Lokol Pej
Fulap Naes Samting Aot long Samting we I Asis
Eli long 2019, Sista Setaita Ata i statem misin blong hem long Joao Pessoa Misin long Not Is Brasil. Sam manis afta, hem i kasem wan bigfala kil long ni blong hem, mo hem i mas gobak long Ostrelia blong i kasem tritmen.
Be hem i wantem finisim misin blong hem yet, mekem se wan yia afta, oli kliarem Sista Ata blong i mekem misinari seves, mo oli sendem hem i go long Melbun Ostrelia Misin. Long Oktoba 2020, hem i kasem wan nara helt jalenj: hed blong hem i soa strong blong plante plante taem.
Wetem soa long bodi blong hem, hem i filim se hem i responsabiliti blong stopem ol kompanion blong hem blong wok long ful paoa blong olgeta. Wetem trabol ia i hevi long tingting blong hem, Sista Ata, i no wantem tumas, be i toktok long misin presiden blong hem, i fraet se bae hem i mas aot long misin eli bakegen.
Be hem i harem i glad tumas taem hem i kasem nius se bae hem i gohed blong givim seves long Lod—se bae oli lukluk long medikol nid blong hem kasem en blong misin blong hem. Taem we Presiden Houghton i eksplenem se hem i save tanem i go long wan Seves Misin, Sista Ata i akseptem kwiktaem, iven bifo hem i save se hemia bae i gud long hem o nogat. Long semfala dei, Elda mo Sista Nicholls, Ol Seves Misin Lida we oli lukluk ova long Ostrelia, oli mit wetem hem tru long Zoom, blong mekem intaviu mo eksplenem ol wok long hem.
Olsem wan Seves Misinari, bae Sista Ata i muv i gobak hom blong gohed blong ol tritmen blong hem, be bae hem i nomo mekem ol evri dei taemtebol blong hem blong mekem prea evri dei, gat skripja stadi, mo mekem eksasaes. Elda mo Sista Nicholls bae i prea, mo bae i tingting long ol paoa we oli blong Sista Ata nomo blong faenemaot bes wei blong hem i tekpat long wok blong mekem Isrel i kam tugeta.
Taem we oli mit bakegen blong wokemaot ol niu wok blong misinari seves blong hem, tufala Nicholls i faenem se Sista Ata i gat naes blesing ia blong gat wan talen wetem art we man i save luk, mo hem i gat bigfala lav mo sore, mo i gat wan fasin we i sofsof mo i strong semtaem. Sista Ata i talem tingting blong hem blong givim seves insaed long tempol, mo afta we oli storian raon long hemia, wetem prea insaed long hat blong olgeta, oli bildimap wan niu asaenmen, we i spesel blong hem:
-
Distrik Lidasip: Sista Ata bae i stap olsem wan lida blong evri seves misinari long distrik blong hem.
-
Art Seves: Bae hem i krietem sam peinting o droing we i givim insperesen blong gat fet long Jisas Kraes mo gospel blong Hem.
-
Tempol Seves: Bae hem i wok long ofis insaed long Ostrelia, Melbun Tempol, blong wan namba blong aoa, evri wik, we oli agri long hem.
Ol Seves Misin, oli bin traem olgeta long YSA mo Kanada, mo hem i wan wei blong ol yang pipol we oli no save givim seves long wan fultaem misinari wok seves, blong oli “givim seves long wan ples we i stret blong olgeta, o stret long talen, skil mo presen we hem i gat.”1 Oli bin traem ol seves misin long Ostrelia long 2020, taem we Elda mo Sista Nicholls i bin finisim lidasip trening blong tufala.
“!Oli brekem evri mol i stap!” Elda Nicholls i eksplenem: “Ol Seves Misinari oli no gat kompanion; oli no laef long wan eria we oli putum i stap we i gat spesifik baondri long hem; oli werem baj blong olgeta nomo taem we oli stap mekem misinari wok blong olgeta.”
Semmak olsem ol seves misinari we tufala i lidim olgeta, misin blong Elda mo Sista Nicholl i wan nomolwan nomo. Tufala i stap long hom blong tufala long Gol Kos long Kwinslan, mo tufala i kea long ol misinari we oli stap laef plante taosen kilometa long tufala. Tufala i lukaotem ol janis blong givim seves—insaed long Jos mo insaed long komuniti—mo tufala i tingting ‘aotsaed long bokis’ blong maredem ol talen mo wanem we i strong long wanwan misinari, i go wetem wan spesifik nid.
Sista Ata i talem: “Mi save se mi gat talen long saed blong art, be mi no bin yusum blong wan longfala taem. Naoia, mi luksave se Papa long Heven i wantem mi blong yusum art blong givim seves long ol narawan.”
Taem hem i tingting long ol helt problem we oli bin stopem misin blong hem long stat, Sista Ata bae i no save jusum ol jalenj ia blong hemwan, be hem i save se, naoia, hem i stap kasem ‘fulap naes samting aot long samting we i asis’.2
“Transfea blong mi i go long seves misin i bin helpem mi blong luksave wanem we Papa long Heven i bin givim long mi,” hem i ademap. “Wan bigfala pat blong seves misin blong mi, i blong mekem tingting blong Lod mo blong askem samting long Hem. I gobak long wan lesen long Kam Folem Mi: sapos yu wantem, long hat blong yu, blong givim seves, nao yu askem Lod, mo bambae Hem i lidim yu blong save wanem blong mekem, mo olsem wanem blong givim seves.”