Malo o Mamalu

Mai faaaliga i ona po nei, ua tatou iloa ai le taunuuga taualuga o i latou uma o ē ola i le lalolagi, e le o le manatu papa’u faapea o le lagi e mo le au amiotonu ma mafatiaga e faavavau o seoli mo isi o totoe. O le fuafuaga alofa a le Atua mo Ana fanau e aofia ai le mea moni lenei na aoao mai e lo tatou Faaola, o Iesu Keriso: “E tele mea e nonofo ai i le maota o lo’u Tama.”¹

O le aoaoga faavae ua faaalia mai o le Ekalesia toefuataiina a Iesu Keriso ua aoao mai ai e faapea, o fanau uma a le Atua—faatasi ma ni tuusaunoaga e matua faatapulaaina ona iloilo iinei—o le a iu ina mautofi i le tasi o malo e tolu o le mamalu, e oo lava i se aupito itiiti lea e “sili mamao atu i lo malamalamaaga uma.”² A mavae se vaitaimi e pagatia ai le ‘au le usiusitai mo a latou agasala, o ia puapuaga e saunia ai i latou mo le mea o le a sosoo ai, o le a toetutu tagata uma ma faaauau atu ai i le Faamasinoga Mulimuli a le Alii o Iesu Keriso. O iina, o lo tatou Faaola alofa, o lē, ua aoaoina ai i tatou “ua faamamaluina le Tama, ma laveai galuega uma a ona aao,”³ o le a auina atu fanau uma a le Atua i se tasi o nei malo o le mamalu e tusa ai ma manaoga na latou faaalia e ala i a latou filifiliga.

O se tasi aoaoga faavae ma faiga tulagaese a le Ekalesia toefuataiina, o poloaiga ma feagaiga ua faaalia mai lea o loo ofo atu ai i fanau uma a le Atua le avanoa paia o le faaagavaaina mo le tikeri aupito maualuga o le mamalu i le malo selesitila. O lena taunuuga aupito maualuga—le faaeaga i le malo selesitila—o le taulaiga lea a Le Ekalesia a Iesu Keriso o le Au Paia o Aso e Gata Ai.

Mai faaaliga i ona po nei, ua i ai i le Au Paia o Aso e Gata Ai lenei malamalamaaga tulaga ese i le fuafuaga o le fiafia a le Atua mo Ana fanau. E amata lena fuafuaga i lo tatou ola o ni agaga ae tatou te le’i fananau mai, ma o loo faaalia mai ai le faamoemoega ma tuutuuga o la tatou malaga filifilia i le olaga nei ma lo tatou taunuuga moomia pe a mavae le oti.

Ua tatou iloa mai faaaliga i ona po nei e faapea “o malo uma ua i ai se tulafono ua tuuina atu i ai”⁴ ma o le malo o le mamalu tatou te maua i le Faamasinoga Mulimuli e filima’oti i tulafono tatou te filifili e mulimuli ai i la tatou malaga i le olaga nei. I lalo o lena fuafuaga alofa, o loo i ai ni malo se tele—o maota e tele—ina ia mafai ona mautofi ai fanau uma a le Atua i se malo o le mamalu, e mafai ona latou “ola ai” ma le fiafia i ona tulafono.

A tatou faamatalaina le natura ma tulaga moomia o malo taitasi e tolu i le fuafuaga a le Tama, tatou te amata i le malo aupito maualuga, lea e taulai atu i poloaiga ma sauniga paia ua faaalia mai e le Atua e ala mai i Le Ekalesia a Iesu Keriso o le Au Paia o Aso e Gata Ai. I le mamalu “selesitila”⁵ e tolu ona atufola,⁶ o lona atufola aupito maualuga o le faaeaga i le malo selesitila. O le nofoaga lea o i latou “o ē ua mauaina lona atoatoa, ma lona mamalu,” o le mea lea, “o i latou o ni atua, o atalii [ma afafine] lava o le Atua”⁷ ma “nonofo i luma o le Atua ma lana Keriso e faavavau faavavau lava.”⁸ E ala mai i faaaliga, ua faaalia mai ai e le Atua ia tulafono, sauniga, ma feagaiga e faavavau e tatau ona tausia e atia’e ai uiga faaleatua e tatau ai e maua ai lenei gafatia paia. O Le Ekalesia a Iesu Keriso o le Au Paia o Aso e Gata Ai e taulai atu i mea nei ona o le faamoemoega o lenei Ekalesia toefuataiina, o le saunia lea o fanau a le Atua mo le faaolataga i le mamalu selesitila, ma, ma le mea sili ona patino, mo le faaeaga i lona tikeri sili ona maualuga.

O le fuafuaga a le Atua, o loo faavae i luga o upumoni e faavavau, e manaomia ai faapea, o le faaeaga e na o le faamaoni lava i feagaiga o se faaipoipoga e faavavau i le va o se tane ma se fafine i le malumalu paia e mafai ona maua ai,⁹ o lea faaipoipoga o le a i’u ina avanoa mo i latou uma e faamaoni. O le mafuaaga lea tatou te aoao atu ai e faapea, “o le tulaga tane po o le fafine [o le tagata] o se vaega taua lea o le muai olaga, olaga faitino, ma le faasinomaga e faavavau ma le faamoemoega.”¹⁰

O se aoaoga taua tulagaese e fesoasoani ia i tatou ia saunia ai mo le ola e faavavau, o le folafolaga i le aiga i le 1995.¹¹ O ona folafolaga ua faamanino mai ai tulaga manaomia e saunia ai i tatou e nonofo ma le Atua le Tama ma Lona Alo, o Iesu Keriso. O i latou e le malamalama atoatoa i le fuafuaga alofa a le Tama mo Ana fanau e ono manatu i lenei folafolaga i le aiga ua na o se faamatalaga o aiaiga faavae e fai ma fesuisuiai. O le mea e ese ai, tatou te faamautu atu o le folafolaga i le aiga, ua faavaeina i luga o aoaoga faavae lēmasuia, ua faamatalaina ai le ituaiga o mafutaga faaleaiga lea e mafai ona tupu ai le vaega sili ona taua o lo tatou atinaega e faavavau.

Ua faamatala mai e le Aposetolo o Paulo ia tikeri e tolu o le mamalu, ua faatusatusa i latou i mamalu o le la, masina, ma fetu.¹² Ua ia faaigoaina le aupito maualuga o le “selesitila” ma le lona lua o le “terasitila.”¹³ Na te le o faaigoaina le aupito maualalo, ae o se faaaliga ia Iosefa Samita na faaopoopo ai lona igoa: “telesitila.”¹⁴ O loo faamatala foi e se isi faaaliga le natura o tagata e totofi i nei malo taitasi o le mamalu. O i latou e le filifili “e ola i le tulafono o se malo selesitila”¹⁵ o le a mautofi i se isi malo o le mamalu, e maualalo ifo nai le selesitila ae ua fetaui ma tulafono ua latou filifilia ma mafai ona “ola” fiafia ai. O lena upu o le ola ai, o loo faaaoga tele i tusitusiga paia, o lona uiga o se tulaga mautu.¹⁶ Mo se faataitaiga, o i latou i le malo terasitila—e faatusatusa i le manatu faavae lauiloa o le lagi—“o i latou ia o ē e mauaina mamalu o le Alo, ae le o le atoatoa o le Tama.”¹⁷ O i latou ia o “tagata mamalu o le lalolagi, o ē na faatauasoina i le faitogafiti o tagata,”¹⁸ ae “sa le’i totoa i le molimau ia Iesu.”¹⁹

O le faamatalaga ua faaalia mai o i latou e tofia i le malo aupito maualalo o malo o le mamalu, le telesitila, o “ia o lē e lē mafai ona ola i le tulafono o se malo terasitila.”²⁰ Ua faapea ona faamatalaina ai i latou o ē teena le Faaola ma e le’i i ai ni tapulaa paia mo a latou amioga na latou tausisia. O le malo lea e nonofo ai ē amioleaga, i le mavae ai ona latou mafatia mo a latou agasala. O loo faamatalaina i latou nei i faaaliga i ona po nei e faapea, “o i latou ia o ē sa le taliaina le talalelei a Keriso, po o le molimau ia Iesu. …

“O i latou ia o e o pepelo, ma faataulaitu, ma mulilulua, ma faitaaga, ma soo se tasi e fiafia i le pepelo ma fai le pepelo.”²¹

I le talanoa ai e uiga i malo e tolu o le mamalu ma lana vaaiga mamao faaperofeta, na tusia talu ai nei e Peresitene Russell M. Nelson: “O le olaga nei e matua puupuu lava pe a faatusatusa i le faavavau. Ae e ui ina puupuu tele lenei olaga, ae e taua tele! Mafaufau toto’a i lona faataatiaga: I le taimi o lenei olaga, e te filifili ai po o a tulafono e te loto e usita’ia—po o tulafono o le malo selesitila, po o le teresitila, po o le telesitila—ma, o le mea lea, o le fea malo o le mamalu o le a e ola ai e faavavau. Se fuafuaga ina a maeu! O se fuafuaga e faamamalu atoa ai lau faitalia.”²²

Na aoao mai e le Aposetolo o Paulo e faapea, o aoaoga ma poloaiga a le Alii na tuuina mai ina ia tatou maua uma ai “le fua o le ua matua e tatau ma le tumu o Keriso.”²³ O lena faagasologa e manaomia ai le anoanoai o isi mea nai le mauaina o le malamalama. E matua le lava lava mo i tatou le faatalitonuina i le talalelei; ae tatau ona tatou amio ai ina ia mafai ona tatou liua ai. I se faatusatusaga i isi tala’iga, ia e aoao ai i tatou ina ia iloa se mea, ua lu’iina i tatou e le talalelei a Iesu Keriso ia avea ma se mea.

Mai i na aoaoga tatou te faia ai se faaiuga faapea, o le Faamasinoga Mulimuli e le na o se iloiloga o se aofa’iga atoa o amioga lelei ma amioga leaga—o mea na tatou faia. E faavae i le aafiaga tupito o a tatou faatinoga ma mafaufauga—o tagata ua avea aii tatou. Tatou te agavaa mo le ola e faavavau e ala i se faagasologa o le liua. E pei ona faaaogaina ii, o le upu lea o faauigaga e tele, o loo ta’u mai ai se suiga tele o le natura. E lē lava mo soo se tasi le tau lava ina faaolioli. O poloaiga, sauniga, ma feagaiga o le talalelei ua le o se lisi o tupeteu e manaomia ona fai i se teugatupe i le lagi. O le talalelei a Iesu Keriso o se fuafuaga lea ua faaali mai ai ia i tatou le auala e avea ai ma tagata ua finagalo lo tatou Tama Faalelagi e avea ai i tatou.²⁴

Ona o Iesu Keriso ma Lana Togiola, a tatou sese i lenei olaga, e mafai ona tatou salamo ma toe foi i le ala o feagaiga lea e tau atu i le mea e finagalo ai lo tatou Tama Faalelagi mo i tatou.

Ua aoao mai le Tusi a Mamona, “o le olaga lenei o le taimi lea mo [tatou] e saunia ai e feiloai ma le Atua.”²⁵ Ae o lena tapulaa faigata i “lenei olaga” na tuuina mai ai se matalalaga e i ai le faamoemoe (pe a i se isi itu mo ni nai tagata) e ala i le mea na faaalia e le Alii ia Peresitene Iosefa F. Samita, lea ua tusia nei i le Mataupu Faavae ma Feagaiga vaega 138. “Sa ou vaai” na tusia ai e le perofeta, “o toeaina faamaoni o lenei tisipenisione, pe a tuua e i latou lenei olaga faaletino, e faaauau a latou galuega i le talaiga o le talalelei o le salamo ma le togiolaina, e ala i le taulaga a le Alo e Toatasi na Fanaua o le Atua, i totonu o e o loo i le pouliuli ma o loo i lalo o le pologa o le agasala i le lalolagi tele o agaga o e ua oti.

“O e e salamo o e ua oti o le a togiolaina, e ala i le usiusitai i sauniga o le maota o le Atua,

“Ma a uma ona latou totogi o le sala o a latou solitulafono, ma mulumulu mamā, o le a latou maua se taui e tusa ma a latou galuega, aua o i latou o ni suli o le olataga.”²⁶

E le gata i lea, ua tatou iloa o le meleniuma, le afe o tausaga lea e sosoo ma le Afio Mai Faalua o le Faaola, o le a avea o se taimi e faatino ai sauniga manaomia mo i latou e le’i mauaina na sauniga i o latou olaga faitino.²⁷

E tele naua mea tatou te le o iloa e uiga i vaitau tetele e tolu i le ata o le faaolataga ma o latou sootaga i le tasi ma le isi: (1) o le lalolagi o agaga i le muai olaga, (2) olaga faitino, ma (3) le isi olaga. Ae ua tatou iloa nei upumoni e faavavau: “O le faaolataga o se mataupu e patino i le tagata lava ia, ae o le faaeaga o se mataupu faaleaiga.”²⁸ O loo i ai so tatou Tama Faalelagi alofa o lē o le a silasila ua tatou maua faamanuiaga uma ma avanoa uma e faatagaina e o tatou lava manaoga ma filifiliga. Ua tatou iloa foi o le a Ia le faamalosia lava se tasi i se sootaga o faamauga pe a le manao ai o ia. O faamanuiaga o se sootaga faamauina ua faamautinoa mo i latou uma o ē tausi i a latou feagaiga ae le mafai lava e ala i le faamalosia o se sootaga faamauina i luga o se isi tagata, o lē e le agavaa pe lē loto i ai.

O’u uso e ma tuafafine pele, ou te molimau atu i le moni o nei mea. Ou te molimau atu o lo tatou Alii o Iesu Keriso, “o le pogai ma le iuga o lo tatou faatuatua,”²⁹ o Lana Togiola, i lalo o le fuafuaga a lo tatou Tama i le Lagi, ua mafai ai mea uma, i le suafa o Iesu Keriso, amene.