Ia Avea ma Soo Fifilemu o Keriso

O loo tatou ola i se taimi ua feagai ai “soo fifilemu o Keriso”¹ ma luitau tulagaese. O i latou o e talitonu ia, tapuai ma le lotomaualalo, ma molimau atu ia Iesu Keriso e feagai lava e le aunoa ma tofotofoga, puapuaga, ma faigata.² E leai foi se mea e ese ai ma’ua ma lo’u toalua, o Mary. I ni nai tausaga ua tuanai atu, na ma vaaia ai le toatele o a ma uo mamae i le aoga maualuga, ma soa faifeautalai, ma paaga faigaluega sa i ai muamua ua maliliu pe, e pei ona saunoa Peresitene Russell M. Nelson, ua faau’u ma agai atu i le isi itu o le veli. Ua ma vaaia nisi na ola a’e i le faatuatua ma le talitonuga a ua la’a ese mai le ala o feagaiga.

E faanoanoa, na maliu se atalii o le ma fanau ua 23 ona tausaga, i se faalavelave matautia tau taavale e tasi. O nisi o uo pele, tagata o aiga, ma paaga na onosaia foi luitau ogaoga o le soifua maloloina.

Soo se taimi e tulai mai ai faigata, tatou te faanoanoa ma tauivi e tauaveina avega a le tasi ma le isi.³ Tatou te fetagisi ona o mea o le a le ausia ma pese o le a le usuina.⁴ E tutupu mea leaga i tagata lelei i le malaga i lenei olaga. O afi faataumaoi i Maui i Hawaii, i Chile i saute, ma Kanata i sasae o ni faataitaiga o mea matautia e feagai ma tagata lelei i nisi taimi.

Ua tatou faitau i le Penina Tau Tele sa faaali atu ai e le Alii ia Aperaamo le natura faavavau o agaga. Sa aoao ai e Aperaamo lo tatou olaga i le muai olaga, o le muai faauuina, o le Foafoaga, o le filifilia o se Togiola, ma lenei olaga faitino, o le esetete lona lua lea o le tagata.⁵ Na tautino mai le Togiola:

“O le a tatou faia se lalolagi e nonofo ai i latou nei;

“Ma o le a tatou tofotofo ai i latou, ia iloa ai, pe latou te faia mea uma e poloaiina ai i latou e le Alii lo latou Atua.”⁶

O lea la ua tatou i ai uma iinei i le esetete lona lua o la tatou malaga o le agaigai i luma i se malo o le mamalu, o se vaega o le fuafuaga sili ma le faaeaga a le Atua. Ua faamanuiaina i tatou i le faitalia ma ua tatou aafia ai i tofotofoga o le olaga. O le taimi lenei ua atofa mai mo i tatou e sauniuni ai e fetaia’i ma le Atua.⁷ Ua faamanuiaina i tatou e iloa e uiga ia Iesu Keriso ma Lana matafaioi i le fuafuaga. Ua tatou maua le avanoa e avea ai ma tagata o Lana Ekalesia toefuatai—O Le Ekalesia a Iesu Keriso o le Au Paia o Aso e Gata Ai. I le avea ai ma soo fifilemu o Keriso, tatou te taumafai malosi e ola i Ana poloaiga. Sa le’i faigofie lava mo Ona soo. E le’i faigofie foi mo le Faaola ona faataunuu ma le faamaoni Lana misiona i le olaga nei.

Ua manino tusitusiga paia, e toatele o le a faamatuu atu i se āga o le “aai, feinu, ma fiafia, aua o taeao tatou feoti.⁸ O isi tagata le-talitonu e mapu ane i vaega o tagata e faatāua i latou lava, o ē fautuaina “le isi faama’ite fou”⁹ ma manatu o tagata.¹⁰ Latou te le iloa le mea e maua ai le upumoni.¹¹

O soo fifilemu o Keriso e lē mulimuli i se tasi o ia ala. O i tatou o ni tagata faauō, ma toaaga o nuu o loo tatou nonofo ai. Tatou te alolofa, faasoa atu, ma valaaulia tagata uma o fanau a le Atua e mulimuli i aoaoga a Keriso.¹² Tatou te mulimuli i le fautuaga a lo tatou perofeta pele, o Peresitene Nelson; tatou te filifilia le matafaioi a se “tagata faatupu filemu, nei ma i taimi uma lava.”¹³ O lea faiga musuia e ogatusa ma tusitusiga paia ma le taitaiga faaperofeta.

I le 1829, sa le’i faatulagaina le Ekalesia toefuataiina, e le’i lolomia foi le Tusi a Mamona. Sa i ai se vaega toaitiiti o tagata na tauivi, na uuna’ia e le Agaga o le Atua, sa mulimuli i le Perofeta o Iosefa Samita. Sa faaali e le Alii ia Iosefa le fautuaga mo taimi faigata: “Aua le matatau, le lafu itiiti e; fai mea lelei; ia tuu le lalolagi ma seoli e aufaatasi faasaga mai ia te oulua, auā afai ua lua atiaʼe i luga o laʼu papa, e lē mafai ona latou manumalo.”¹⁴ Na Ia fautuaina foi i la’ua:

“Vaai mai ia te aʼu i mafaufauga uma; aua le masalosalo, aua le fefefe.

“… Ia faamaoni, tausi i aʼu poloaiga, ma o le a oulua mautofi ai i le malo o le lagi.”¹⁵

E manino lava, e le fetuuna’ia lo tatou taunuuga faalelagi pe a tatou mafatia i faigata. I le Eperu, ua fautuaina i tatou “ia faalatalata atu ai ma le faamalosi i le nofoaalii o le alofa tunoa, ina ia alofaina ai o i tatou, ia maua ai foi le alofa tunoa e fesoasoani mai i ona aso e tatau ai.”¹⁶ O Iesu Keriso o “le faaolataga e faavavau.”¹⁷

Ou te fiafia lava i upu a Mamona, na ta’ua e lona atalii o Moronae, faamalo i “soo fifilemu o Keriso … ona o lo outou savavali ma le filemu faatasi ma fanau a tagata.”¹⁸

Mo i tatou i le Ekalesia o loo tauivi ia avea ma “soo fifilemu o Keriso, o loo i ai se aso sili atu o loo faatali mo i tatou a o tatou taulai atu i lo tatou Alii ma le Faaola, o Iesu Keriso. O tofotofoga o se vaega o le olaga faitino ma e tupu i olaga o tagata uma i le lalolagi atoa. E aofia ai feteenaiga tetele i le va o atunuu ma tagata taitoatasi.

E masani ona fesiligia taitai o le Ekalesia, “Aisea e faatagaina ai e se Atua amiotonu mea leaga e tutupu, aemaise lava i tagata lelei?” Aisea foi e le laveaiina ai i latou o e amiotonu ma o loo auauna i le Alii, mai ia faalavelave?”

Tatou te le iloa tali uma; ae ua tatou iloa ni mataupu faavae taua ua mafai ai e i tatou ona fetaiai ma tofotofoga, puapuaga ma faigata faatasi ma le faatuatua ma le mautinoa i se lumanai sili atu o loo faatalitali mai mo i tatou taitoatasi. E leai se faataitaiga sili atu o i ai i tusitusiga paia e tusa ia ma le pasi atu i puapuaga nai lo le afioga a le Alii ia Iosefa Samita, le Perofeta, a o falepuipui i le Falepuipui o Liperate.

I se vaega na tautino atu ai e le Alii:

“Afai e tatala faamaga lautele mai e auvae lava o seoli le gutu ia te oe, ia e iloa, loʼu atalii e, o nei mea uma e te maua ai le poto masani, ma o le a avea mo ou lelei.

“Na afio ifo le Atalii o le Tagata i lalo o i latou uma. Ua sili atu ea oe ia te ia?

“… Aua le mataʼu i mea e mafai ona fai e tagata, aua o le a faatasi le Atua ma oe e faavavau ma faavavau lava.”¹⁹

Ua manino lava, e i ai so tatou Tama i le Lagi, e silafia ma alofa patino ia i tatou ma e malamalama atoatoa i o tatou puapuaga. O Lona Alo, o Iesu Keriso, o lo tatou Faaola ma le Togiola.

Na faamamafaina malosi uma e Peresitene Russell M. Nelson ma Peresitene M. Russell Ballard le taua o le lomiga lona lua fou o le Tala’i La’u Talalelei.²⁰ Ou te faasoa atu lo laua naunautaiga. O lenei lomiga fou, ua faamautu ai tusitusiga paia, o loo folafola malosi mai ai:

“I Lana taulaga togiola, na tauave ai e Iesu Keriso i Ona lava luga o tatou tiga, ma’i, ma faaletonu. Ona o lena mea, ua silafia ai e Ia ‘tusa ma la le tino le ala e fesoasoani ai i ona tagata e tusa ma o latou vaivaiga’ (Alema 7:12; tagai foi i le fuaiupu 11). Ua Ia valaau mai, ‘O mai ia te au,’ ma a tatou faia, Na Te aumai ia i tatou le malologa, faamoemoe, malosi, vaaiga, ma le faamalologa (Mataio 11:28; tagai foi i fuaiupu 29–30).

“A o tatou faalagolago atu ia Iesu Keriso ma Lana Togiola, e mafai ona Ia fesoasoani ia i tatou ina ia tatou onosa’ia o tatou faigata, ma’i, ma tiga. E mafai ona faatumulia i tatou i le olioli, filemu, ma le mafanafana. O mea uma e le talafeagai e uiga i le olaga e mafai ona faasa’oina e ala i le Togiola a Iesu Keriso.”²¹

E mafai ona tatou olioli i le avea ma soo fifilemu o Keriso

O le fuafuaga o le fiafia a le Tama mo Ana fanau e le gata e aofia ai le muai olaga ma le olaga faitino ae faapena foi se olaga e faavavau, e aofia ai se toe faatasiga sili ma le mamalu faatasi ma i latou ua maliliu. O mea sese uma o le a faasa’oina, ma o le a tatou vaai i ai i se manino atoatoa ma se vaaiga lē ponā ma le malamalama.

Ua faatusatusa e taitai o le Ekalesia lenei vaaiga i se tagata e savali atu i le ogatotonu o se tala faatino e tolu ona vaega.²² O i latou e aunoa ma se iloa o le fuafuaga a le Tama e le malamalama i le mea na tupu i le vaega muamua (po o le muai olaga) ma faamoemoega na faavaeina iina; e le malamalama foi i le faamaninoga ma folafolaga e oo mai i le vaega lona tolu, o le faataunuuga mamalu lea o le fuafuaga a le Tama.

E toatele e le talisapaiaina le faapea, i lalo o Lana fuafuaga alofa ma le atoatoa, o i latou e foliga mai e le atoatoa le malosi ona e le o so latou lava faaletonu, e le faasalaina i le iuga.²³

O loo manino lava tusitusiga paia: o soo fifilemu o Keriso o ē e amiotonu, mulimuli i le Faaola, ma tausia Ana poloaiga o le a faamanuiaina. O se tasi o mau e sili ona taua mo i latou e amiotonu, tusa po o a o latou tulaga i le olaga, o se vaega o le lauga a le Tupu o Peniamina i lona nuu. Ua ia folafola atu faapea o i latou e tausia ma le faamaoni poloaiga, e faamanuiaina i latou i mea uma, i lenei olaga ma “e talia i latou i le lagi … [ma] mau faatasi ma le Atua i se tulaga o le fiafia e le gata.”²⁴

Ua tatou iloa e toetoe o i tatou uma lava ua feagai ma afā faaletino ma faaleagaga i o tatou olaga, o nisi na faataumaoia. Na saunia e se Tama i le Lagi alofa ma Lona Alo, o Iesu Keriso, o le ao o Lana Ekalesia toefuataiina, ia tusitusiga paia mo i tatou ma perofeta e tapenaina i tatou, lapata’ia i tatou e uiga i mea mata’utia, ma aumaia faatonuga e tapena ai ma puipuia ai i tatou. O nisi faatonuga e moomia ai ona faatino loa lava, a o nisi e saunia ai le puipuiga mo le tele o tausaga i le lumanai. I le tuleiga tomua a le Alii i le Mataupu Faavae ma Feagaiga, vaega 1, o loo apoapoai’a ai i tatou “e ua’i atu i upu a perofeta.”²⁵

O leVaega 1 o loo lapata’ia ai foi i tatou, “Ina outou saunia ia, ina outou saunia ia, ona ua latalata mai le Alii.”²⁶ Ua saunia e le Alii mo Lona nuu se avanoa e sauniuni ai mo luitau o le a latou fetaiai.

Na tuuina mai e le Alii se faaaliga mamana ia Peresitene Polika Iaga i le aso 14 Ianuari, 1847, i Winter Quarters.²⁷ O lea faaaliga o se faataitaiga iloga o le sauniaina e le Alii o tagata mo mea o le a oo mai. Na amata e le Au Paia faamaoni la latou malaga umi i le maluapapa maugā o le Vanu o Sate Leki. Sa manuia lo latou fauina o le Malumalu o Navu ma maua ai sauniga faaola paia. Sa tutuliese i latou mai Misuri, ma sa tutuliese e e na sauaina i latou mai Navu i se vaitau matautia o le taumalulu. O le faaaliga ia Polika na tuu atu ai se fautuaga faatino i le ala e tapena ai mo le malaga umi. Sa tuuina e le Alii se faamamafa faapitoa i le tausiga o e matitiva, o tina ua oti a latou tane, o e ua matuaoti, ma aiga o i latou o loo tautua i le Autau a Mamona, a o faagasolo atu le itutino autu o le Au Paia i la latou malaga faigata.

E le gata i isi fautuaga ia ola amiotonu, sa faamamafaina foi e le Alii isi mataupu faavae e lua o loo faatatau lava foi i ona po nei.

Muamua, sa Ia fautuaina i latou ia “vivii atu i le Alii i pesega, ma musika, ma siva, faatasi ma se tatalo o le viiga ma le faafetai.”²⁸

Lona lua, na fautuaina e le Alii “afai e faanoanoa, ole atu i le Alii lou Atua i le talosaga, ina ia olioli o outou agaga.”²⁹

O nei apoapoaiga e lua o ni fautuaga sili foi ia mo o tatou lava aso. O olaga e tutumu i le faamanu, musika, ma le faafetai e tulagaese lava le faamanuiaina. O le tumu i le olioli ma faalagolago i le fesoasoani mai le lagi e ala i le tatalo o se ala mamana lea e avea ai ma soo fifilemu o Keriso O le tauivi e le aunoa ia fiafia e fesoasoani lea e aloese ai mai le atuatuvale i le agaga.

O le laina mulimuli o se viiga iloga o loo aumaia ai le tali taualuga i se mamanu matagofie: “E leai se faanoanoaga i le lalolagi e lē mafai e le lagi ona faamaloloina.”³⁰

I le avea ai ma se Aposetolo a le Alii o Iesu Keriso, ou te molimau atu o le a maua e “soo fifilemu o Keriso le filemu patino i lenei olaga ma se toefaatasiga mamalu faalelagi. Ou te tuu atu se molimau mautu i le paia o le Faaola ma le moni a’ia’i o Lana Togiola. O Ia o lo tatou Faaola, ma lo tatou Togiola. I le suafa o Iesu Keriso, amene.