Fa’aorahia i roto i te hiero

Hōho’a

nā ta’ata fa’aipoipo i mua i te hiero

Hōho’a i hōro’ahia mai e te ta’ata pāpa’i ; hōho’a i muri nō te hiero nō Durban ’Āfirita Apato’a nā Matthew Reier

’Ua fānau-pohe tā māua tamaiti mātāmua i te matahiti 2017. E iva ’āva’e hou te hiero nō Durban ’Āfirita Apato’a e ha’amo’ahia ai i te matahiti 2020, ’ua fānau-pohe te piti ’o tā māua tamaiti.

I taua taime ra, e au ra vau mai ia Hana ra nō te Faufa’a Tahito te huru. « ’Ua ’ino’ino roa tō’u ’ā’au ’e ’ua pure atu ra vau i te Fatu ’e ’oto roa atu ra » (1 Samuela 1:10).

’Ua hepohepo roa vau ’e te riri ’e ’ua māuiui roa. ’Ua ’aro vau i te pae manava, i te pae tino ’e i te pae vārua. E au te tāpe’ara’a i ni’a i te ’āuri mai te tāpe’ara’a i ni’a i te hō’ē taura, tei he’e marū noa nā roto atu i tō’u nā rima. Tē ’ama mau ra vau i roto i « te umu o te ma’i » (Isaia 48:10).

’Ua māuruuru roa ra ho’i au i te mea ē, ’ua fāri’i au i te tauturu ’e te fa’aorara’a a tō’u ’utuāfare, te mau pāpa’ira’a mo’a ’e te pure. ’Ua fāri’i ato’a vau i te tauturu nā roto mai i te feiā fa’aa’o. Terā rā, te tumu faufa’a mau o tō’u fa’aorara’a, ’ua tae mai ïa i roto i te hiero.

’A ha’amata ai au i te tāvini i roto i te hiero, ’ua ha’amata vau i te ’ī i te māramarama rahi a’e. E au ē tei te fare au i reira. ’Ua fāri’i ato’a vau i te hō’ē ha’apāpūra’a hōhonu ē, ’ua here te Fatu iā’u ’e tē ’ite nei ’oia i tā’u mau ’arora’a.

’A tāmau noa ai au i te tāvini i roto i te fare o te Fatu, ’ua ha’amata vau i te hi’o i te i’oa o tō’u mau tupuna nā roto i te tahi atu rāve’a ta’a ’ē. E ’ere ana’e i te mau i’oa noa. ’Ei hi’ora’a, ’ua ’ite a’e ra vau ē, hō’ē tupuna e tamāhine, e metua vahine, e māmā rū’au, e metua vahine fēti’i, e tuahine, e tamāhine fēti’i. ’Ua riro tōna pohera’a ’ei mea fifi roa nō te mau fēti’i e ora nei. Te mau ha’amaita’ira’a rā tei hōro’ahia i teie tupuna i roto i te hiero nā roto i te mau ’ōro’a monora’a, ’o te hō’ē ïa ’oa’oa rahi ’e te marū ’o te nā ni’a roa a’e i te māuiui ’o tōna mau fēti’i ora i tōna pohera’a.

’Ua ha’amaita’i teie ’itera’a iā’u, ’a feruri ai au i tā māua mau tamāroa faufa’a rahi, i te nātura mure ’ore o tō tātou vārua, ’e i te fa’anahora’a nō te fa’aorara’a a te Metua i te ao ra. ’Ua tūra’i te pohera’a o tā māua nā tamaiti iā’u ’ia ora i te ’evanelia ma tō’u itoito ato’a.

Tē vai ra te tahi mau mahana e mea pa’ari a’e i te tahi atu mau mahana. Terā rā, te tāpe’ara’a i tā’u mau fafaura’a e fa’a’ōhie atu ā ïa i te reira mau mahana.

Nō te fa’ahiti fa’ahou i te mau parau a te peresideni Russell M. Nelson, « tē mihi rahi nei māua i tā māua nā tamaiti. Terā rā, ’aua’e te ’evanelia a Iesu Mesia i fa’aho’i-fa’ahou-hia mai, ’aita māua e ha’ape’ape’a nei nō rāua. ’A fa’atura tāmau noa ai māua i tā māua mau fafaura’a i te Atua, tē ora nei māua ma te tīa’i māite i te taime e fārerei fa’ahou ai ia rāua ».¹