Māuruuru ’ia « fa’aro’o iāna »

Hōho’a

ta’ata e ti’a ra i te terono

E fifi rahi tō’u ’ia fa’aro’o tari’a i roto i tō’u orara’a tā’āto’a ’e e 20 i ni’a i te hānere o te mau parau e parauhia nā ni’a mai i te terōno tā’u e hāro’aro’a i te mau ’āmuira’a ato’a a te ’Ēkālesia. I te tahi taime, e ō mai te mana’o ’ōtahi ’e te ta’a ’ē iā’u nei, ’ei hi’ora’a, ’ia ’ata ana’e te ’āmuira’a i te tahi parau ’ārearea a te ta’ata a’o, ’aita vau e ’ata nō te mea ’aita vau i fa’aro’o. ’E ’aita ho’i o vau ana’e te ta’ata i reira. Te tahi o te mau ta’ata pa’ari a’e tē parau ato’a mai iā’u ē tē vai ato’a ra terā fifi tō rātou.

I te tahi taime, i muri a’e i te toro i te tari’a ’ia hāro’aro’a i te hō’ē ta’ata parauparau marū i te purera’a ’ōro’a ’e ’aore rā ’ia parau ana’e mai te hō’ē ’orometua Ha’api’ira’a Sābati ē ’aita e tītauhia ’ia fa’a’ohipa i te micro nō te mea e nehenehe te tā’āto’ara’a e fa’aro’o, tē uiui nei au iā’u iho ē, nō te aha pai ïa vau e haere mai ai i te purera’a, ’ia iti ana’e te mea tā’u e fa’aro’o. ’Aita ānei tō’u taime e māu’a maita’i a’e ’ia fa’aea i te fare nō te tai’o i te mau ha’api’ira’a a te Mai,pe’e mai ’e ’aore rā te tuatāpapara’a te pāpa’ira’a mo’a ?

Noa atu rā i te reira, ’ua hina’aro vau ’ia ha’apa’o ’e ’ia tāmau noa vau i te haere e tō’u ’utuāfare nō te fa’a’āpī i tā’u mau fafaura’a o te bāpetizora’a ’e ’ia ha’amana’o i te Fa’aora nā roto i te ’amura’a i te ’ōroa mo’a. ’Ua riro te mau putapūra’a ato’a o te vārua ’ei ha’amaita’ira’a, ’e i te mau taime ato’a e fa’aitoitora’a ïa nō’u te mau mea tā’u e nehenehe e fa’aro’o.

Hōho’a

Iesu ’e te vahine tei ro’ohia i te tapahi

I te hō’ē sābati, ’ua parauparau te melo ’āpo’ora’a teitei i roto i te purera’a ’ōro’a, ma te hō’ē o taua mau reo māramarama ra ’e te ’ōhie ’ia fa’aro’o atu. ’Ua ’āparau ’oia nō ni’a i te ’ā’amu o te Faufa’a ’Āpī nō te vahine ra tei ro’ohia i te mai tapahi a 12 matahiti te maoro, ’e te vai ra tōna fa’aro’o e ora ’oia mai te mea noa e roa’a iāna ’ia tāpe’a atu i te pereue o Iesu a haere mai ai nā pīha’i iho (hi’o Luka 8:43–48).

’Ua hōro’a mai teie ta’ata a’o i te hō’ē hi’ora’a faufa’a mau tei ha’aputapū hōhonu iā’u, ma te fa’ata’ara’a mai ē, nō tōna huru i taua taime ra, e fa’arirohia taua vahine ra, e mea vi’ivi’i ’e e mea pāpū ē, e’ita ’oia e fa’ati’ahia ’ia tomo atu i roto i te fare pure. 12 matahiti te maoro !

’Ua ’ara’ara tō’u ferurira’a i teie mau ha’amāramaramara’a rau. Noa atu ho’i tōna ma’i, ’aita rā i tāpe’a a’e iāna ’ia haere i te fare pure i te tahi mau taime. Nō te fa’aturera’a rā o terā tau, ’aita roa atu ’oia i fa’ati’ahia ’ia haere atu. ’Auē ïa tāmatara’a ri’ari’a mau nō te hō’ē ta’ata e fa’aro’o tōna !

’A feruri ai au i tōna ’ā’au ’oto ’a ’ōpanihia ai ’oia ’ia ha’amori i te Atua e tōna mau hoa nō te huru-’ē-ra’a o tōna tino—te hō’ē ho’i mea ’aita tāna e nehenehe ’ia taui––’ua fa’a’ara’ara te Vārua i tō’u nā mata i te mea ho’i ē hō’ē ā tōna vaira’a e tō’u iho nei. ’Ua ti’a iā’u ’ia hāro’aro’a ē, noa atu ’aita e roa’a iā’u ’ia ’apo mai i te tā’āto’ara’a, ’ua fāna’o rā vau i te haere i te purera’a ’e i te fa’aro’o i te mea e roa’a iā’u. ’Aita ho’i tā teie vahine e mā’itira’a ’ē atu mai tā’u e vai nei. ’Ua ha’amā vau nō te mau taime ato’a ’a feruriri’i ai au e fa’aea i te fare.

I taua iho taime ra, ’ua parauparau mai te Atua i tō’u ’ā’au, ma te fa’a’ite mai iā’u ē, ’aita ’oia e hina’aro ’ia fa’ahapa vau iā’u iho. ’Ua hina’aro ’oia ’ia māuruuru a’e vau––māuruuru nō te fāna’ora’a ’ia haere i te purera’a ’e ’ia ha’apa’ari iā’u iho nā roto i te ’āmuira’a atu e te mau pipi ha’apa’o maita’i a te Mesia. Noa atu ’aita i ti’a iā’u ’ia fa’aro’o i te mau mea ato’a, ’ua ti’a rā iā’u ’ia hāro’aro’a ma’a vāhi iti noa—’e ’ua ha’amaita’i te reira iti i tō’u orara’a. ’Ua vai ato’a te tahi taime ta’a ’ē mau tō te Vārua tauturura’a ’ia haro’aro’a vau i te mau mea ’aita tō’u tari’a i ti’a ’ia fa’aro’o.

’Ua māuruuru vau nō te ti’amāra’a ’ia ha’amori i te Atua ’e ’ua ’oa’oa vau i te mau ha’amaita’ira’a nō te haerera’a i tōna fare. ’Ua fa’a’ite pāpū mai te Vārua iā’u ē, e mea maita’i a’e, hau atu i te maita’i nō’u ’ia ’āmui atu i te mau purera’a a te ’Ēkālesia, e ’ia rave i te ’ōro’a mo’a, ’e i te ’apo mai te nehenehe iā’u ’ia ’apo i te ’ore-roa-ra’a e ’āmui atu.

Mai te reira atu taime, ’ua taui tā’u hi’o-ra’a. ’Aita vau i ha’aparuparu noa a’e i ni’a i tō’u mau fifi, ’ua ’ī rā tō’u ’ā’au i te hau, ’e ’ua fa’aoti au e tūtonu i ni’a i te mau ha’amaita’ira’a nō te haerera’a i te purera’a. ’Ua fa’aoti au e tauto’o pāpū vau ’ia māuruuru i te mea tā’u e nehenehe e fa’aro’o, ’eiaha rā ’ia ha’aparuparu i ni’a i te mau mea tā’u e ’ore e fa’aro’o.

’Ua parau Elder Dieter F. Uchtdorf nō te Pupu nō te Tino ’Ahuru Ma Piti ’āpōsetolo : « Te māuruurura’a i roto i te mau taime hepohepo e ’ere ïa te tāpa’o nō tō tātou māuruuru i tō tātou huru orara’a. Tōna aura’a maori rā, nā roto i te mata o te fa’aro’o e hi’o tātou i ’ō atu i tō tātou mau fifi nō teie iho ā taime. »¹ Te vahine i toro i te rima nō te tāpe’a i te ’ahu o Iesu ra, e fa’aha’amana’ora’a fa’ahiahia ïa nō’u ’ia nava’i noa te fa’aro’o i te Fatu nō te hi’o i ’ō atu i tō’u mau tā’ōti’ara’a ’e tē ti’aturira’a nava’i noa i te Atua nō te ’ite mai ē, e ha’amaita’i mai ’oia iā’u ’ia ti’a atu i ni’a a’e i tō’u mau ’ōti’a pae tino.

’Ua ’ī teie orara’a i te mau tītaura’a e rave rau ia tātou, te pae vārua, E tae mai te orara’a nā roto i te mau huru tāmatara’a ato’a o te tute ia tātou i te pae vārua, te pae manava, ’e ’aore rā i te pae tino, ’oia ato’a i roto i te mau taime hepohepo, tē fa’aitoitohia nei tātou ’ia māuruuru nō te mau ha’amaita’ira’a tā tātou e fāna’o nei. ’Ua parau te Fatu ē :

« Tō’u mau hoa, ’eiaha e mata’u, ’ia tāmāhanahanahia tō ’outou mau ’ā’au ; ’oia ïa, ’a ’oa’oa tāmau noa, ’e ’a fa’a’ite mai i te māuruuru i roto i te mau mea ato’a ra…

« … ’E te mau mea ato’a i ha’amamaehia ai ’outou ra e fa’ariro-’āmui-hia ïa ’ei maita’i nō ’outou, ’e ’ei hanahana ho’i i tō’u nei i’oa » (Te Ha’api’ira’a Tumu ’e te mau Fafaura’a 98:1, 3).