Fet blong Wan Mama

Nem blong mama blong mi, hem i Tatiafogaega Tausagafou Brown-Fuimaono.

Taem hem i bin yang, Tatia i bin laef long wan smol faleo’o (haos) wetem famli blong hem long Matautu Lefaga, Samoa. Papa blong hem, Palauni Brown, i wan memba blong Jos Ia blong Jisas Kraes Ia blong Ol Lata-dei Sent, be hem i no bin aktiv long Jos blong longtaem smol. Tatia i tingbaot se papa blong hem bae i leftemap tingting blong waef blong hem mo ol faevfala pikinini (long tetaem ia) blong go long Jos, iven sapos hem i no go long Jos.

Mama blong Tatia i wan strong memba blong Kongregesen Kristin Jos blong Samoa (EFKS). Taem ol misinari blong jos blong hasban blong hem bae oli go visitim haos blong olgeta, mama ia i neva wantem storian gud wetem olgeta, be hem i bin akseptem jalenj blong olgeta blong ridim Buk blong Momon. Buk ia i mekem hem i wari smol, mo i no longtaem afta—i nomata hem i no wantem tekem ol misinari lesen—mama blong Tatia i stap ridim Buk blong Momon evri dei.

Wan dei, mama blong Tatia i talem hem blong pikimap sam bigfala flat ston blong holem ol en blong moskito net blong olgeta. Tatia i obei, mo i go long fored blong haos, be bifo hem i pikimap wan ston, wan samting i mekem hem nao hem i foldaon.

Mama blong hem i ron i go long hem, mo i singaot strong. Tatia i kolkol finis mo i waet, mo i no pulum win. Nekis tingting i kam long maen blong mama blong hem i blong singaotem ol elda: ol misinari blong jos blong hasban blong hem.

Taem ol elda oli kasem haos, Tatia i nomo muv blong sam minit finis. Kwiktaem ol misinari oli givim hem wan blesing blong hiling, mo taem hem i stat blong wekap, Tatia i tingbaot se voes blong wan long ol Elda i talem: “Mama, yu no wari. Bae hem i oraet. Papa long Heven i gat wan wok blong hem i mekem. Yu mo ol pikinini blong yu, bae yufala i kasem blesing from bilif blong yufala.”

Stat long dei ia i go, mama blong Tatia i testifae abaot taem ia—merikel hiling blong pikinini blong hem—i konfemem long hem se Buk blong Momon i tru, se Jos Ia blong Jisas Kraes blong Ol Lata-dei Sent i tru, mo prishud ia blong God, i tru. Hem i bin baptaes long 1959, mo i spendem haf laef blong hem blong mekem wok blong Lod, speseli blong mekem Isrel i kam tugeta long tugeta saed blong vel.

Bifo hem i pasawe long 2019, taem hem i gat 90 yia, mama blong Tatia i bin kasem blesing blong witnesem profesi ia blong Elda i kamtru. Hem i bin gat naen pikinini, mo evriwan oli bin kam ol strong aktiv memba blong Jos, mo sikis long olgeta oli bin go long ol misin. Olgeta pikinini ia tu oli lukaotem ol stret pikinini blong olgeta insaed long Gospel blong Jisas Kraes, mo wan nara jeneresen blong Ol Ol Lata-dei Sent oli save talem tangkyu long bubuwoman blong givim wan janis blong ridim Buk blong Momon.

Olsem gel blong Tatia insaed long stori ia, mi stap insaed long jeneresen ia. Nem blong mi i Foketi, mo mi bin groap wetem bubuwoman Foketi Masane Le Mamea-Brown, we i pasem nem blong hem i kam long mi, be tu, i givim mi wan ful laef blong lav mo fasin blong lanem samting. Bubuwoman blong mi—’Ma’—i bin givim seves wetem strong tingting long hom, mo semtaem, hem i mekem fulap wok long ol defren koling blong Jos, mo mi bin witnesem kwaet fet blong hem long aksen evri dei. Hem i bin tijim mi blong gat lav mo sore, blong sakrifaes, blong wok had, blong givim seves mo no selfis, mo ol merikel blong save go long tempol evri dei.

Tru long Ma, mi bin lanem blong obei, blong mi ones blong pem wan ful taeting, mo rere from eni samting, blong stap prea oltaem, mo blong gat lav we i no gat en. Mi prea se bae mi laef oltaem long wei blong testemoni blong fet dia bubuwoman blong mi, we hem i bin lego long mi.