Faaipoipoga Faaselesitila

Ou uso e ma tuafafine pele, ou te matua faafetai lava mo outou taitoatasi. Ua tatou taufai lagonaina se agaga o le faafetai mo le talalelei a Iesu Keriso. I lenei lalolagi ua tumu i le faanoanoa, tatou te matua faafetai lava mo le “ata sili o le fiafia”¹ a le Atua. Ua tautino mai i Lana fuafuaga e faapea ua i ai alii ma tamaitai “ina ia latou maua le olioli.”² O lena olioli e maua pe a tatou filifili e ola e tusa ai ma le fuafuaga e faavavau a le Atua.

E mafai ona faapupula le taua o le filifiliga i se manatu faigofie na oo mai i le mafaufau i se tasi aso, ina o fai sa’u faatau i se faleoloa tele. Ou te faaigoaina “o mamanu a le tagata faatau.” Ona o faatauga o se vaega o o tatou olaga i aso taitasi, atonu ai tou te masani i nei mamanu.

O tagata faatau popoto, e suesue lelei ia latou filifiliga a o lei faia se faaiuga. E muamua lava ona latou taulai atu i le lelei ma le anagata o se oloa e manao ai. Latou te mananao lava i le mea sili. I se faatusatusa atu i ai, o isi tagata faatau e vaavaai mo oloa taugofie, o isi foi atonu e soona faaaluvale tupe, ae iloa mulimuli ane—ua faanoanoa ina ua iloa mulimuli ane e le lelei mea na latou filifilia. E faanoanoa foi, aua e i ai tagata e le taatele, latou te faatuatuanai i lo latou amiosa’o patino ae faagaoi mea latou te mananao ai. Tatou te faaigoaina i latou o le au tagovale.

E mafai foi ona faatatau ia mamanu a le tagata faatau i le ulutala o le faaipoipoga. O se alii ma se tamaitai ua uluitino le alofa, e mafai ona filifilia se faaipoipoga e aupito maualuga le uiga auaumama po o se ituaiga e maualalo ifo o le a le tumau. Pe mafai foi ona latou le filifilia se tasi o ia ituaiga e lua, ae faagaoi ma le le popoi le mea ua latou mananao ai e faapei o “le au tagovale i aia tatau faaipoipo.”

O le mataupu o le faaipoipoga o loo felafolafoai ai le lalolagi atoa, lea ua i ai faatulagaga eseese mo le nonofo faaipoipo. O la’u manulauti e talanoa atu ai e uiga i lenei autu, o le tautino atu lea i le avea ai ma se Aposetolo a le Alii,³ o le faaipoipoga i le va o se alii ma se tamaitai e paia—ua faauuina e le Atua.⁴ Ou te faamautinoa atu foi le lelei silisili o se faaipoipoga i le malumalu. O le ituaiga faaipoipoga aupito mautu lea e mafai e lo tatou Foafoa ona ofo mai i Lana fanau.

E ui o le faaolataga o se mataupu e patino i le tagata, ae o le faaeaga o se mataupu faaleaiga.⁵ E na o i latou ua faaipoipo i le malumalu ma ua faamauina a latou faaipoipoga e le Agaga Paia o Folafolaga, o le a faaauau ona avea ma taitoalua pe a mavae le oti⁶ ma mauaina le vaega aupito maualuga o le mamalu faaselesitila, po o le faaeaga. Ua faaigoa foi se faaipoipoga i le malumalu o se faaipoipoga faaselesitila. O totonu o le mamalu selesitila e tolu faatulagaga. Ina ia maua le faatulagaga aupito maualuga, e tatau ona faamauina se tane ma se ava mo le olaga nei ma le faavavau atoa ma tausia a laua feagaiga na osia i se malumalu sa.⁷

O le faanaunauga aupito maualuga o le loto o le tagata o se faaipoipoga e mafai ona tumau pe a mavae le oti. O le faamaoni i se faaipoipoga i le malumalu na te faia le mea lena. E mafai ai e aiga ona mafuta e faavavau.

O lenei sini e mamalu. O gaoioiga uma a le Ekalesia, o siitaga, o korama, ma vasega, o auala ia i le iuga o se aiga faaeaina.⁸

Ina ia maua lenei sini, ua toefuatai mai e lo tatou Tama Faalelagi ia ki o le perisitua i lenei tisipenisione, ina ia mafai ai ona faia sauniga taua o Lana fuafuaga i le pule tatau. O avefeau faalelagi—e aofia ai Ioane le Papatiso; ⁹ Peteru, Iakopo, ma Ioane;¹⁰ Mose, Elaia, ma Elia¹¹—auai i le faatinoina o lena toefuataiga.¹²

Ua salalau atu i le lalolagi le silafia e uiga i lenei upumoni ua faaalia.¹³ O i matou, o ni perofeta ma aposetolo a le Alii, ua toe folafola atu foi i le lalolagi “o le aiga o le totonugalemu lea o fuafuaga a Le Foafoa mo le taunuuga e faavavau o Lana fanau.”⁴

Ua matou folafola atu foi “o tagata soifua uma—tane ma le fafine—ua foafoaina i le faatusa o le Atua. O i tatou taitoatasi o se atalii po o se afafine faaleagaga faapelepele a ni matua faalelagi ma o lea ua tofu ai i tatou taitoatasi ma se natura ma se taunuuga paia. O le tulaga tane po o le fafine (o le tagata) o se vaega taua lea o le muai olaga, olaga faitino, ma lona faamoemoe e faavavau.

“I le muai olaga, sa iloa ma tapuai atalii ma afafine faaleagaga o le Atua o lo latou Tama e Faavavau, ma sa [latou] talia Lana fuafuaga e mafai ai e Lana fanau ona maua ni tino faaletino ma le tomai faalelalolagi latou te maua ai le atoatoaga ma iloa tino ai o latou taunuuga paia o ni suli o le ola e faavavau. O le fuafuaga [tele a le Tama Faalelagi] o le fiafia, ua mafai ai ona faaauau fegalegaleaiga faaleaiga i tala atu o le tuugamau. Ua mafai i sauniga paia ma feagaiga ua maua i malumalu paia ona toe foi atu ai tagata taitoatasi i le afioaga o le Atua ma toe faatasia aiga e faavavau.”¹⁵

O lena folafolaga i aiga ua fesoasoani ia i tatou e iloa ai, o le faaipoipoga faaselesitila e maua ai avanoa sili atu mo le fiafia nai lo se isi lava sootaga.¹⁶ Na foafoaina le fogaeleele ma sa toefuataiina lenei Ekalesia ina ia mafai ai ona faatulaga aiga, faamauina, ma faaeaina e faavavau.¹⁷

Ua tautino mai e tusitusiga paia “e tusa ai ma le tulafono e tatau [i se tane] se ava e toatasi, ma ia avea ai i la’ua ma tino e tasi, ina ia faataunuuina ai e le lalolagi i nei mea uma le iuga o lona foafoaga.”¹⁸ Ua faamautu mai e le isi “e leai se tane pe a le o i ai se fafine, e leai foi se fafine pe a le o i ai le tane, i le Alii.”¹⁹ O le mea lea, o le faaipoipoga ua le gata o se mataupu faavae faaeaina o le talalelei; ae o se poloaiga faalelagi.

Ua tautino mai e lo tatou Tama Faalelagi, “O la’u galuega ma lo’u mamalu lenei—ia faataunuu le faaofuina o le tagata i le tino ola pea ma le ola faavavau.”²⁰ O le Togiola a Lona Alo Pele ua mafai ai ona iloa nei faamoemoega e lua. Ona o le Togiola, ua avea ai ma mea moni mo tagata uma le tino ola pea—po o le toetutu mai le oti.²¹ Ona o le Togiola foi, ua avea ai le ola faavavau—o le ola lea e faavavau i le afioaga o le Atua, le “meaalofa silisili o meaalofa uma a le Atua”²²—ma se mea e mafai ona taunuu. Ina ia agavaa mo le ola faavavau, e tatau ona osia se feagaiga faavavau, faavavau lava ma lo tatou Tama Faalelagi.²³ O lona uiga, o se faaipoipoga i le malumalu e le gata i le va o se tane ma se ava; e fusia ai se faiga paaga ma le Atua.²⁴

O loo faamanatu mai foi ia i tatou e le folafolaga i aiga o le “tane ma le ava ua i ai le tiutetauave paia e alofa ma tausi e le tasi le isi.”²⁵ O fanau e fananau mai i lena mafutaga “o se tofi lea mai le Alii.”²⁶ A faamauina se aiga i le malumalu, e mafai ona faavavau lena aiga e pei foi o le malo o le Atua lava ia.²⁷

O lena taui e manaomia ai mea e sili atu nai lo le na o se moomooga ia taunuu. E i ai taimi, ou te faitau ai i faasilasilaga o maliu i nusipepa, i se faamoemoega o se maliu talu ai nei, o le a toe tuufaatasia ai lena tagata ma se toalua ua maliu, ae o le mea moni, latou te lei filifilia le faaiuga e faavavau. Ae, na latou filifilia se faaipoipoga e aoga i le na o le taimi sa ola ai. Na ofoina atu ia i laua e le Tama Faalelagi se meaalofa faalelagi, ae sa la teena. O le teenaina la o le meaalofa, ua la teena ai foi Le na foai maia le meaalofa.²⁸

O se tasi o fuaiupu malosi, o se mau o loo maioio lelei mai ai lava le eseesega o le moomooga ia taunuu ma le upumoni faavavau: “O feagaiga, folafolaga, … tiute, tautoga, tautinoga, … po o faamoemoega uma, e le faia ma osia ma faamaufaailogaina e le Agaga Paia o le folafolaga, e le ua faauuina, mo lenei olaga ma le faavavau, … e le aoga, pe lelei pe a mavae le toetutu mai le oti; aua o folafolaga uma e le faia i lenei iuga, o le a gata pe a oti tagata.”²⁹

O nei upumoni ua tamau. E valaaulia e tagata o lenei Ekalesia tagata uma ia aoaoina ma ia agavaa mo le ola e faavavau.³⁰ Tatou te valaaulia tagata uma ina ia maua le faatuatua i le Atua le Tama Faavavau ma Lona Alo o Iesu Keriso, ia salamo, ia maua le Agaga Paia, ia maua faamanuiaga o le malumalu, ia osia ma tausia feagaiga paia, ma ia tumau e oo i le iuga.

Ma le alofa mutimutivale, o le fuafuaga sili o le fiafia a le Atua ma ona faamanuiaga e faavavau, e mafai ona oo atu ia i latou e lei mauaina le avanoa e faalogo ai i le talalelei i le olaga nei. E mafai ona faia sauniga o le malumalu mo i latou e nisi o loo ola e avea ma tagata sui.³¹

Ae faapefea le toatele o tagata matutua o le Ekalesia e le o faaipoipo? Ona e le o so latou faatamala, latou te taulimaina na o i latou ia faigata o le olaga. Ia tatou taufai manatua, i le ala ma le taimi a le Alii lava ia, e leai se faamanuiaga o le a taofia mai Ana Au Paia faamaoni.³² O le a faamasinoina e le Alii ma taui atu tagata taitoatasi e tusa ai ma ona manaoga o le loto faapea foi taga faatino.³³

O le taimi nei, o le le malamalama o le tagata e mafai ai ona tulai mai faafitauli i se faaipoipoga. O le mea moni, o faaipoipoga taitasi, e amata i tagata e toalua e i ai pona. E aofia ai tagata e toalua e le atoatoa. E mafai ona oo mai le fiafia ia i laua e ala i a laua taumafaiga faamaoni. E pei lava ona maua se leogatasi malie mai se aufaili pe a faia e ona tagata se taumafaiga tuufaatasi, e faapena foi le ogatasi i se faaipoipoga e manaomia ai se taumafaiga tuufaatasi. O lena taumafaiga o le a manuia pe afai e tuuitiitia e tagata taitasi o le soa ona lava manaoga faaletagata ae faateleina faatinoga alofa o le le manatu faapito.

Na saunoa Peresitene Thomas S. Monson: “Ina ia maua le fiafia moni, e tatau ona tatou sailia i le taulai atu lea i se isi mea ae le o i tatou lava. E leai se tasi na aoaoina le uiga o le ola sei vagana ua ia faalotomaualalo ia lava ina ia auauna atu ai i uso a tagata. O le auauna atu i isi e pei o le tiute—o le faataunuuina e aumaia ai le olioli moni.”³⁴

O le sologa malie o se faaipoipoga e maua pe a maualuga le manatu o se tasi e avea le soifua sololelei o lona toalua ma se tasi o faamuamua aupito maualuga. A tupu moni lena mea, ona avea lea o le faaipoipoga faaselesitila ma mea e moni, e maua ai le olioli i lenei olaga ma le olaga a sau.

O le fuafuaga o le fiafia a le Atua, ua mafai ai e i tatou ona filifili mo i tatou lava. E pei o mamanu a le tagata faatau, e mafai ona tatou filifilia le faaipoipoga faaselesitila po o isi ituaiga i lalo ifo.³⁵ O nisi filifiliga faalefaaipoipoga e taugofie, o nisi e taugata, o nisi foi e faapopoto e le tiapolo. Ia faaeteete i ana filifiliga; e pogai mai ai le faanoanoa!³⁶

O le filifiliga sili lava o se faaipoipoga faaselesitila. Faafetai, pe afai sa faia muamua se filifiliga e maualalo ifo, e mafai ona faia nei se filifiliga e siitia ai i le filifiliga aupito sili. E manaomia ai se suiga tele o le loto³⁷ ma se faaleleia tumau faaletagata lava ia.³⁸ O faamanuiaga e maua mai [i le suiga tele o le loto] o ni taumafaiga aoga uma lava na.³⁹

O le iloaina atoatoa o faamanuiaga o se faaipoipoga i le malumalu, e toetoe lava ina le oo i ai lo tatou malamalama faaleolaga nei. O lena faaipoipoga o le a faaauau pea ona tupu i le lalolagi selesitila. O iina e mafai ai ona faatoatoaina i tatou.⁴⁰ E faapei ona mauaina e Iesu le atoaga o le mamalu o le Tama,⁴¹ e faapena foi i tatou ona “o mai i le Tama … ma i le taimi ua tatau ai ona maua lea o lona atoatoaga.”⁴²

O le faaipoipoga faaselesitila o se vaega taua o le sauniuniga mo le ola faavavau.E manaomia ai le faaipoipo o se tagata i le tagata sa’o, i le nofoaga sa’o, e le pule sa’o, ma ia usiusitai ma le faamaoni i lena feagaiga paia.⁴³ Ona mafai lea ona faamautinoa le faaeaga i le malo selesitila o le Atua. Ou te molimau atu ai i le suafa o Iesu Keriso, amene.