Eria Lidasip Mesej

Trastem Presidensi blong Kworom blong Ol Elda mo Presidensi blong Rilif Sosaeti

Elda Kazuhiko Yamashita

Presiden, Pasifik Eria Presidensi

Iven long taem ia we KOVID-19 i goraon yet, Jos Ia blong Jisas Kraes Ia blong Ol Lata-dei Sent i gohed blong gro i kam bigwan. From lav we God i gat long yumi, Hem i stap lidim yumi tru long profet blong Hem we i stap laef, Presiden Russell M. Nelson.

Ol doktrin mo ol prinsipol blong gospel oli no jenis, be mi mi bin luk plante nara jenis we oli save karem ol bigfala blesing oli kam insaed long Jos mo long hom. Wan long ol las jenis, we i presidensi blong Kworom blong Ol Elda mo presidensi blong Rilif Sosaeti oli mas mekem moa insaed long wok ia blong fasin blong sevem man.

Long wan notis we i go long ol lida long stek mo long wod, we i blong 6 Oktoba 2018, ol responsabiliti blong memba misinari wok, blong tempol mo famli histri wok insaed long wod, oli givimaot bakegen i go long presidensi blong kworom blong ol elda mo presidensi blong Rilif Sosaeti. Olgeta presidensi ia, oli mas lukluk ova mo kodinetem ol givhan wok, mo oli mas kea long olgeta we oli stap long nid.¹

!Hemia wan gudfala jenis! Mi glad tumas from jenis ia.

?Gudfala jenis ia i minim wanem? Long mi, i minim se presidensi blong kworom blong ol elda mo hemia blong Rilif Sosaeti oli save help blong karemaot ol bigfala wok long solda blong ol bisop, taem we, olgeta nao oli muvum fored misinari wok, mo tempol mo famli histri wok, mo ol welfea mata.

Taem we bisop i stap lukluk ova yet long faenens mo fasin blong yusum fast ofring long wod, presidensi blong kworom blong ol elda mo hemia blong Rilif Sosaeti oli mas wok wetem ol famli blong oli tijim ol prinsipol blong indipenden laef, mo blong oli kaonsel o toktok long ol adalt long saed blong ol problem olsem, wok, mekem mo folem bajet, o ol jalenj wetem ol famli rilesensip.

Ol bisop oli mas lukluk nomo blong mekem ol yut oli kam strong moa—ol yut ia we oli ol lida we oli stap kam antap we oli blong nekis jeneresen ia—blong oli stap long kavenan rod.

Evri memba oli nidim blong andastanem bigfala jenis ia. ?Be wanem nao ol memba oli save mekem?

Wok wetem presidensi blong kworom blong ol elda mo hemia blong Rilif Sosaeti.

Bae yumi folem ol bigfala prinsipol blong Lavem, Serem mo Invaetem, blong invaetem ol nara man blong oli go long Kraes. Bae yumi wok wetem ol misinari. Bae yumi holem wan tempol rekomen we i laef i stap, mo faenem nem blong ol bubu, mo tekem nem blong olgeta i go long tempol. Bae yumi askem tempol mo famli histri konsalten blong yumi blong oli help.

Trastem presidensi blong kworom mo hemia blong Rilif Sosaeti.

Taem yumi fesem ol jalenj blong gat wok, lukaotem faenens, famli rilesensip, ol pikinini o ol problem blong mared, yumi mas go long presidensi blong kworom blong ol elda, mo hemia blong Rilif Sosaeti fastaem, mo askem help blong olgeta. Oli save givim yumi insperesen, oli save soem rod, mo givim advaes taem we oli stap lukaotem insperesen ia we i kam long ol skripja, hanbuk blong Jos, mo tru long evri dei prea.

Sista Jean B. Bingham, Jeneral Presiden blong Rilif Sosaeti, i givim kaonsel ia: “Ol memba oli no stat wetem bisop, be, bae oli nid blong lan blong stat blong presidensi blong kworom blong ol elda, mo hemia blong Rilif Sosaeti.”²

Wok strong wetem strong tingting blong mekem wok blong givhan.

Folem hanbuk blong Jos, blong givhan, i minim blong givim seves long ol narawan semmak olsem we Sevya i bin mekem (luk long Matiu 20:26–28). Hem i bin lavem, tijim, i bin prea from, i bin kamfotem mo blesem olgeta raon long Hem (luk long Ol Wok 10:38). Olsem ol disaepol blong Jisas Kraes, yumi stap lukaot blong givhan long ol pikinini blong God.

Lod i wantem blong evri memba blong Jos blong Hem blong oli gat semfala kea ia. From risen ia, olgeta we oli kasem prishud, oli kasem wok ia blong stap olsem ol givhan brata long wanwan haos we i gat memba long hem. Ol givhan sista, oli kasem wok blong lukaot long wanwan adalt sista. 0l wok ia we oli givimaot, oli blong meksua se oli tingbaot mo kea long ol memba blong Jos (luk long Moronae 6:4).

Wok ia blong givhan, hem i wan impoten wei blong kipim obei ol komanmen ia blong lavem God mo lavem ol neba blong yumi (luk long Matiu 22:36–40). Mo tu, hem i wan stamba rod blong help blong mekem wok ia blong fasin blong sevem man mo fasin blong kam olsem wan god, i hapen.

Presidensi blong kworom blong ol elda mo hemia blong Rilif Sosaeti oli helpem ol givhan brata mo sista blong lanem olsem wanem blong givhan long ol narawan. Mo tu, oli givim insperesen, oli soem rod, mo oli givim sapot. Oli save mekem hemia long taem blong ol givhan intaviu³, long taem blong ol Sandei miting, mo tu, long ol praevet storian.⁴

Ol brata mo sista. Bae yumi wok strong blong givhan, semmak olsem we Sevya i bin mekem.

Trastem ol givhan brata mo sista.

Elda Paul B. Pieper, Jeneral Atoriti Seventi i givim kaonsel ia: “Mifala i nidim yufala blong trastem ol givhan brata mo sista blong yumi, we God i bin singaotem olgeta mo givimaot wok long olgeta blong helpem yumi. Yumi mas bilivim se, hemia nao fas rod blong Lod, blong kam mo helpem yumi. Yumi nid blong yusum olgeta givhan brata mo sista ia.

“Tufala, God i save mekem tufala i kam antap bigwan, long semfala wei ia we God i stap mekem long ol bisop blong help blong lukluk long ol nid blong ol memba. Yu no nid blong go long bisop blong kasem mo yusum prishud paoa ia.”⁵

Taem yumi stap givim seves olsem ol givhan brata mo sista, yumi save stanemap kingdom blong God long eria blong yumi.

Gohed long ol wok we hom i senta, mo Jos i sapotem.

Olsem wanwan man, woman mo famli, yumi mas gohed blong gat fasin blong lanem gospel insaed long hom. Taem oli mekem skripja stadi long hom, fet we yumi gat long Jisas Kraes, mo ol testemoni blong yumi, bae oli kam strong moa.

Mi testifae se Papa blong yumi long Heven, mo Pikinini blong Hem Jisas Kraes, Tufala i stap lavem yumi mo Tufala i save yumi. Tufala i soem rod long yumi tedei tru long profet we i stap laef, Presiden Russell M. Nelson. Mi mi talem tangkyu tumas from gudgudfala lidasip blong hem mo fasin blong hem blong stap olsem disaepol. Bae yumi trastem mo sapotem ol presidensi blong kworom mo Rilif Sosaeti, mo wok wetem olgeta. Taem yumi mekem olsem, bisop mo bisoprik blong yumi bae i stap blong help blong mekem ol yut blong yumi oli kam strong moa insaed long gospel blong Jisas Kraes.

Long nem blong Jisas Kraes, amen.