’Ōperera’a 72 Buka a Moromona

Hōho’a

mau ’āfata Buka a Moromona

Faʼahōho’araʼa nā Allen Garns

I roto i te pararera’a o te ma’i COVID-19, ’ua ha’amaita’ihia mātou nā roto i te ’atu’atura’ahia tā’u tāne fa’aipoipo, ’o Claude, i tō mātou fare. I reira, ’ua tauturu vau ’e tā māua mau tamari’i ma te here, i te ’atu’atura’a iāna e tae roa atu i tōna ho’i-marū-ra’a atu i te ra’i.

Nā mua atu, ’ua pure māua Claude nō te ’ite e mono ānei i te patio ’ei piha ’atu’atura’a, i reira māua e fa’anaho ai i te mau mea ato’a e hina’arohia ’ia au maita’i ’oia. ’Ua fāri’i māua i te ha’apāpūra’a ē, e ti’a ia māua e nā reira.

Nō te fa’a’āpī i te patio, e ti’a i te mau rave ’ohipa e haere nā roto i te māua fare. ’Aua’a a’e rā, e ’ōpani tua tō te patio, e nehenehe ïa te mau rave ’ohipa e tomo ’e e haere i rāpae ma te ’ore e haere nā roto i te mau vāhi e fa’aeahia ra o tō mātou fare. ’Ua riro te reira ’ei ha’amaita’ira’a rahi i roto i te mau ’ōpanipanira’a o te ma’i COVID-19.

I te otira’a te piha o Claude, ’ua haere mai te mau tuati i te mau mahana ato’a. E mau ta’ata maita’i rātou, te here ’e te ’ite maita’i i te mea e tītauhia ia mātou ’ia rave, ’ia vai au maita’i noa Claude.

I tō’u tomora’a mai i roto i te ’Ēkālesia, ’ua ha’api’ihia vau e misiōnare te mau melo tāta’itahi o te ’Ēkālesia.¹ Nō te mea e mea au nā’u e fa’a’ite i te ’evanelia, ’ua poro’i atu vau e toru ’āfata Buka a Moromona, e 24 buka i roto i te ’āfata tāta’itahi. ’Ua fafau vau e hōro’a hō’ē buka i te mau ta’ata tāta’itahi e tomo mai i roto i tō mātou fare.

’Ua tāpa’o vau i te mau tuha’a faufa’a rahi i roto i te buka tāta’itahi ’e te hō’ē tāreta tā’u iho i hāmani e hōho’a ïa ’o tā’u i pata nō te hiero nō Roto Miti. ’Ua tāpiri ato’a vau i tō’u ’itera’a pāpū i ni’a i te ’api ’uo’uo i mua i te buka tāta’itahi. I muri iho, hou vau ’a hōro’a ai i te hō’ē buka i te hō’ē rave ’ohipa ’aore rā i te hō’ē tuati ma’i, ’ua fa’ata’a atu vau ia rātou e aha te Buka a Moromona.

’Ua māere maita’i au i tō rātou huru. Hō’ē ana’e ta’ata tei pāto’i i te fāri’i i te hō’ē buka. ’Ua ’ana’anatae te tahi atu mau ta’ata ’ia fa’aro’o nō te reira. ’Ua ha’amāuruuru mai te tahi pae ’o rātou iā’u ma te parau ē, ’ua ’ite maita’i rātou i te Buka a Moromona ’e ’ua hina’aro noa na rātou i te hō’ē buka. E rave rahi ta’ata tei ’oa’oa rahi ’e tei tauahi roa mai iā’u.

’Ua pāpū roa iā’u ē, ’ua tupu te reira nō te mea i te mau taime ato’a e hāmama vau i tō’u vaha nō te paraparau nō ni’a i te Buka a Moromona, tei pīha’i iho te Vārua Maita’i iā’u. ’Ua pāpū iā’u ē, ’ua fari’i te mau rave ’ohipa ’e te mau tuati i te Vārua. ’Ua hōro’a vau 72 buka, ’e ’aita i maoro a’e nei ’ua hōro’a fa’ahou e 24 atu ā.