Tāhō’ēhia ’ei tuahine ’e ’ei taea’e i roto i te Mesia

Hōho’a

mau tāne ’e mau vahine tei putuputu i roto i te hō’ē rurura’a ’āpo’ora’a

E mea tītauhia te reo o te mau vahine ’e te mau tāne nō te fa’aoti i te ’ohipa a te Fatu. Noa atu te ’ōtahi, tē tū’ati nei tātou te tahi ’e te tahi, tāhō’ē i roto i tā tātou ’ōpuara’a ’āmui ’ia riro ’ei pipi nā te Mesia.

’Eiaha tō tātou mau ta’a-’ē-ra’a ’ia ha’afifi i teie ’ōpuara’a. Terā rā, tei roto tō tātou mau ta’a-’ē-ra’a i tō tātou mau tārēni ’e tā tātou mau hōro’ara’a ’ia ’āmuihia, e ha’apūai i tō tātou hope’ara’a i roto i te ’ohipa nō te fa’aorara’a ’e te fa’ateiteira’a ’ati a’e te ao nei. Teie tā Elder Gerrit W. Gong nō te pupu nō te Tino ’Ahuru ma Piti ’āpōsetolo i papa’i i roto i teie ve’a, « e rave tātou i te mau fa’aotira’a maita’i a’e ’e e manuïa rahi a’e tātou i roto i te ’ohipa a te Fatu, mai te mea e ha’afaufa’a tātou i te mau hōro’ara’a a te tahi ’e te tahi, ’e e ’ohipa ’āmui, te mau taea’e ’e te mau tuahine, i roto i tāna ’ohipa » (’api 4). Nāhea e tātou e tae ai i teie huru tāhō’ēra’a ? E ti’a ’ia vai tō tātou fa’aro’o ē, e nehenehe te Fatu e ’ohipa ’e tō tātou mau ta’a-’ē-ra’a nō te maita’i i roto i tōna bāsileia.

I roto i tā’u parau pāpa’i ve’a i te ’api 8, tē fa’a’ite nei au i te mea tā’u i ’apo mai nā roto mai i te ’ā’amu o te Faufa’a ’Āpī nō ni’a i te vahine nō Kana’ana, tei ’imi i te Fa’aora nō te fa’aora i tāna tamāhine. E ’ere teie vahine nō te ’utuāfare o ’Īserā’ela. Terā rā, e fa’aro’o tōna ē, e nehenehe te mana o te Fatu e fa’aora i tāna tamari’i, ’e nā teie fa’aro’o fa’ahiahia tei tāhō’ē iāna ’e te mau ta’ata nō te fafaura’a ’e ’ua fa’atupu te reira i te temeio.

E mata nā tātou i te hi’o i te Fa’aora i roto i te mau mea ato’a tā tātou e rave, « ma te tāhō’ē mai i tō [tātou] ’ā’au i roto i te tāhō’ēra’a ’e i roto i te here te tahi i te tahi » (Mosia 18:21). Tē fāna’o nei tātou i te ha’api’i mai i te mau ta’a-’ē-ra’a pūai o te tahi ’e te tahi ’e ’ia ha’afaufa’a i te reira mai tā te Mesia e nā reira nei. ’Auē ho’i tō’u māuruuru ’ia fāri’i i te hō’ē tīa’i māmoe ’o tē fa’aro’o nei i te mau reo hō’ē roa o tāna mau māmoe tāta’itahi.

Ma te here mau,

Peresideni Camille N. Johnson

Peresideni rahi nō te Sōtaiete Tauturu