Ha’apa’ora’a i te feiā tei hina’aro i te tauturu

’Ua aroha o Iesu Mesia, ’ua tāmāhanahana, ’e ’ua pure nō te feiā ’āua-hā’ati nei Iāna. « ’Ua hāmani maita’i haere » ’Oia (Te ’Ohipa 10:38). E nehenehe tātou e pe’e i tāna hi’ora’a nā roto i te arohara’a, te tāmāhanahanara’a, te tāvinira’a ’e te purera’a nō te feiā ’āua-hā’ati nei ia tātou. E nehenehe ā tātou e ’imi i te mau taime ato’a i te mau rāve’a nō te tauturu ia vetahi ’ē.

Hōho’a

e piti ta’ata e hāhaere rā

Te aupurura’a

E fa’a’ohipahia te ta’o aupurura’a i roto i te mau pāpa’ira’a mo’a ’e i roto i te ’Ēkālesia a te Fatu nō te fa’ata’a e nāhea tātou ’ia aupuru te tahi i te tahi. E fa’ata’ahia te mau taea’e nō te autahu’ara’a ’ei mau taea’e aupuru i te ta’ata tāta’itahi ’e ’aore rā, i te ’utuāfare i roto i te pāroita ’e ’aore rā, i te ’āma’a. E fa’ata’ahia te mau tuahine aupuru nō te vahine pa’ari tāta’itahi. E ha’apāpū te mau taea’e ’e te mau tuahine aupuru ē, tē ha’amana’ohia rā ’e tē aupuruhia nei te mau melo ato’a o te ’Ēkālesia.

Hōho’a

e mau ta’ata ē tanu rā i te mau hūero

Tē tauturura’a ia vetahi ē ’ia rava’i rātou ia rātou iho

E nehenehe tātou e tauturu i te mau melo ’utuāfare ’e te mau hoa ’ia rava’i ia rātou iho nā roto i te fa’aitoitora’a ia rātou ’ia roa’a mai ia rātou i te mau rāve’a tāmau nō tō rātou mau fifi. I muri mai e nehenehe tātou e pāturu ia rātou ’a ’ohipa ai rātou i ni’a i tā rātou mau ’ōpuara’a. ’A ’imi i te tahi atu ā ha’amāramaramara’a nō ni’a i te fa’arava’ira’a iāna iho nō ’Ātete 2023 i roto i te Liahona Te mau parau tumu o te ’Evanelia.

’Ua rau te mau rāve’a e ti’a ai ia tātou ’ia tāvini i te feiā e ’āua-hā’ati nei ia tātou, ’e ’ia tauturu i te pāhono i tō rātou mau hina’aro pae tino, pae vārua ’e pae ferurira’a. E nehenehe te ha’api’ira’a i nia ia vetahi e tauturu ia tātou ’ia ’ite ē e nāhea e nehenehe ai ia tātou ’ia tāvini maita’i a’e. E nehenehe ato’a tātou e pure ’ia arata’ihia tātou nō te ’ite atu e aha tā tātou e rave nō te tauturu atu.

Hōho’a

mau ta’ata e ha’aputuputu rā i te ma’a hotu

’Ōperera’a i te mea tā tātou e mau nei

E nehenehe tātou e tāvini ia vetahi ’ē nā roto i te ’ōperera’a i te mea tā te Atua i ha’amaita’i ia tātou. ’Ei hi’ora’a, e nehenehe tā tātou e hōro’a i te mau ō ha’apaera’a mā’a ’e ’aore rā e hōro’a i te ’āfata tauturu i te ao nei a te ’Ēkālesia. E nehenehe ato’a tātou e tāvini i roto i tā tātou huira’atira e tā tātou ’Ēkālesia te mau pi’ira’a.

E hi’opo’a te ’episekōpo i te aupurura’a i te feiā nava’i ’ore i roto i tāna pāroita. E nehenehe tāna e fa’a’ohipa i te moni i roto i te mau ō ha’apaera’a mā’a nō te tauturu i te mau melo i roto i te hina’aro. E tauturu te tahi atu mau feiā fa’atere, tae noa atu i tōna nā tauturu ’e te sotaiete tauturu ’e te peresidenira’a pupu peresibutero, i te mau melo ’ia ’imi i te mau rāve’a tauturu tā rātou e nehenehe e fa’a’ohipa nō te pāhono i tō rātou mau hina’aro.

Tē tauturu nei te ’Ēkālesia i te mau ta’ata nā te ao ato’a nei ma te pāhonora’a rū, te mau ’ōpuara’a a te ’oire, ’e te tahi atu mau fa’anahora’a mai te pape mā ’e te ha’apāutuutura’a rāve’a pāruru o te tino. Nō te ha’api’i hau atu ā, ’a hi’o Dallin H. Oaks, « Te tauturura’a i te feiā veve ’e te ’ati, » Liahona, Novema 2022, 6–8.