O Loo Tautalagia Iinei le Alofa

E usuina e a tatou fanau Peraimeri, “O loo tautalagia iinei le alofa.”¹

Sa ou tuuina atu ia Sister Gong se asoa e i ai se lote laitiiti. Sa ou vaneina ai le togi-togi, togi-togi, togi-togi-vase. O i latou ua masani i le alafapeta faaMorse o le a iloaina ia mataitusi I, I, U. Ae sa ou faaaofia ai se mataitusi faalilolilo lona lua. I le Faa-Saina Meniterini, o le “ai” o lona uiga o le “alofa.” O lea la, o le faauigaina faalua, o le savali o le “Ou te alofa ia te oe.” Lo’u au Susan, “Ou te, alofa (爱), ia Oe.”

E tele gagana tatou te tautatala ai i le alofa. Ua ta’u mai ia te a’u o le aiga o le tagata soifua e tautala i gagana ola e 7,168.² I le Ekalesia tatou te tautatala ai i gagana autu e 575, faatasi ai ma le tele o gagana e patino [i ni ituaiga o tagata]. Tatou te fesootai atu faamoemoega, faamamafaga, ma lagona e ala i faatufugaga, musika, siva, faatusa talafeagai, faamatalaga i le va o ni tagata ma i se tagata.³

O le asō, sei o tatou talanoa e uiga i gagana e tolu o le alofa o le talalelei: o le gagana o le mafanafana ma le migao, o le gagana o le auauna atu ma le ositaulaga, ma le gagana o le i ai i feagaiga.

Muamua, o le gagana o le talalelei o le mafanafana ma le migao.

Faatasi ai ma le mafanafana ma le migao, na fesili atu ai Sister Gong i tamaiti ma le autalavou, “E faapefea ona e iloa e alolofa ou matua ma aiga ia te oe?”

I Kuatemala, e fai mai tamaiti, “E galulue malosi o’u matua e fafaga lo matou aiga.” I Amerika i Matu, e fai mai tamaiti, “E faitau mai e o’u matua ni tala ia te a’u ma faamoe a’u i lo’u moega i le po.” I le Nuu Paia, e fai mai tamaiti, “O o’u matua e puipui a’u ia saogalemu.” I Kana, Aferika i Sisifo, e fai mai tamaiti, “E fesoasoani o’u matua i a’u sini o Tamaiti ma le Autalavou.”

Sa fai mai se tasi o tamaitiiti, “E ui lava e lelavā tele o ia ina ua uma ona faigaluega i le aso atoa, ae e sau i fafo lo’u tina ma te taaalo.” Sa tagi lona tina ina ua ia faalogo e taua ana osigataulaga i aso taitasi. Sa fai mai se tamaitai talavou, “E ui lava o nisi taimi ma te le ioe faatasi ai ma lo’u tina, ae ou te faatuatuaina lo’u tina.” Sa tagi foi lona tina.

O nisi taimi e manaomia ai ona tatou iloa o le alofa o loo tautalagia iinei e faalogoina ma talisapaia iinei.

Faatasi ai ma le mafanafana ma le migao, e taulai atu a tatou sauniga faamanatuga ma isi sauniga ia Iesu Keriso. Tatou te tautatala ma le migao e uiga i le Togiola a Iesu Keriso, e patino ma moni, ae le na o se ta’ua patino ma le faaaogaaga o le togiola. Tatou te ta’ua le Ekalesia toefuataiina a Iesu Keriso i Lona suafa, O Le Ekalesia a Iesu Keriso o le Au Paia o Aso e Gata Ai. Tatou te faaaogaina le gagana migao o le tatalo pe a tatou talanoa atu i le Tama Faalelagi ma le faaaloalo mafanafana pe a tatou talanoa i le tasi ma le isi. A o tatou iloaina Iesu Keriso i le fatu o feagaiga o le malumalu, e itiiti lo tatou ta’ua o le “o atu i le malumalu” ae sili atu le “o mai ia Iesu Keriso i le maota o le Alii.” E musumusu mai feagaiga taitasi, “O loo tautalagia iinei le alofa.”

Fai mai tagata fou o utofaamatalaga a le Ekalesia e masani ona manaomia ai le faauigaga. Tatou te ’ata’ata i le manatu faapea o le “fale o le siteki” [stake house] e mafai ona faauigaina o se taumafataga i le afiafi o se fasipovi manaia; o le “fale o le uarota” [ward building] e mafai ona faailoa mai ai se falemai; o “sauniga amata” e mafai ona valaaulia ai i tatou e tago i le ulu, tauau, tulivae, ma tamaivae i le pakaga taavale a le ekalesia. Ae, faamolemole, ia tatou malamalama ma agalelei a o tatou aoao faatasi i gagana fou o le alofa. I le fou ai i le lotu, sa ta’u atu i se tagata liliu mai ua puupuu tele lona lausakete. Nai lo le tiga ai, sa ia tali atu, “Ua liua lo’u loto; faamolemole ia onosai a o taumafai mai o’u lausakete.”⁴

O upu tatou te faaaogaina e mafai ona tatou latalata atili ai pe taumamao ai mai isi Kerisiano ma uo. O nisi taimi tatou te talanoa ai e uiga i le galuega faafaifeautalai, galuega o le malumalu, galuega alofa ma le uelefea i auala e ono mafua ai ona talitonu isi tatou te mafaufau tatou te galulue na o i tatou. Ia tatou talanoa i taimi uma ma le mafanafana ma le agaga faafetai migao mo le galuega ma le mamalu o le Atua ma galuega, alofa mutimutivale, ma le alofa tunoa o Iesu Keriso ma Lana taulaga togiola.⁵

Lona lua, o le gagana o le talalelei o le auauna atu ma le ositaulaga.

A o tatou toe faapotopoto i vaiaso taitasi i le lotu e faamamalu ma olioli i le aso Sapati, e mafai ona tatou faailoa atu la tatou tautinoga o feagaiga o le faamanatuga ia Iesu Keriso ma le tasi ma le isi e ala i o tatou valaauga i le Ekalesia, faaaumea, fegalegaleaiga, ma auaunaga.

Pe a ou fesili atu i taitai o le Ekalesia i le lotoifale po o a ni o latou atugaluga, e taufai fai mai uma uso ma tuafafine, “O nisi o o tatou tagata e le taliaina valaauga o le Ekalesia.” O valaauga e auauna atu i le Alii ma le tasi ma le isi i Lana Ekalesia e tuu mai ai le avanoa e faateleina ai le agaalofa, gafatia, ma le lotomaualalo. A o vaetofia i tatou, e mafai ona tatou maua musumusuga a le Alii e siitia ma faamalolosia ai isi ma i tatou lava. Ioe, o tulaga fesuisuiai ma vaitau o o tatou olaga e ono aafia ai lo tatou gafatia e auauna atu ai, ae e faamoemoe lava e le o lo tatou lava manao. Faatasi ai ma le Tupu o Peniamina, tatou te faapea atu, “A na ou tagolima ou te avatu lava”⁶ ma ofo atu mea uma tatou te mafaia.

Taitai o le siteki ma le uarota, se’i fai la tatou vaega. A o tatou valaau (ma faamalolo) uso ma tuafafine e auauna atu i le Ekalesia a le Alii, faamolemole ia tatou faia ma le mamalu ma musumusuga. Fesoasoani ia lagona e i latou taitoatasi le talisapaiaina ma e mafai ona faamanuiaina i latou. Faamolemole ia fefautuaai ma faalogo atu i taitai tamaitai. Tau ina ia tatou manatua, e pei ona aoao mai Peresitene J. Reuben Clark, i le Ekalesia a le Alii tatou te auauna atu i le mea ua valaauina i ai, “o lea tulaga e le sailia pe teena e se tasi.”⁷

Ina ua ma faaipoipo ma Sister Gong, sa fautua mai Elder David B. Haight: “Ia i ai i taimi uma se valaauga i le Ekalesia. Aemaise lava pe a pisi le olaga,” na ia saunoa ai, “e tatau ona lua lagona le alofa o le Alii mo i latou lua te auauna i ai ma mo oulua a o oulua auauna atu.” Ou te folafola atu o loo tautalagia le alofa iinei, iina, ma i soo se mea a o tatou tali atu ioe i taitai o le Ekalesia e auauna atu i le Alii i Lana Ekalesia e ala i Lona Agaga ma a tatou feagaiga.

O le Ekalesia toefuataiina a le Alii e mafai ona avea ma se [nofoaga] e faatupu ma atia’e ai se nuu o Siona. A o tatou tapuai, auauna atu, olioli, ma aoao faatasi i Lona alofa, tatou te taula i le tasi ma le isi i Lana talalelei. Atonu tatou te le au faatasi i tulaga faaupufai po o faafitauli faaagafesootai ae e maua le lotogatasi a o tatou pepese faatasi le aufaipese a le uarota. Tatou te faafaileleina sootaga ma tau ma le faaesea a o tatou auauna atu e le aunoa ma o tatou loto i totonu o aiga o le tasi ma le isi ma pitonuu.

I taimi o asiasiga a tagata o le ekalesia ma peresitene o siteki, ou te lagona lo latou alolofa loloto mo tagata o le ekalesia i tulaga uma. A o matou tietie atu ma pasia fale o tagata o lana siteki, sa ta’ua e se tasi o peresitene o le siteki e faapea, pe tatou te nonofo i se fale e i ai se vai taele po o se fale e fola palapala, o le auaunaga i le Ekalesia o se avanoa lea e masani ona aofia ai le ositaulaga. Ae, sa ia matauina ma le atamai, pe a tatou auauna atu ma ositaulaga faatasi i le talalelei, tatou te maua ni faaletonu laiti ma le filemu sili atu. Pe a tatou tuu o Ia, Iesu Keriso e fesoasoani tatou te tautalagia Lona alofa iinei.

I lenei taumafanafana, sa feiloai ai lo matou aiga i ni tagata lelei ma uo o le Ekalesia i Loughborough ma Oxford, Egelani. O nei faatasiga anoa na faamanatu mai ai ia te a’u le auala e mafai ai e gaoioiga faaagafesootai ma auaunaga a uarota ona fausia ni sootaga fou ma tumau o le talalelei. Mo se taimi umi sa ou lagonaina ai, i le tele o nofoaga i le Ekalesia, o ni nai isi gaoioiga a le uarota, ioe, pe a fuafuaina ma faatinoina ma faamoemoega o le talalelei, e mafai ona lalagaina faatasi ai i tatou ma se auai sili atu ma le lotogatasi.

O se tasi o taitai ma le komiti o gaoioiga musuia a le uarota e faafaileleina ai tagata taitoatasi ma se nuu o le Au Paia. O gaoioiga ua fuafuaina lelei e fesoasoani i tagata uma ia lagona le faatauaina, faaaofia ai, ma valaaulia e faatino se matafaioi manaomia. O gaoioiga faapena e faafesootai ai tausaga ma talaaga, fatu ai manatuaga tumau, ma e mafai ona faatinoina i se tau itiiti pe leai foi se tau. O gaoioiga fiafia o le talalelei e valaaulia ai foi tuaoi ma uo.

O fegalegaleaiga ma auaunaga e masani ona o faatasi. E iloa e le autalavou matutua afai e te manao moni e faamasani i se tasi ona vali lea i autafa o le tasi ma le isi i se apefai i se galuega faatino.

Ata

O talavou matutua o loo valivali i se galuega fesoasoani.

Ioe, e leai se tagata ma e leai se aiga e atoatoa. Tatou te manaomia uma lava le fesoasoani e tautalagia lelei ai le alofa iinei. “O le alofa atoatoa e faateaeseina ai le fefe.”⁸ O le faatuatua, auaunaga, ma le ositaulaga e faalatalata atili atu ai i tatou i lo tatou Faaola. O le tele o le agaalofa, faamaoni, ma le le manatu faapito o a tatou auaunaga ma osigataulaga o loo ia te Ia, o le tele foi lea o lo tatou amata malamalama i le agaalofa ma le alofa tunoa togiola a Iesu Keriso mo i tatou.

Ma o lena mea e aumaia ai i tatou i le gagana o le talalelei o le i ai i feagaiga.

Ua tatou ola i se lalolagi manatu faapito. O le tele lava o le “Ou te filifili au lava.” E pei lava ua tatou talitonu ua sili atu lo tatou iloa i mea tatou te fiafia i ai ma le auala e tulitulimatagauina ai.

Ae i le iuga, e lē moni lea. Ua faaalia e Iesu Keriso lenei upumoni mamana e faavavau:

“Aua ai se fia faasaogalemuina lona ola, e maumau ai ia te ia; a o lē faamaumau ai lona ola ona o a’u, e maua ai e ia.

“Aua se a le aoga i le tagata, pe afai na te maua le lalolagi uma, a e maumau lona ola?”⁹

Ua ofoina mai e Iesu Keriso se auala sili atu—o sootaga e faavae i luga o feagaiga paia, e malosi atu nai lo maea o le oti. O le i ai i se feagaiga ma le Atua ma le tasi ma le isi e mafai ona faamaloloina ma faapaiaina a tatou sootaga sili ona pele. O le mea moni, e sili atu le silafia ma le alofa o le Alii ia i tatou nai lo tatou iloaina po o le alolofa ia i tatou lava. O le mea moni, a tatou osifeagaigaina mea uma o ia i tatou, e mafai ona avea i tatou ma tagata sili atu nai lo tagata o tatou i ai. O le mana ma le poto o le Atua e mafai ona faamanuiaina ai i tatou i meaalofa lelei uma, i Lana taimi ma [Lana] ala.

O le atamai o polokalama faigata (PF) ua tele laasaga i le faaliliuga o gagana. Ua leva ona te’a aso e ono faaliliu ai e se komepiuta le fasifuaitau e loloto atu lona uiga “Ua manao i ai le loto, a o le tino ua vaivai” i le “Ua lelei le uaina, ae ua leaga le aano o manufasi.” O le mea e malie ai, o le fai soo o faataitaiga lautele o se gagana e aoao ai se komepiuta i se gagana e sili atu ona lelei nai lo le aoaoina o se komepiuta i tulafono o le kalama.

E faapena foi, o o tatou lava aafiaga tuusa’o ma faifai pea atonu o lo tatou auala sili faaleagaga lea e aoao ai gagana o le talalelei o le mafanafana ma le migao, auaunaga ma le ositaulaga, ma le auai i feagaiga.

O lea la, o fea ma e faapefea ona fetalai atu Iesu Keriso ia te oe i le alofa?

O fea ma e faapefea ona e faalogo i Lona alofa o tautalagia iinei?

Tau ina ia tatou taitasi ma aoao e tautatala ma lagona Lona alofa iinei, i o tatou loto ma aiga, ma i o tatou valaauga o le talalelei, gaoioiga, auaunaga, ma le auauna atu.

I le fuafuaga a le Atua, e i ai se aso o le a taitasi i tatou ona siitia atu mai i lenei olaga i le olaga a sau. Pe a tatou feiloai ma le Alii, ou te vaai faalemafaufau ia te Ia o fetalai mai, i upu o faatonuga ma folafolaga, “O loo tautalagia Lo’u alofa iinei.” I le suafa paia o Iesu Keriso, amene.