Lotomaualalo e Talia ma Mulimuli Ai

I le mataupu lona lima o le Alema, o loo i ai se fesili faatupu manatu: “E mafai ea ona outou fai ifo, i totonu ia te outou lava, pe afai e valaaulia outou e feoti i le taimi nei, ua lava lo outou lotomaualalalo?”¹ O lena fesili o loo ta’u mai ai faapea o le lotomaualalo o se tulaga manaomia e tatau ai mo i tatou ia sauniuni e toefo’i atu i le afioaga o le Atua.

Tatou te mananao uma lava e mafaufau ua lava lo tatou lotomaualalo, ae e i ai ni nai aafiaga i le olaga tatou te iloa ai e tele lava ina ola le alii po o le tamaitai natura faamaualuga i totonu o i tatou.

Tele tausaga ua mavae, a o nonofo ai pea o ma afafine e toalua i le fale, sa tonu ia te au e faaali atu ia i la’ua ma lo’u toalua le vaega o le pisinisi lea sa ou vaaia i le kamupani sa ou faigaluega ai.

O lo’u faamoemoega moni lava o le faasino lea ia i latou o se nofoaga lea, e le pei o le matou aiga, e faia ai e tagata uma mea ou te faatonuina ai i latou e fai e aunoa ma se toe fesiligia o a’u. Ina ua matou taunuu i le faitotoa i luma, lea e masani ona otometi ona matala mai pe a latalata atu la’u taavale, sa ou ofo ona sa le’i matala mai i le taimi lea. Nai lo lena, sa sau se leoleo faitotoa ou te le’i vaai lava i ai muamua i lo’u olaga, i le taavale ma fesili mai mo la’u ID o le kamupani.

Sa ou fai atu i ai ou te le’i manaomia lava se ID e alu atu ai la’u taavale i totonu o le fanua ona ou fai atu lea i ai o le fesili faasausili masani: “E te iloa le tagata lea e te talanoa i ai?”

Lea na ia tali mai ai, “Ia, talu ai e leai sau ID o le kamupani, e le mafai ona ou iloa pe o ai oe, ma a o ou i ai i le faitotoa lenei, o le a le faatagaina oe e te ulufale mai i le fanua e aunoa ma se faailo talafeagai.”

Sa ou mafaufau e autilo i le faaata e faasaga i tua, e siaki po o le a se uiga faaalia o o’u afafine i nei mea uma, ae sa ou iloa o la sa matau lelei e o’u afafine sekone uma o lena taimi! O lo’u toalua sa nofo i o’u autafa sa lulu lona ulu e le talitonu i la’u amio. O la’u toe taumafaiga lava o le faatoese lea i le leoleo ma ou faamalie i ai i le leaga ona ou faia o ia. “Ua e magalo,” na ia fai mai ai, “ae o le leai o se ID a le kamupani o le a e le sau ai i totonu i le asō!”

Ona toe alu lemu ai lea o la’u taavale i le fale e aumai la’u ID, ua ou aoaoina lenei lesona taua: a tatou filifili e le lotomaualalo, e i’u ina faamaasiasia i tatou.

I le Faataoto tatou te maua ai, “O le faamaualuga o le tagata e faamaualaloina ai o ia: a o le faamaualalo o le loto e maua ai le viiga.”² Ina ia mafai ona atia’e le lotomaualalo, e tatau ona tatou malamalama i le uiga moni o le matalalaga o le talalelei.

E faafenumia’i e ni isi tagata le lotomaualalo ma isi mea, mo se faataitaiga, o le mativa. Ae o le mea moni e toatele i latou e matitiva ma faamaualuluga ae e toatele foi i latou e mauoa ae lotomaualalo. O isi e matamumuli lava pe vaai maualalo foi ia i latou lava e foliga mai fafo e lotomaualalo, ae o totonu o loto e tutumu i le faamaualuga.

O le a ea la le lotomaualalo? E tusa ai ma le Tala’i La’u Talalelei, o se naunau lea e gauai atu i le finagalo o le Alii. … O le faigofie ona aoao. … [O se] elemene autu mo le tuputupu a’e faaleagaga.”³

E i ai moni le tele o avanoa mo i tatou uma e faaleleia ai lenei uiga paia faaKeriso. Ou te fia vailiilia muamua pe o le a le tele o lo tatou lotomaualalo o i ai, pe sa tatau ona i ai, i le mulimuli i fautuaga a lo tatou perofeta. O sina suega faatopetope e mafai ona taitasi i tatou ma fai:

• O tatou ta’ua le igoa atoa o le Ekalesia i a tatou fegalegaleaiga uma? Na saunoa Peresitene Nelson, “O le aveesea o le suafa o le Alii mai le Ekalesia a le Alii o se manumalo tele lea mo Satani.”⁴

• O tatou faamuamua le Atua i o tatou olaga e ala i le taliaina o le valaaulia patino a lo tatou perofeta? “O le asō ou te valaau atu ai i o tatou tagata o le Ekalesia i soo se mea ia taimua i le lafoa’i o uiga ma soo se faatinoga o le faailoga lanu.”⁵

• Pe o tatou faatoilaloina le lalolagi, ma faatuatuaina le aoaoga faavae a Keriso e sili atu i lo filosofia a tagata, e pei ona sa aoao mai lo tatou perofeta?⁶

• Pe o avea i tatou o ni tagata e faatupuina le filemu i le fai atu o mea lelei i tagata ma e uiga i tagata? Na aoao mai mea nei e Peresitene Nelson ia i tatou i le konafesi aoao talu ai: “Afai o i ai ni isi mea e mamā, matagofie, pe logoleleia pe ta’uleleia, e mafai ona tatou fai atu ai e uiga i se isi tagata—pe a o tilotilo mai pe i ona tua—o le mea lena e tatau ona avea ma a tatou aga masani o fesootaiga.”⁷

O ni faatonuga faigofie nei ae e mamana. Manatua, na pau le mea na tatau ona faia e le nuu o Mose ina ia faamaloloina ai o le vaai atu i le gata apamemea sa ia sisiina i luga.⁸ Ae “ona o le faatauvaa o le ala, po o lona faigofie tele, sa i ai le toatele o e na fano.”⁹

I le gasologa o lenei konafesi ua tatou faalogo ai ma o le a faalogo ai i fautuaga e le uma a o tatou perofeta ma aposetolo. O se taimi tonu e atia’e ai le lotomaualalo ma tuu atu ia tofatumoanaina o tatou manatu malolosi i se talitonuga maumaututu sili atu faapea, e fetalai mai le Alii e ala mai i nei taitai filifilia.

E sili atu i na mea uma, o le atiina a’e o le lotomaualalo, e tatau ai foi ona tatou malamalama ma talia e le mafai ona tatou faatoilaloina o tatou luitau pe ausia o tatou gafatia atoatoa e ala i a tatou lava taumafaiga na o i tatou. O failauga faaosofia, tusitala, faiaoga faafoe ma le au faatosina i le lalolagi atoa, aemaise i luga o fola o upega tafa’ilagi, o le a faapea mai e faalagolago mea uma ia i tatou ma a tatou faatinoga. E talitonu le lalolagi i le lima o le tagata.

Ae o le talalelei toefuataiina ua tatou aoao ai e faapea, tatou te faalagolago tele i le agalelei o le Tama Faalelagi ma le Togiola a lo tatou Faaola o Iesu Keriso, “ona ua matou iloa e faaolaina i tatou i le alofa tunoa, pe a uma mea uma e mafai ona tatou faia.”¹⁰ O le mafuaaga lea e taua tele ai le osia ma tausia o feagaiga ma le Atua, aua o le faia o lena mea o le a tatou maua ai atoatoa le mana faamalolo, e mafai ai, ma faaatoatoaina ai o Iesu Keriso e ala i Lana Togiola.

O le auai i sauniga faamanatuga i vaiaso taitasi ma tapuai e le aunoa i le malumalu e auai i sauniga ma maua ma toefaafou feagaiga, o se faailoga ua tatou aloaia lo tatou faalagolago i le Tama Faalelagi ma lo tatou Faaola o Iesu Keriso. O le a tatou valaaulia lo La’ua mana i o tatou olaga e fesoasoani ia i tatou i o tatou faafitauli uma ma i’u ai ina faataunuuina le fuataga o lo tatou foafoaga.

E le’i leva tele atu na toe tofotofoina ai foi le maualuga o lo’u lotomaualalo ma le malamalama i lo’u faalagolago i le Alii. Sa ou i totonu o se taavale la’u pasese ou te alu i le malaevaalele e pu’e se vaalele mo se malaga puupuu i se nofoaga sa i ai se tulaga faigata tele e foia. Sa tilotilo mai le avetaavale e le o se tagata o le Ekalesia, ia te a’u mai le faata, ma fai mai, “Ua mafai ona ou iloa atu e te faalē o manuia i le asō!”

“O mafai ona e iloaina? Sa ou fesili atu ai.

“Ioe,” o lana tali mai lea. Ona ia fai mai lea o se tala faapea, “E i ai moni lava sou uiga e lē lelei!”

Sa ou faamatala atu ia te ia e fai lava si faigata o le tulaga e tatau ona ou taulimaina lea na ia fesili mai ai ia te au, “Ua e faia mea uma i lou malosi e foia ai lena mea?”

Sa ou tali atu ua uma ona ou faia mea uma ou te mafaia.

Ona ia fai mai ai lea o se tala ou te le’i faagaloina lava, “Ia tuu la’ia i aao o le Atua, ma o le a lelei mea uma.”

Ou te ta’utino atu sa faaosoosoina a’u e fesili atu ia te ia, “O e iloa le tagata lena e te talanoa i ai?” Ae ou te lei faia! O le mea sa ou faia o le faamaualalo o a’u lava ia i luma o le Alii i lena malaga atoa e tasi le itula, ma ole atu mo se fesoasoani mai le lagi. Ina ua ou tuua le vaalele, sa ou faalogo ua uma ona foia le tulaga faigata sa tatau ona foia i se tulaga lelei, ma e le o toe tau manaomia ai lo’u i ai.

Uso e ma tuafafine, o le poloaiga, valaaulia ma le folafolaga mai le Alii e manino lava ma mafanafana: “Ia e lotomaualalo; ma o le a taitai oe e le Alii lou Atua i le lima, ma tuu mai ia te oe tali i au tatalo.”¹¹

Tau ina ia tatou lotomaualalalo e mulimuli i fautuaga a o tatou perofeta ma talia e na o le Atua lava ma Iesu Keriso e mafai ona suia i tatou—e ala i sauniga ma feagaiga tatou te mauaina i Lana Ekalesia—i o tatou ituaiga aupito sili o i tatou lava i lenei olaga ma, e i ai se aso, e faaatoatoaina ai i tatou ia Keriso. I le suafa o Iesu Keriso, amene.