Bāpetizora’a i te pō mahana pae

Hōho’a

vahine e ti’a ra i mua i te fare purera’a

Fa’ahōho’ara’a nā Katy Dockrill

I muri a’e i te ’ana’anataera’a mātāmua nō te haerera’a mai i te fenua Marite nā te fenua Taina mai, nō te fāri’i i tā’u parau tū’ite PHD, ’ua māere roa vau i te mau parau e rave rahi nō te ha’api’ira’a tā’u e ti’a ’ia tai’o ’e ’ia pāpa’i. ’Ua pāpū ’ore ato’a vau nō te ravera’a i te ’ohipa i pīha’i iho i tō’u tauturu ha’api’ira’a, tei fa’arahi atu ā i tō’u mana’o hepohepo. ’Ua tae mai te mana’o mo’emo’e ’e te ’ōtahi, ’e ’aita vau i ’ite e aha te mea e rave.

’Ua fa’aoti a’era vau ē, ’ua fa’atupu tā’u mau hapehape tahito i tō’u māuiui ’e ’ua ti’a iā’u ’ia tātarahapa. E pō te reira taime, nō reira ’ua ’imi au « te fare pure » i ni’a i te ’itenati. ’Ua ’itehia mai iā’u ē, ’o Te ’Ēkālesia a Iesu Mesia i te Feiā Mo’a i te mau Mahana Hope’a nei ana’e te ’ēkālesia e matara ra e tae roa atu i te hora 9 i te pō. Ma te fa’a’oti e haere e tātarahapa i te fare pure, ’ua ha’amata vau i te haere ’āvae nō te hō’ē hora te roa.

I tō’u taera’a i te fare purera’a i te hora 6 i te pō, ’ua ’ite atu vau i te mau mōrī ’e ’ua fa’aro’o atu vau i te mau reo ’ata’ata ’e te pehe nō roto mai. ’Ua fa’a’ati au i te fare, ’aita rā i ’itehia mai iā’u te ’ōpani. Nā roto i te māramarama, ’ua ’ite atu vau i te hō’ē metua tāne i te ha’utira’a ’e tāna tamaiti i roto i te hō’ē o te mau piha. ’Ua pātōtō atu vau i ni’a i te ha’amāramarama nō te haru mai i tōna ara māite. ’Ua fa’atoro mai ’oia iā’u i te ’ūputa, ’ua fāri’i poupou mai iā’u i roto, ’e ’ua parau mai iā’u ē, tē bāpetizohia ra te hō’ē ta’ata.

’Ua pe’e atu vau i tāna arata’ira’a ’e ’ua tomo atu vau i roto i te hō’ē piha, i reira te hō’ē tāne i te hōro’ara’a i te hō’ē ha’amaita’ira’a i te hō’ē tamaiti tei bāpetizo-noa-hia iho nei. I tō’u ti’ara’a i pīha’i iho i te ’ūputa, te fa’aro’ora’a i te pure ha’amaita’ira’a, ’ua ’ite a’era vau ē, tē muhumuhu ato’a mai ra te Atua i te mau ha’amaita’ira’a iā’u. ’Ua māhanahana tō’u ’ā’au, ’e ’ua ’ite au i te mea tā’u i ha’api’i mai i muri a’e, tei pi’ihia te Vārua Maita’i. ’Ua fa’aro’o ato’a vau i te hō’ē reo i te paraura’a ē, ’ua fa’a’orehia tā’u hara.

I muri a’e i te bāpetizora’a, ’ua putuputu atu vau ’e vetahi o rātou ’e ’ua fārerei atu e rave rahi mau ta’ata maita’i. ’Aita vau i vai ’ōtahi noa. ’Ua pūpū mai te hō’ē ta’ata tei fa’a’ite iāna iho, ’o ’oia te « peresideni ’āma’a » e fa’aho’i iā’u i te fare. E rave rahi ’āva’e i muri mai, i muri a’e i te mau ha’api’ira’a a te mau misiōnare, ’ua bāpetizohia vau.

I te mahana o tō’u bāpetizora’a i te matahiti 2018 i Cambridge, Massachusetts, ’ua fa’ati’a te hō’ē taea’e e mea nāhea tō te Metua here i te ao ra, fa’anahora’a i te bāpetizora’a i taua mahana pae ra. ’Ua fa’ata’a mai ’oia ē, ’ua fa’ata’ahia te bāpetizora’a i te sābati nō muri iho, nō te hō’ē rā mārōra’a i ni’a i te hora, ’ua tārenahia te reira nō te pō mahana pae. ’Āhiri ’aita teie tauira’a, e’ita roa paha vau e ’ite i te ’Ēkālesia, tō tātou Fa’aora ’e tō tātou Metua i te ao ra, ’e tō’u mau taea’e ’e mau tuahine i roto i te ’evanelia.