I Le Ala o Lo Latou Tiute

O le tausaga 1947 sa faailoga ai le 100 tausaga o uluai paionia o le Au Paia o Aso e Gata Ai na taunuu i le Vanu o Sate Leki. E tele faafiafiaga o le aso faamanatu sa faia i lena tausaga, ma faailoaga lemafaitaulia o le lotofaafetai sa ofo atu mo soo tuuto o Iesu Keriso o ē na mamanuina alasopo, fausia fale, toto faatoaga i le toafa naumati, ma faato’a nuu.

Na tuuina atu e Peresitene J. Reuben Clark, Fesoasoani Muamua i le Au Peresitene Sili, se tasi o saafiafiga sili ona manatua pea ma ootia i nei paionia faatuatua i le konafesi aoao ia Oketopa 1947.

I lana savali, sa faamamalu puupuu ai e Peresitene Clark ni taitai lauiloa o ē na taitaia le malaga i sisifo, e pei o Polika Iaga, Heber C. Kimball, Uilifoti Uitilafi, Pale P. Palate, ma le toatele o isi. Peitai, o lona famoemoega autu e le o le toe faamatalaina o mea na ausia e nei tagata lauiloa. Ae, sa ia taulai atu lana saunoaga i agaga faamaoni o o latou igoa e le o mailoa pe na faamaumauina aloaia foi i le talafaasolopito o le Ekalesia. O le ulutala taua o lana savali o le “O i Latou o le Taavaletoso Mulimuli.”¹

Sa faamatala e Peresitene Clark i auiliiliga tetele ia uiga ma lu’itau na feagai ma tagata malaga o ē na faimalaga i le taavaletoso na ufiufi i solo taitasi o taavaletoso uumi na sopo’ia nofoaga valevalenoa. Na viia nei toa lē mailoa ma lē faamanatuina o ē, i lea aso ma lea aso, lea vaiaso ma lea vaiaso, ma lea masina ma lea masina, sa taumōmōle i le pefu na fe’elia’e i luga e taavaletoso uma na taavavale i luma atu o i latou—ma o ē na manumalo i faigata lē maalofia na latou fetaiai i le ala.

Sa tautino mai Peresitene Clark, “O i latou o le taavaletoso mulimuli, na vaivai ma lēlāvavā, tiga o latou alofivae, o nisi taimi na toetoe lava a faavaivai, peitai na faamalosia i lo latou faatuatua e alofa le Atua ia i latou, ma e moni le talalelei toefuata’iina, ma sa taitaia ma faatonutonu e le Alii le Usoga sa i luma.”²

Sa ia faaiuina lana savali i lenei faamālō musuia: “I nei agaga lotomaualalo, maoae le faatuatua, maoae i galuega, maoae i le ola amiotonu, maoae i le mamanuina o o tatou talatuu le mafaatauina, ou te ofo atu ma le lotomaualalo o’u alofaaga, lo’u faaaloalo, ma la’u faamamaluga ma le migao.”³

I le 1990, sa fofogaina ai e Peresitene Howard W. Hunter, a o avea i lena taimi ma Peresitene o le Korama a Aposetolo e Toasefululua, se savali e uiga i saofaga taua a tagata e lē mafaitaulia o le Ekalesia o ē auauna atu ma le filiga ma le faamaoni, ma e itiiti pe leai foi se faailoaga faalaua’itele po o se faamamaluga.

Na faaopoopo mai Peresitene Hunter:

“Sa faapea mai [e uiga i le Kapeteni talavou ma le lototoa o Moronae]:

“‘A na pei tagata uma sa i ai, ma o lo o i ai, ma o le a i ai, e faapei o Moronae, faauta, po ua luluina lava mana o seoli e faavavau; … po ua leai lava se mana o le tiapolo i luga o loto o le fanauga a tagata’ (Alema 48:17).

Se saafiafiga inā maoae i se tagata lauiloa ma malosi. … I fuaiupu e lua mulimuli ane o se faaupuga e uiga ia Helamana ma ona uso, o ē na faatinoina se matafaioi sa le’i lauiloa tele nai lo Moronae, e faitauina faapea:

“‘O lenei faauta, sa le itiiti foi le auaunaga a Helamana ma ona uso i le nuu nai lo Moronae’ (Alema 48:19).”

Sa faaauau le saunoaga a Peresitene Hunter, “I se isi faaupuga, e ui ina sa le’i matauina gofie ia Helamana pe lauiloa e pei o Moronae, ae sa le itiiti lana auaunaga; o lona uiga sa tutusa lona fesoasoani atu po o lona aoga ma Moronae.”⁴

Ona fautuaina lea o i matou uma e Peresitene Hunter ina ia le itiiti foi le auaunaga. Sa ia saunoa: “Afai e te lagonaina o le tele o mea e te faia i lenei tausaga po o tausaga a sau e te lē lauiloa tele ai, ia lototele. O le toatele o tagata sili na soifua, sa le’i lauiloa tele foi. Auauna atu ma tuputupu a’e, ma le faamaoni ma le filemu.”⁵

Ou te faafetai mo le faitau miliona o tagata o le Ekalesia i nei aso ua o mai i le Faaola⁶ ma fetaōmi atu i luma i luga o le ala o feagaiga i taavaletoso mulimuli o a tatou solo o taavaletoso o nei ona po—ma o ē moni e lē itiiti foi le auaunaga. O le malosi o lo outou faatuatua i le Tama Faalelagi ma le Alii o Iesu Keriso atoa ai ma o outou soifuaga faatauvaa ma faapaiaina ua uuna’ia ai a’u ina ia avea ma se tagata ma se soo lelei atu.

Ou te alofa ia te outou. Ou te faamemelo ia te outou. Ou te faafetai atu ia te outou. Ma ou te faamālō atu ia te outou.

O se faamatalaga a Samuelu le sa Lamana i le Tusi a Mamona ua sili ona taāofa’i ai o’u lagona mo outou.

“Ia outou vaai o le vaega tele o i latou o loo i ai i le ala o lo latou tiute, ma ua latou savavali ma le migao i luma o le Atua, ma ua latou tausisi e tausi ana poloaiga ma ana tulafono. …

“Ioe, ou te fai atu ia te outou, o le vaega tele o i latou o loo latou faia lenei mea, ma o loo latou taumafai ma le filiga e le faavaivai ina ia mafai ona latou aumai o e o totoe o o latou uso i le malamalama o le upumoni.”⁷

Ou te talitonu o le fasifuaitau “i le ala o lo latou tiute” ua faamatala ai uso ma tuafafine e iloatino ma vaavaai mo, ma nonofo i talaane o tagata o loo nofotoatasi i sauniga lotu ma i le tele o isi faatasiga. Latou te tauivi pea e “faamafanafana i latou o loo manaomia le faamafanafanaga,”⁸ e aunoa ma le faamoemoe mo ni faamamaluga po o ni viiga.

Ou te talitonu o le fasifuaitau “i le ala o lo latou tiute” ua faamatala ai taitoalua ma fanau o loo lagolagoina se soa, matua, po o se tamaitiiti i se tofiga faaleautaitai i le Ekalesia toefuata’iina a le Alii. O lo latou faatosinaga tumau, mausali, ma filemu ma e masani lava e le iloaina ua mafai ai ona manuia le toatele o tagata ma aiga i auala o le a lē malamalama atoatoa i ai na o le faavavau lava.

O le fasifuaitau “i le ala o lo latou tiute” ua faamatala ai tagata o e, na liliu ese mai le Atua, ae ua toe-liliu mai ia te Ia ma le lotomaualalo,⁹ ua salamo i a latou agasala, ma o loo saili i le mana faamama ma le faamalolo o le Togiola a le Faaola. O le o mai ia Keriso¹⁰ e ala i le toefoi mai i le ala o feagaiga mai auala ‘alo e tumu i agasala na oo atu ai i “ala faasaina”¹¹ e taua faaleagaga ma amiotonu a’ia’i. Pe a latou fetaōmi atu i luma ma le faatuatua ma le lē faavaivai i le faia o mea lelei, o loo latou faataatiaina le faavae o se galuega tele i o latou lava olaga patino,¹² “i augatupulaga uma ma mo le faavavau.”¹³

O le fasifuaitau “i le ala o lo latou tiute” ua faamatala ai tagata amiotonu o ē naunau e tauamo faatasi ma le Faaola e ala i feagaiga ma sauniga faatagaina o Lana talalelei—ae atonu e faasaina mai le faia o ia mea ona o ni vaega e le oo i ai lo latou malosi. Ou te folafola atu o le a outou mapu mai i o outou tiga patino ma o le tou usiusitai ma le faatuatua ia gauai atu ma le onosai o outou loto i le Atua o le a tauia i “le taimi ua faatulagaina e le Alii.”¹⁴ “E afe ane le tagi i le [po], [ae oo mai] le alaga fiafia i le taeao.”¹⁵

O le fasifuaitau “i le ala o lo latou tiute” ua faamatala ai le au faaliliu-upu musuia ma le au faamatala-upu i le lalolagi atoa o ē auauna atu i le Alii e ala i le fesoasoani atu i uo ma tagata o le Ekalesia ia “faalogo i le atoatoaga o le talalelei i [le latou] lava tautala, ma i [le latou] lava gagana.”¹⁶ O o latou leo, o gagana faifaailoga, ma faamaumauga ua faaliliuina ua faaleoina ai upumoni e faavavau, ae toalaiti lava i tatou e iloaina o latou igoa, pe faailoa atu foi i ai le agaga faafetai. E ala mai i meaalofa o gagana ia ua faamanuiaina ai i latou, o loo auauna atu ai le au faaliliu upu ma le au faamatala upu ma le filiga, lē manatu faapito, ma, i le tele o taimi, latou te fesoasoani i tagata e aunoa ma le iloaina ia maua le meaalofa faaleagaga o le faatuatua e ala i le faitauina ma le faafofogaina o le afioga a le Atua.¹⁷

O le fasifuaitau “i le ala o lo latou tiute” ua faamatala ai alii ma tamaitai faaipoipo e faamaoni, o ē faamamaluina o latou tiutetauave o feagaiga e fanafanau ma faatumuina le lalolagi, ma o ē ua faamanuiaina i le malosi ma le onosai e tauivi ai ma a latou fanau iti i sauniga faamanatuga. I se lalolagi ua faateteleina le fenumia’i ua lofia i mala ma measese ua faamuamua, o nei agaga lototetele ua lē gaua’i atu i leo faalelalolagi o loo viia le manatu faapito; ae latou te faaaloalo i le paia ma le taua o le olaga i le fuafuaga o le fiafia a le Tama Faalelagi mo Ana fanau.

E toatele ulugalii faaipoipo e faatuatuaina foi le Atua pe a le faamamaluina manaoga amiotonu o o latou loto pe o taimi foi sa latou faamoemoe ma moemiti e tupu ai. Latou te “faatalitali i le Alii”¹⁸ ma latou te le poloaiina ia faafetaiaia e Ia o latou taimi atofaina faaletino. “Aua talu mai le amataga o le lalolagi e lei faalogo lava tagata pe na lagona i le taliga, pe na vaaia foi e se mata, e ese mai ia te oe, E, le Atua e, le silisili o mea ua e saunia mo ia o lē e faatalitali ia te oe.”¹⁹

O le fasifuaitau “i le ala o lo latou tiute” ua faamatala ai le faitau afe ma afe o taitai o vasega pepe ma faiaoga o Peraimeri o ē alolofa ma aoao fanau o le Ekalesia i aso Sapati taitasi.

Mafaufau i le aafiaga e faavavau o le auaunaga o loo tuuina atu e nei soo tuuto—ma faamanuiaga ofoofogia ua folafola atu ia i latou o e auauna atu i fanau.

“Ona tago lea o [Iesu] i le tama itiiti, ua faatu ia te ia i o latou luma, ua na siitia o ia i ona luma, ona fetalai atu lea ia te i latou,

“Ai se talia se tama itiiti faapenei i lo’u nei igoa, ua talia e ia o a’u: ai se talia a’u, e le o a’u ua ia talia, a o ia na auina mai au.”²⁰

O le fasifuaitau “i le ala o lo latou tiute” ua faamatala ai fanau tuuto o loo tausia ma le alofa matua matutua, se tina ua le mamoe o loo faamafanafanaina se tamaitiiti fefevale a o tu o se leoleo pei se “leona i le faitotoa” o lona aiga,²¹ O tagata o le Ekalesia e taunuu vave atu ma mulimuli ona o ese e faatulaga ma toe teu nofoa, ma uunaia tagata o e valaauliaina aiga, uo, ma paaga e o mai ma matamata, o mai ma fesoasoani, ma o mai ma nofomau.²²

Ua ou faamatalaina atu na o ni nai faataitaiga filifilia o soo tuuto ma tausi feagaia o Iesu Keriso e pei o outou o e o loo fetaomi atu i luma “i le ala o lo [outou] tiute.” E faitau miliona faataitaiga faaopoopo a le Au Paia o Aso e Gata Ai o e o loo ofo atu o latou “agaga atoa”²³ i le Atua o loo maua i totonu o aiga e faatotonugalemu ia Keriso ma i totonu o iunite o le Ekalesia i le lalolagi atoa.

Tou te alolofa ma auauna atu, faalogo ma aoao, popole ma faamafanafana atu, ma aoao atu ma molimau atu i le mana o le Agaga Paia. Tou te anapopogi ma tatalo soo, ma sa faasolo malolosi ma atili malolosi ai i le lotomaualalo, ma tuputupu a’e ma le mausali ma atili mausali ai i le faatuatua ia Keriso, seia oo ina faatutumuina o [outou] agaga i le olioli ma le faamafanafanaga, ioe, seia oo ina faamamaina ma faapaiaina o [outou] loto, o le faapaiaga lea e oo mai ona o lo [outou] tuu atu o o [outou] loto i le Atua.”²⁴

O i latou o le taavaletoso mulimuli, o i latou uma e le itiiti foi le auaunaga, ma o outou i aso nei, o ē o loo fetaōmi atu i luma i le ala o lo outou tiute, o le malosi’aga lea o le Ekalesia toefuata’iina a le Faaola. Ma e pei ona folafola mai le Alii, “o nofoalii ma malo, itumalo ma mana uma, o le a faaali ma tuu mai i luga o i latou uma o e na tumau ma le lototoa mo le talalelei a Iesu Keriso.”²⁵

Ou te molimau atu ma le olioli, o loo soifua le Tama Faalelagi ma Lona Alo Pele, ma e moni a La’ua folafolaga, i le suafa paia o le Alii, o Iesu Keriso, amene.