Mau i’oa i roto i te fare tāpe’ara’a

E misiōnare hi’ora’a maita’i te tuahine Aketzaly Llanos ’e te hō’ē ’itera’a pāpū ’āueue ’ore. ’Ua nā mua ’oia i te tonohia i te misiōni nō Costa Rica San José hiti’a o te rā, ’ua tāvini rā ’oia ’e tā’u vāhine fa’aipoipo ’o Janeen ’e o vau nei i roto i te misiōni nō Mehiko Aguascalientes, hō’ē matahiti hou ’oia ’a fāri’i ai i tāna visa nō Costa Rica.

I te ’āva’e ’Ēperēra 2022, ’ua aroha atu mātou i te tuahine Llanos ’a pa’i’uma ai ’oia i ni’a i te manureva nō te ’oire nō Mehiko, i reira ’oia e rave atu ai i te tahi atu manureva nō Costa Rica. ’Aita i tae’ahia e 24 hora i muri a’e i tō mātou arohara’a, te ta’i mai nei te niuniu a te muto’i nō te ’oire nō Mehiko.

Tē parau rā rātou, « ’ua tāpe’a mātou ia Aketzaly Llanos i te taura’a manureva nō te mea tē vai ra hō’ē ’ōfa’i pūpuhi a te faehau i roto i tāna mau tauiha’a ». « E hara rahi teie i te pae o te ture, ’e e fa’autu’ahia ’oia ».

’Oi’oi roa vau i te niuniura’a i te piha tōro’a a te ’Ēkālesia i te pae o te ture, ’e ’ua tihēpu mai rātou i te hō’ē pāruru ture, nō te tītau ’ia tu’uhia mai te tuahine Llanos i rāpae. E ’ere teie pāruru i te melo nō te ’Ēkālesia. ’Ua fafau ’oia e tauturu ia mātou, ’ua fa’a’ite mai rā ’oia i tōna mana’o ti’aturi ’ore. ’Ua fa’ata’a mai ’oia ē, e hara rahi ’ia ’itehia hō’ē ’ōfa’i pūpuhi a te faehau i ni’a i te hō’ē ta’ata e ’ere i te fa’ehau, noa atu e aha te huru mana’o o te ta’ata.

I muri iho, ’ua parau mai te tuahine Llanos ia māua ē, ’ua ’ohi mai ’oia i te ’ōfa’i pūpuhi i ni’a i te purūmu o tāna vāhi tāvinira’a hope’a. ’Ua mana’o ’oia e tāpe’a mai i te reira ’ei tao’a fa’aha’amana’ora’a. Inaha ho’i, e au ra te ’ōfa’i pūpuhi mai te mau tao’a fa’aha’amana’ora’a e ho’ohia i rāpae’au i te heri [mine] moni, i roto i te hō’ē o tāna mau vāhi tāvinira’a nā mua a’e. ’Āre’a rā, ’ua fa’ariro te mau ta’ata tītorotoro a te hau iāna ’ei ta’ata ’ohipa ’ī’ino. Tau mahana noa i muri iho, ’ua hōpoihia te tuahine Llanos mai te fare tāpe’ara’a a te taura’a manureva i te hō’ē fare tāpe’ara’a pāruru-teitei-hia, i reira te mau ta’ata hara ’ī’ino roa a’e e tāpe’ahia ai.

’Ua ha’amata ’oi’oi te mau pure, ’ia tu’u-vitiviti-hia mai te tuahine Llanos i rāpae. Ani atu ra māua Janeen i nā 115 misiōnare e tāvini rā i roto i tā māua misiōni ’ia fa’a’ohipa i te fa’aro’o, e ti’a ia mātou ’ia ’ite i te hō’ē temeio, mai te mea ’o te hina’aro te reira o te Fatu. ’Ua niuniu atu vau i te mau peresideni misiōni i Mehiko City, te misiōni nō Costa Rica San José hiti’a o te rā, ’e te Pū Ha’api’ipi’ira’a Misiōnare nō Mehiko, ’e ’ua ani rātou i tā rātou mau misiōnare ’ia ’āmui mai ia mātou nō te pure.

Hōho’a

tuahine misiōnare

I roto i te mau papa’i o te fare tāpe’ara’a, ’aita te tuahine Llanos i ha’amo’e noa a’e i tāna pi’ira’a ’ei ti’a nō Iesu Mesia. ’Ua ha’api’i ’oia i tōna nā hoa fare tāpe’ara’a e iva ’ia pure, ma te hōro’a tāpupu i te mau pure i te po’ipo’i ’e i te pō i te mau mahana ato’a. ’Ua ha’api’i ato’a ’oia ia rātou nō ni’a i tō rātou ihota’ata hanahana.

Hō’ē o tōna mau hoa mau ’āuri ’ua parau, « e ta’ata ’ino roa vau nō te mau mea tā’u i rave i tae mai ai au i’ō nei, ’e ’ua riri roa te Atua iā’u ». ’Ua hi’o noa te tuahine Llanos iāna i roto i te mata ma te parau ē, « ’Aita. E ’ere ’oe i te ta’ata ’ino. E ta’ata ’oe tei rave i te hō’ē ’ohipa ’ino. E tamāhine rā ’oe nā te Atua, ’e ’ua here ’oia ia ’oe ! »

Te tahi ato’a hoa mau ’āuri, ’ua fa’ati’a mai i te moemoeā tāna i fāri’i tau hepetoma hou te tuahine Llanos ’a tāpe’ahia ai. ’Ua moemoeā te hoa mau ’āuri i te hō’ē manu quetzal i te rerera’a mai i roto i te fare tāpe’ara’a nō te tauturu iāna. Hou te tuahine Llanos ’a tomo mai ai i roto i te ’Ēkālesia, ’ua tatauhia te hō’ē hōho’a nō te manu quetzal i ni’a i tōna tua. I te ’itera’a te hoa mau ’āuri i te tatau, i reira tōna ’ite-pāpū-ra’a ē, e ti’a iāna ’ia fa’aro’o i te parau poro’i misiōnare a te tuahine Llanos.

’Ua ha’api’i atu te tuahine Llanos iāna i te fa’aho’i-fa’ahou-ra’a-hia mai te ’evanelia a Iesu Mesia ’e ’ua hōro’a iāna i te Buka a Moromona ’o tāna i ’āfa’i nā muri iho iāna i te fare tāpe’ara’a—terā buka tā te mau tuahine misiōnare i hōro’a i te tuahine Llanos, a pae matahiti nā mua atu, ’a tītorotoro ai ’oia nō ni’a i te ’Ēkālesia.

’Ua tārena-’oi’oi-hia te hō’ē ha’avāra’a mātāmua i Mehiko City. ’Ua haere tino atu māua Janeen nō te fa’a’ite pāpū. I tō māua fārereira’a atu i te pupu pāruru ture i rāpae i te fare ha’avāra’a, ’ua taiā ri’i te pāruru ’ia hi’ohia atu, ma te tere noa tōna ’āvae i terā poro ’e terā poro.

’Ua rave mai au iāna i te hiti ma te parau atu ē : « I teie mahana, e vai hau noa ’oe ’e e fāri’i ’oe i te hau mai tā ’oe i ’ore a’enei i fāri’i i roto i te hō’ē tiripuna. E parau atu vau ia ’oe e aha te tumu. Hau atu i te 500 misiōnare ’e tō rātou mau ’utuāfare, tē pure nei nō ’oe ’e ’ia manuia ’oe i teie mahana. Tē pure ato’a nei rātou ’ia tāmarū i te ’ā’au o te ha’avā ’e ’ia tu’u ’oia i te tuahine Llanos i rāpae i te fare tāpe’ara’a ».

’Ua tahe te roimata o te pāruru ture ’e ’ua fa’a’ite mai i tōna māuruuru nō te fa’aro’o ’e te mau pure a teie mau ta’ata i rave nōna.

I te hora 10:00 i te po’ipo’i, ’ua ha’amata te ha’avāra’a, ’ua tītauhia rā iā’u e tīa’i i rāpae ē tae roa i tō’u taime nō te fa’a’ite i tō’u ’itera’a pāpū. E piti hora roa i mā’iri. I muri iho, ’ua haere mai te mūto’i o te ha’avāra’a i rāpae ’e ’ua parau mai ’aita te ha’avā e tītau ’ia fa’aro’o i tō’u ’itera’a—’ua rave a’ena ’oia i tāna fa’aotira’a.

Ma te pe’ape’a, ’ua tomo atu vau i roto i te piha ha’avāra’a, ’e ’ua ha’amata te ha’avā i te parauparau. Tē parau ra ’oia nō ni’a i te ture tā te tuahine Llanos i ’ōfati, ’e te mau parira’a rahi tāna i fa’aruru.

« Noa atu te reira mau mea ato’a » ’ua parau ’oia, « tē ti’aturi nei au e mea maita’i teie mau ha’apāpūra’a i vauvauhia a’e nei nō te tuahine Llanos ». I muri iho, ’ua fa’ahiti mai ’oia i te hō’ē tuha’a nō tōna mana ’ia au i te ture ’o te fa’ati’a iāna, ’ia fa’a’ore i te parira’a ’e ’ua tu’u ’oi’oi ’oia iāna i rāpae.

Hōho’a

tuahine misiōnare ’e te vāhine fa’aipoipo a te peresideni misiōni

« Te Atua i pīha’i iho iā’u »

Teie te temeio tā mātou i fāri’i ! ’Aita ’oia i fa’autu’ahia e maha ’aore rā hau atu matahiti tāpe’ara’a, ’ua ti’amā te tuahine Llanos ’ia haere. I muri a’e i te ha’avāra’a, ’ua parau mai tōna pāruru ē, ’ua riro taua mahana ra ’ei mahana faufa’a mau nō tōna tōro’a ’ei pāruru ture.

« ’Ua ’ite pāpū mau vau i te Atua i pīha’i iho iā’u », ’ua parau ’oia. « Tē hina’aro nei au e ha’api’i rahi mai nō ni’a i tō ’outou ti’aturira’a »

’Ua tītau manihini vau iāna ’ia haere mai i te Pū fāri’ira’a rātere nō te hiero Mehiko City. « E fārerei ’oe i te tahi atu mau misiōnare hō’ē ā maita’i mai te tuahine Llanos », parau atu ra vau iāna. « E ’ite ’oe i te ’ana’ana i roto i tō rātou mata, ’e e uiui ’oe ia ’oe iho nō te aha rā ».

’Ahuru ma piti hora i muri mai, ’ua tu’uhia mai te tuahine Llanos i rāpae, i roto noa ā i tōna ’ahu fare tāpe’ara’a. Marua a’era ’oia i roto i te rima ’o Janeen. I te oti-maita’i-ra’a mātou i te ta’i nō te parauparau, nā ’ō mai ra te tuahine Llanos, « Peresideni, e mau i’oa tā’u nō roto mai i te fare tāpe’ara’a ! »

’Ua ha’apāpū mai teie ’itera’a tā’āto’a ē, « ’aita roa te Atua i fa’aea i te riro ’ei Atua nō te mau temeio » (Moromona 9:15). ’Aita vau i fē’a’a ē, ’ua tauturu te fa’aro’o ’e te mau pure a te naho’a ta’ata maitata’i i te pāruru ture i roto i tāna ’auvahara’a ’e ’ia tāmarū i te ’ā’au o te ha’avā.

Nō te tāpe’ara’ahia te tuahine Llanos, e rave rahi mau vāhine tei tāpe’ahia i roto i te fare auri tei fāri’i i te ti’aturira’a māoti te ’evanelia a Iesu Mesia, ’ua fa’a’ōteo mai te hō’ē pāruru i te huero o te fa’aro’o, ’e ’ua ha’apūaihia mātou i roto i tō mātou ti’aturira’a ē, e nehenehe te Atua e fa’a’ohipa ia tātou nō te fa’ahaere i tāna ’ohipa i mua, noa atu te vāhi tei reira tātou.

Hōho’a

tuahine misiōnare e ti’a rā i mua i te hiero