O Le Mana o Iesu Keriso i o Tatou Olaga i Aso Uma
O le faapogai o lo tatou malosiaga o le faatuatua lea ia Iesu Keriso pe a tatou saili ma le loto i ai e o mai ia te Ia i aso taitasi uma.
Uso e ma tuafafine, o Le Ekalesia lenei a Iesu Keriso o le Au Paia o Aso e Gata Ai. Se olioli ina a tele o le faapotopoto ai o Lana Ekalesia. Ou te faafetai ua faamanatu mai e Peresitene Russell M. Nelson ia i tatou e faaaoga soo le igoa sa’o o le Ekalesia a le Alii, ina ia tatou manatua ai lē e ona lenei Ekalesia ma aoaoga o loo tatou mulimuli ai.
Na ta’ua e Peresitene Nelson: “I aso a sau, o le a tatou vaai ai i le faailoaga silisili o le mana o le Faaola e le’i vaai muamua lava i ai le lalolagi. O le a Ia tuuina mai avanoa taua e le mafaitaulia, o faamanuiaga, ma vavega i luga o e faamaoni.”1
O se tasi o faamanuiaga ma avanoa taua mo a’u ma lo’u toalua, o Renee, o le feiloai lea ma le Au Paia i mea ma te galulue ai. Ma te faalogo i a latou tala, ma te molimau i o latou maliu, matou te fefaasoaa’i o latou faanoanoaga, ma e matou te olioli faatasi foi i o latou faamanuiaga. Ua ma molimauina le tele o faamanuiaga ma vavega ua faaee e le Faaola i luga o e faamaoni. Ua matou feiloai ma tagata na asaina mea semanu e le mafai, o e na mafatia i mea e le fia mafaufau i ai se isi.
Ua ma vaai i le faaaliga o le mana o le Faaola i se tina ua oti lana tane, na maliu lana tane ao i ai i la’ua i le feau a le Alii i Polivia.2 Ua ma vaaia i se tamaitai talavou i Atenitina, o sē na pa’ū i lalo o se nofoaafi ma mutu ai lona vae, ona sa i ai se tasi na manao e gaoi lana telefoni feavea’i.3 Ma i lona tamā nofofua, lea ua tatau nei ona ia faaleleia le tulaga ma faamalosia lona afafine i le mavae ai o sea ituaiga o faiga faameaola lē mafaamatalaina. Na ma vaaia i aiga na mu o latou fale ma a latou meatotino uma i le taimi o afi i Chile i le toe lua aso aulia le Kerisimasi o le 2022.4 Ua ma vaaia ia i latou na mafatia i le mavae ai o se tete’aga matautia ma ia i latou o ē na aafia fua i sauaga.
O le a le mea e avatua ia i latou le mana e asaina ai mea faigata? O le a le mea e avatu ai se atufola faaopoopo o le malosi e agai ai pea i luma pe a foliga ua leiloloa mea uma?
Na ou mauaina faapea o le faapogai o lena malosiaga o le faatuatua lea ia Iesu Keriso pe a tatou saili ma le loto i ai e o mai ia te Ia i aso taitasi uma.
Na aoao mai e le perofeta o Iakopo, “Ma e afio mai o ia i le lalolagi ina ia mafai ona faaolaina e ia tagata uma pe afai latou te faalogologo i lona siufofoga; aua faauta, e mafatia o ia i tiga o tagata uma, ioe, tiga o tagata ola uma, o tane, o fafine, ma tamaiti, o e ua i ai i le aiga o Atamu.”5
E i ai taimi, o le faatuatua ia Iesu Keriso e ono foliga mai o se mea e lē mafaia, e toetoe lava ina a lē maua. Atonu tatou te mafaufau faapea o le o mai ia Keriso e manaomia ai se malosi, mana, ma le atoatoa tatou te le o maua, ma ua tatou le mafai lava ona maua le malosi e faia ai. Ae o mea ua ou aoaoina mai nei tagata uma o le, faatuatua ia Iesu Keriso o le mea lea e maua ai le malosi e amata ai le malaga. O nisi taimi atonu tatou te mafaufau, “E tatau ona faalelei lo’u olaga ae ou te le’i sau ia Iesu,” ae o le mea moni lava ia tatou te o mai ia Iesu e faaleleia ai o tatou olaga e ala ia te Ia.
Tatou te le o mai ia Iesu ona ua tatou atoatoa. Tatou te o mai ia te Ia ona ua tatou ma’ila’ila, ma o Ia e mafai ai ona “faatoatoaina i tatou.”6
E faapefea ona tatou amata faaaoga sina faatuatua itiiti i aso uma? O a’u lava ia e amata i le taeao: pe a ou ala a’e, nai lo le autilo i la’u telefoni, e fai sa’u tatalo. Se tatalo faigofie. Ona ou faitauina lea o se mau. E fesoasoani ia te au i a’u feagaiga faalevaiaso ou te faia a’o ou ‘ai ma inu i le faamanatuga ia “manatua ai pea o ia.”7 A ou amataina lo’u aso i se tatalo ma se mau, e mafai ona ou “manatua o Ia” pe a ou tilotilo i la’u telefoni. E mafai ona ou “manatua o Ia” pe a ou fetaia’i ma faafitauli ma faigata, ma ou taumafai e taulima e faapei ona faia e Iesu.
Pe a ou “manatua o Ia,” ou te lagonaina se manao e sui, e salamo. Ou te maua ai le faapogai o le malosi e tausi ai a’u feagaiga, ma ou te lagonaina le tosinaga a le Agaga Paia i lo’u olaga “ma tausi ana poloaiga na ia tuuina mai ia te [a’u]; ia [ou] maua pea lona Agaga e faatasi ma a’u.”8 E fesoasoani ai ia te a’u e tumau e oo i le iuga.9 Pe tau lava i le iuga o le aso! Ma i na aso ou te le manatua ai o Ia i le aso atoa, e i ai lava o Ia iina, e alofa ia te a’u ma ta’u mai e lē afaina, e mafai ona e toe taumafai taeao.
E ui ina tatou le atoatoa i le manatuaina o Ia, e le faagaloina lava i tatou e lo tatou Tama Faalelagi alofa.
O se tasi o mea sese e tele ina tatou faia o le mafaufau lea faapea o le tausiga o feagaiga, po o folafolaga tatou te faia i le Atua, o se ioega faapisinisi tatou te faia ma ia: Ou te usitai, ae Na Te puipuia a’u mai soo se mea leaga e tupu ia te a’u. Ou te totogia la’u sefuluai, ma o le a lē tulia lava a’u ma la’u galuega, pe o le a lē susunuina e le afi lo’u fale. Ae a oo la ina le ogatusa le futia ma le umele, ona tatou alalaga lea i le Alii, “E te le manatu mai ea ia te A’u a fano?”10
O a tatou feagaiga ua le na o ni maliēga faafesuia’i; e mafai ona faia ai suiga moomia.11 E ala i a’u feagaiga ua ou maua ai le mana faapaia, faamalosi o Iesu Keriso, lea e mafai ai ona avea a’u o se tagata fou, e faamagalo mea e foliga e lē mafaamagaloina, e faatoilalo ai mea e foliga e lē mafai. O le manatuaina o Iesu Keriso e mamana i taimi uma e aumaia ai ia te au le malosi faaopoopo e “tausi ai ana poloaiga na ia tuuina mai ia te [a’u].”12 E fesoasoani ai ia ou lelei atili, ia ataata tusa pe leai se mafuaaga, ia avea o se e faatupuina le filemu,13 ia aloese mai le femisaa’i, ia faamuamua le Atua i lo’u olaga.14
A oo ina tele na’ua o tatou tiga po o tiga o se isi tatou te alolofa i ai ma ua le mafai ona tatou onosa’ia, o le manatua o Iesu Keriso ma o mai ia te Ia e mafai ona tuumamaina ai le avega, faamaluluina le loto, ma faamafanafanaina le tiga. O le mana lea na mafai ai e se tamā i tala atu o lona gafatia faalenatura ona lagolago lona afafine e ala i le tiga faaletino ma faalelagona o le mutu ai o lona vae.
Ina ua asiasi atu Elder Soares i Atenitina ia Iuni talu ai ma fesili ia Flavia e uiga i le faalavelave matautia na feagai ma ia, sa ia tali atu ma le faamaoni, “Sa fesoua’iina a’u, tiga, ita, ma inoino ina [ua tupu lenei mea]. A i ai se mea na fesoasoani ia te a’u o le aua nei fesili, ‘pe aisea ua tupu ai ia te a’u?’ ae ‘o le a se mea ou te aoao mai ai?’ O se mea lea na ou latalata atili ai i isi ma le Alii. … Nai lo le faataumamaoina o a’u lava mai ia te Ia, ae sa tatau ona ou pipiimau atu ia te Ia.”15
Na aoao mai e Peresitene Nelson: “O le taui mo le tausiga o feagaiga ma le Atua, o le mana faalelagi—mana e faamalosia ai i tatou e tetee atili atu ai i o tatou tofotofoga, faaosoosoga, ma lototiga. … O lea, o ē tausia feagaiga e aiā i se ituaiga faapitoa o malologa.”16 O le ituaiga filemu lea ma le malologa na ou vaaia i mata o le fafine ua oti lana tane, e ui i le lototiga ona o le misia o lana tane i aso uma.
Ua ta’u mai e le Feagaiga Fou ia i tatou se taimi na i ai Iesu ma Ona soo i luga o se vaa:
“Ona to mai lea o le afā, o le matagi tele lava, ona fati mai ai lea o peau i totonu o le vaa. …
“Ma sa tofa … i se aluga: ona latou fafagu lea ia te ia, ma fai mai ia te ia, Le Aoao e, e te le manatu mai ea ia te i matou a fano?
“Ona tulai lea o ia, ua na vavao atu i le matagi, ua fetalai atu foi i le vai, Faalologo ia, ina malū ia. …
“Ona fetalai atu lea o Ia ia te i latou, Se a le mea tou te fefefe ai faapea? Se a le mea tou te lē faatuatua mai ai?”17
Ou te fiafia lava i lenei tala. Pe na faamoemoe le Alii latou te faaaogaina lo latou faatuatua e faatoafilemu ai le matagi? E vavao ai matagi? O le faatuatua ia Iesu Keriso o le lagona o le filemu e tatalia ai le afā, ma le iloa o le a tatou le fano aua o loo i ai o Ia i totonu o le vaa ma i tatou.
O le ituaiga faatuatua lenei na ma vaaia a o ma asiasi atu i aiga ina ua mavae afi i Chile. Na mu uma o latou fale; ma sa faatama’ia ai mea uma. Ae a o matou savalia vaega sa masani ona avea ma o latou fale, sa o latou faamatala mai e uiga i o latou aafiaga, sa ma lagonaina o la sa o matou tutu i luga o eleele sa. Sa fai mai se tasi tuafafine i lo’u toalua, “Ina ua ou vaai ua mu ia fale na lata mai, sa ou maua le lagona o le a mu ai foi ma lo matou fale, ma o le a faatama’ia foi mea uma. Nai lo le atuatuvale, sa ou maua se faalogona o le filemu e lē mafaamatalaina. Sa ou lagona o le a lelei mea uma.” O le faalagolago i le Atua ma tausia a tatou feagaiga ma Ia e aumaia ai le mana i o tatou vaivaiga ma faamafanafanaina ai o tatou faanoanoaga.
Ou te faafetai mo le avanoa na ma maua ma Renee e feiloai ai i nisi o nei Au Paia ofoofogia, mo a latou faataitaiga e tele o le faatuatua, malosi, ma le onosai. Mo tala o le lototiga ma le lē fiafia atonu o le a lē avea lava ma itulau tomua o se nusipepa pe lē salalau foi. Mo ata e le o pu’eina o loimata maligi ma tatalo e ofoina atu pe a mavae se maliu po o se tete’aga matuia, ma mo faamatalaga e le tuuina lava i luga e uiga i le fefe, le faanoanoa, ma le tiga lea e oo ina mafai ona avea ma faafetai onosa’ia i lo latou faatuatua ia Iesu Keriso ma Lana Togiola. O nei tagata ua faamalosia ai lo’u lava faatuatua, ma mo lena mea e matua’i o’oo’o ai lava lo’u lotofaafetai.
Ua ou iloa o le Ekalesia lenei a Iesu Keriso. Ua ou iloa o loo tu faatalitali o Ia e faamanuia i tatou i Lona mana, pe afai tatou te o mai ia te Ia i aso taitasi uma lava. I le suafa o Iesu Keriso, amene.