo: “Karon ikaw mahimo nga magdahum nga kini binuang ngari kanako; apan tan-awa ako moingon nganha kanimo, nga pinaagi sa gagmay ug yano nga mga butang ang dagko nga butang ipahinabo; ug gagmay nga mga kahimoan sa daghan nga mga higayon molibug sa maalamon.”⁷

Nagpuyo kita sa usa ka moderno nga kalibotan nga puno sa dagko nga kahibalo ug labihang kahanas. Bisan pa man niana, kining mga butanga sa kasagaran motabon sa dili lig-on nga pundasyon diin kini gitukod. Tungod niini, dili kini modala ngadto sa tinuod nga kamatuoran ug ngadto sa Dios ug sa gahom sa pagdawat og pagpadayag, pag-angkon og espirituwal nga kahibalo, ug sa pagpalambo og hugot nga pagtuo diha ni Jesukristo nga modala ngadto sa kaluwasan.⁸

Kita napahinumdoman gayod sa mga pulong sa atong Ginoo ngadto kang Tomas ug sa ubang Apostoles niadtong gabii sa Iyang maulaong sakripisyo: “Si Jesus mitubag kaniya, Ako ang dalan, ang kamatuoran ug ang kinabuhi. Walay makaadto sa Amahan kon dili moagi kanako.”⁹

Alang niadtong adunay mga mata nga makakita, mga dalunggan nga makadungog, ug mga kasingkasing nga mobati, labaw pa kay sa kaniadto kita gikinahanglan nga moatubang sa kamatuoran nga kita mas nagkaduol gayod ngadto sa Ikaduhang Pag-anhi ni Jesukristo. Tinuod, aduna pay umaabot nga dagkong kalisdanan niadtong anaa sa yuta sa Iyang pagbalik, apan kabahin niini, ang matinud-anon dili kinahanglang mahadlok.

Karon mokutlo ko og kadali gikan sa Gospel Topics [Mga Hilisgotan sa Ebanghelyo] sa Simbahan ubos sa ulohan nga “Second Coming of Jesus Christ [Ikaduhang Pag-anhi ni Jesukristo]”:

“Kon moanhi pag-usab ang Manluluwas, moanhi Siya uban sa gahom ug himaya aron angkonon ang yuta isip Iyang gingharian. Ang Iyang Ikaduhang Pag-anhi motimaan sa pagsugod sa Milenyum.

“Ang Ikaduhang Pag-anhi mahimong usa ka makahadlok, makaguol nga panahon alang sa mga daotan, apan usa kini ka malinawon nga adlaw alang sa mga matarong. Ang Ginoo mipahayag:

“‘Kay sila [nga] mga maalamon ug nakadawat sa kamatuoran, ug nakadawat sa Balaan nga Espiritu alang sa ilang paggiya, ug wala malimbongi—sa pagkatinuod Ako moingon nganha kaninyo, sila dili pagaputlon ug ilabay ngadto sa kalayo, apan molahutay niana nga adlaw.

“‘Ug ang yuta ihatag ngadto kanila alang sa usa ka kabilin; ug sila mosanay ug magkalig-on, ug ang ilang mga anak magtubo nga walay sala ngadto sa kaluwasan.

“‘Kay ang Ginoo anaa sa ilang taliwala, ug ang iyang himaya anaa diha kanila, ug siya ang ilang hari ug ilang magbabalaod’ (Doktrina ug mga Pakigsaad 45:57–59).”¹⁰

Diha sa atong pagpangandam alang sa Ikaduhang Pag-anhi ni Jesukristo, mohatag ko og mahinungdanon, makahupay nga pahinumdom alang sa mga matinud-anon nga kinuha gikan sa Daang Tugon nga propeta nga si Amos: “Sa pagkatinuod, ang tanang himoon sa Ginoong Dios ipahibalo gayod niya sa iyang mga alagad nga mga propeta.”¹¹

Niini nga diwa, ang propeta sa Ginoo sa kalibotan karon, si Presidente Russell M. Nelson, mihatag kanato niining bag-ohay nga makadasig nga tambag: “Ang ebanghelyo ni Jesukristo mao ang ebanghelyo sa paghinulsol. Tungod sa Pag-ula sa Manluluwas, ang Iyang ebanghelyo naghatag og usa ka pagdapit nga kanunayng [mag-usab], maglambo, ug mamahimong mas putli. Kini usa ka ebanghelyo sa paglaom, sa pagkaayo, ug sa pag-uswag. Mao nga, ang ebanghelyo usa ka mensahe sa hingpit nga kalipay! Ang atong mga espiritu magmaya sa ginagmayng kalamboan nga atong mabuhat.”¹²

Ako walay pagduha-duha nga mopamatuod ug mopanghimatuod sa katinuod sa Dios ug sa mga milagro diha sa inadlaw-adlaw nga kinabuhi sa daghan kaayong mga tawo gikan sa ubos ug taas nga kahimtang sa kinabuhi. Tinuod, daghang sagrado nga mga kasinatian ang talagsa ra kaayo nga isulti, usa ka rason tungod sa sagrado nga tinubdan niini ug sa posibling mahitabo nga pagbugalbugal gikan sa uban nga kulang og kahibalo.

Kabahin niini, ang kataposan nga propeta sa Basahon ni Mormon, si Moroni, mipahinumdom kanato:

“Ug usab ako mamulong nganha kaninyo kinsa naglimud sa mga pagpadayag sa Dios, ug nag-ingon nga sila gihunong, nga wala na ang mga pagpadayag, ni mga panagna, ni mga gasa, ni pagpang-ayo, ni pagpamulong sa mga pinulongan, ug paghubad sa mga pinulongan;

“Tan-awa ako moingon nganha kaninyo, siya nga maglimud niini nga mga butang wala masayud sa ebanghelyo ni Kristo; oo, wala siya makabasa sa mga kasulatan; kon mao, siya wala makasabut kanila.

“Kay kita wala ba makabasa nga ang Dios sama kagahapon, karon, ug sa kahangturan, ug diha kaniya walay pagkabalhin ni anino sa pagkausab?”¹³

Akong taposon ang akong pakigpulong pinaagi sa usa ka tinuoray nga makadasig nga propetikanhong pahayag gikan ni Propeta Joseph Smith, nga gihatag sa hapit na matapos ang iyang pagpangalagad samtang siya naglantaw sa Ikaduhang Pag-anhi ni Jesukristo: “Kita dili ba mopadayon sa hilabihan ka mahinungdanon nga katuyoan? Padayon ug ayaw pagsibog. Pagmaisugon, mga kaigsoonan [ug, dugangan nako, mga sister]; ug sa kanunay, ngadto sa kadaugan! Himoa ang inyong mga kasingkasing nga magmaya, ug [m]aglipay sa hilabihan.”¹⁴ Niini ako modugang sa akong pagpamatuod sa ngalan ni Jesukristo, amen.