« Nāhea tātou i te fa’ariro i tō tātou ’āmuira’a ’ei ’āmuira’a tāhō’ē atu ā ? » Liahona, Tetepa 2023, 44.
Mai, pe’e mai
Nāhea tātou i te fa’ariro i tō tātou ’āmuira’a ’ei ’āmuira’a tāhō’ē atu ā ?
Fa’ahōho’ara’a nā Vicky Scott
’Ua fa’aro’o Paulo ē, tē vai ra te mau ’āmahamahara’a i rotopū i te mau melo o te ’Ēkālesia, i roto i te ’oire nō Korinetia (hi’o 1 Korinetia 11:18). ’Ei pāhonora’a, ’ua tāparu ’oia ia rātou i roto i te hō’ē rata, « ’ia ’ore roa te au ’ore i te tino nei (te ’Ēkālesia) ; ’ia fāito ato’a ra tō te mau melo ha’apa’o ia rātou iho » (1 Korinetia 12:25).
E nehenehe tātou e fa’a’ite i teie « fāito ato’a ra tō te mau melo ha’apa’o ia rātou iho » nā roto i te mau ’ohipa pipiri ’ore o te here ’e te aroha. ’Ua fa’ahiti Paulo e rave rahi rāve’a nā te rave i te reira, nō te fa’ariro i tō tātou mau aura’a e mea tāhō’ē a’e.
’A ’oa’oa ’e ’a ’oto ’e o vetahi.
« ’Ia mauiui te hō’ē melo ra, e mauiui ato’a te mau melo ato’a ra ; ’e ’ia fa’ateiteihia te hō’ē melo ra, e ’oa’oa ïa te mau melo ato’a ra » (1 Korinetia 12:26).
’A rave i te mau ’ohipa tāvinira’a pipiri ’ore.
« ’Eiaha roa ’ei ta’ata e ’imi i tōna ana’e iho maita’i, e ’imi rā te ta’ata ato’a i te maita’i o vetahi ’ē ato’a » (’Īritira’a Iosepha Semita, 1 Korinetia 10:24 [i roto 1 Korinetia 10:24, nota b]).
Tāhō’ē ana’e i tō tātou ’itera’a pāpū nō te Fa’aora.
« Nō te mea hō’ē ā pane, tātou ato’a e rave nei hō’ē ā ïa tino tē ’amu ato’a nei ho’i tātou i taua pane hō’ē ra [a te Mesia] » (1 Korinetia 10:17).
’A here i te mau ta’ata ato’a.
« ’Eiaha ’outou ’ei tūrorira’a, i te ’āti Iuda, ’e te Heleni ’e te ’ēkālesia a te Atua » (1 Korinetia 10:32).