O Le Mana Faamau

Sa valoia talu mai pea i ona po o Isaia¹ e faapea o aso e gata ai, o tagata o le feagaiga anamua o Isaraelu, le aiga o Isaraelu, e ao ona “faapotopotoina i latou mai lo latou faataapeapega umi mai motu o le sami, ma mai i itu e fa o le lalolagi,”² ma toefuatai i “laueleele o o latou tofi.”³ Na ta’ua soo ma le mamana e Peresitene Russell M. Nelson lenei faapotopotoina, ma ta’ua lena mea “o le mea aupito sili ona taua ua faia i le lalolagi i aso nei.”⁴

O le a le faamoemoega o lenei faapotopotoina?

I se faaaliga i le Perofeta o Iosefa Samita, na faailoa mai ai e le Alii le faamoemoega e tasi o le puipuiga lea o le nuu o le feagaiga. Na Ia saunoa, “Ma [o le a] avea le faapotopotoina faatasi i luga o le laueleele o Siona, ma i luga o ona siteki, mo se puipuiga, ma mo se sulufaiga mai le afā, ma mai le toasa pe a sasaa mai e aunoa ma le suia i luga o le lalolagi atoa.”⁵ O le “Toasa” i le matalalaga lea e mafai ona malamalama i ai o taunuuga faanatura o le lē usiusita’i ua taatele i tulafono ma poloaiga a le Atua.

O le mea e sili ona taua, o le faapotopotoina e mo le faamoemoega o le aumaia o faamanuiaga o le faaolataga ma le faaeaga ia i latou uma o ē mauaina. O le ala lea e faataunuuina ai folafolaga o feagaiga na tuuina atu ia Aperaamo. Na ta’u atu e le Alii ia Aperaamo e faapea, o ana fanau ma le perisitua “o le a manuia ai aiga uma o le lalolagi, i faamanuiaga lava o le Talalelei, o faamanuiaga ia o le olataga, o le ola faavavau lava.”⁶ O le ala lea na faamatala mai ai e Peresitene Nelson: “Pe a tatou taliaina le talalelei ma papatisoina, tatou te tauaveina i o tatou luga le suafa paia o Iesu Keriso. O le papatisoga o le faitotoa lea e taitai atu ai i le avea ma suli soofaatasi i folafolaga uma na tuuina mai anamua e le Alii ia Aperaamo, Isaako, Iakopo, ma a latou fanau.”⁷

I le 1836, na faaali mai ai Mose i le Perofeta o Iosefa Samita i le Malumalu o Katelani ma “tuuina atu … ia ki o le faapotopotoina o Isaraelu mai itu e fa o le lalolagi.”⁸ I lena lava taimi, na oo mai ai Elaia, ma “tuuina mai le augatupulaga o le talalelei a Aperaamo, ua faapea mai ai ona o i ma’ua ma a ma’ua fanau, o le a faamanuiaina ai tupulaga uma o le a mulimuli mai ia te i ma’ua.”⁹ Faatasi ai ma lenei pule, ua tatou tauaveina atu ai nei le talalelei a Iesu Keriso—le tala e lelei o le togiola e ala ia te Ia—i vaega uma ma tagata uma o le lalolagi ma faapotopoto tagata uma o le a mananao e ulufale mai i ai, i le feagaiga o le talalelei. E avea i latou o ”fanau a Aperaamo, ma le ekalesia ma le malo, ma le ʼau filifilia a le Atua.”¹⁰

I le taimi lava foi lena i le Malumalu o Katelani, sa i ai se avefeau lona tolu mai le lagi sa faaali mai foi ia Iosefa Samita ma Oliva Kaotui. Ou te talanoa atu e uiga i le perofeta o Elia, ma o le pule ma ki na ia toefuatai mai lea ou te fia talanoa atu ai i le asō.¹¹ O le mana e faamaonia uma ai sauniga o le perisitua ma fai ai ia fusia ai i le lalolagi ma i le lagi—le mana faamau—e taua tele mo le faapotopotoina ma le sauniaina o se nuu o le feagaiga i itu uma o le veli.

I le tele o tausaga na muamua atu, sa ta’u manino atu ai e Moronae ia Iosefa Samita e faapea o le aumaia e Elia le pule e tatau ai o le perisitua: “O le a Ou faaali atu ia te outou le Perisitua, e ala i le lima o Elia le perofeta.”¹² Sa faamatala mulimuli ane e Iosefa Samita: “Aisea o le a auina mai ai Elia? Aua o loo ia umia ki o le pule e auauna atu ai i sauniga uma o le Perisitua; ma [sei vagana] ua tuuina mai le pule, e le mafai ona faatautaia sauniga i le amiotonu,”¹³—o lona uiga, o le a le aoga sauniga i le olaga nei ma le faavavau.¹⁴

I se aoaoga ua faapaiaina nei e avea ma mau i le Mataupu Faavae ma Feagaiga, o loo ta’ua ai e le Perofeta: “Atonu e foliga i ni isi o se mataupu faavae faasausili tele ua tatou tautala i ai—o se mana lea e faamaumau pe fusia ai i le lalolagi ma fusia ai i le lagi. E ui i lea, i vaitausaga uma o le lalolagi, soo se taimi na tuu mai ai e le Alii se tisipenisione o le perisitua i soo se alii e ala i faaaliga moni, po o i soo se vaega o alii, sa tuuina mai lenei mana i taimi uma. O lea, soo se mea na faia e na alii i le pule, i le suafa o le Alii, ma faia tonu ma le faamaoni, ma tausia se talafaamaumau tatau ai ma faamaoni o lea lava mea, sa avea o se tulafono i le lalolagi ma i le lagi, ma sa lē mafai ona solofuaina, e tusa ma poloaiga a le Ieova silisili.”¹⁵

E tau lilifa o tatou manatu i le pule faamau faapea e na o ni sauniga patino o le malumalu e faaaoga i ai, ae o lena pule e tatau ai e faia ai soo se sauniga ia aoga ma fusifusia ai i le lalolagi ma i le lagi.¹⁶ O le mana o faamauga e faaee atu ai se faamaufaailoga o le tulaga aloaia o lou papatisoga, mo se faataitaiga, ina ia iloa iinei ma i le lagi. I le iuga, o sauniga uma o le perisitua e faatinoina i lalo o ki a le Peresitene o le Ekalesia, ma e pei ona faamalamalama mai e Peresitene Iosefa Filitia Samita: “Ua tuuina mai e ia [le Peresitene o le Ekalesia] ia i tatou le pule, ua ia tuuina le mana faamau i la tatou perisitua ona o loo ia umiaina na ki.”¹⁷

E i ai foi se isi faamoemoega taua i le faapotopotoina o Isaraelu e i ai sona uiga faapitoa pe a tatou talanoa e uiga i faamauga i le lalolagi ma i le lagi—o lona uiga, o le fausiaina ma le faagaoioiga o malumalu. E pei ona sa faamalamalama mai e le Perofeta o Iosefa Samita: “O le a le faamoemoega o le faapotopotoina o le … nuu o le Atua i soo se matua o le lalolagi? … O le faamoemoe autu lava o le fausiaina lea i le Alii o se fale e mafai ai e le Alii ona faailoa mai i Lona nuu ia sauniga o Lona fale ma mamalu o Lona malo, ma aoao tagata i le ala o le faaolataga; aua e i ai sauniga patino ma mataupu faavae a aoao ma faata‘ita‘ia, e tatau ona faia i se nofoaga po o se fale e fauina mo lena faamoemoega.”¹⁸

O le aoga e aumaia e le mana faamau i sauniga o le perisitua e aofia ai, ioe, sauniga sui e faatinoina i le nofoaga ua atofa mai e le Alii—Lona malumalu. O iina tatou te vaai ai i le malualii ma le paia o le mana faamau—e faia ai ia avanoa autasi le faaolataga mo le tagata lava ia ma le faaeaga faaleaiga i fanau a le Atua i soo se mea ma i soo se taimi latou te ola ai i le fogaeleele. E leai se isi mataupu silisili po o se filosofia po o se pule e mafai ona tutusa se mea na te ofo maia i sea avanoa ua ta aofai ai mea uma. O lenei mana faamau o se faailoaga atoatoa lea o le faamasinotonu, alofa mutimutivale, alofa o le Atua.

O le maua ai o le mana faamau, e faaliliuina moni ai loto o matua i fanau ma loto o fanau i o latou matua. O le faapotopotoina i aso e gata ai i le feagaiga e sopoia ai le veli. I le faatulagaga atoatoa a le Atua, e le mafai e ē o soifua ona iloa le ola e faavavau i lona atoaga e aunoa ma le moloina o sooga mautu i “tamā,” o tatou augatuaa. E faapena foi, o le alualu i luma o i latou ua i ai i le isi itu, po o e atonu o le a sopoia foi le veli o le maliu e aunoa ma le faamanuiaga o faamauga, e le’i mae’a seia vagana ua fusia i latou ia i tatou, o o latou tupuaga, i sauniga sui, ma fusia ai foi i tatou ia i latou i le faatulagaga paia.¹⁹ O le tautinoga e fesoasoani le tasi i le isi, i latou o soifua mo e ua maliliu, e mafai ona faavasegaina o se folafolaga o le feagaiga, o se vaega o le feagaiga fou ma faavavau. I upu a Iosefa Samita, tatou te mananao ia “faamauina o tatou tagata ua maliliu ina ia toetutu mai [faatasi ma i tatou] i le ulua’i toetutu.”²⁰

O le faailoaga aupito maualuga ma paia o le mana faamau o loo i ai lea i le tuufaatasiga e faavavau o se alii ma se tamaitai i le faaipoipoga, ma le sootaga o tagata i o latou augatupulaga uma. Talu ai o le pule e taitai ai i nei sauniga e paia tele, o lea e vaavaaia patino ai e le Peresitene o le Ekalesia lona faamatuu atu i isi. Na saunoa Peresitene Gordon B. Hinckly i se tasi taimi, “Sa ou fai atu i le tele o taimi afai e leai se isi mea e sau mai faanoanoaga uma ma mafatiaga ma tiga o le toefuataiga nai lo le mana faamau o le perisitua paia e fusia faatasi ai aiga e faavavau, semanu e aoga mea uma e tau i ai.”²¹

A aunoa ma faamauga lea e fatu ai aiga e faavavau ma sosoo ai augatupulaga iinei ma talaatu o le oti, o le a tuua i tatou i le faavavau e leai ni a’a po o ni lālā, o lona uiga leai ni tuaa po o ni fanau. O lea tulaga faapaaga-e-noa, lē fesootai o tagata taitasi, i se isi itu, po o sootaga e luitauina ai le faaipoipoga ma sootaga faaleaiga na tofia e le Atua,²² i se isi foi itu, o lena mea o le a faaleaogaina ai le faamoemoega tonu o le foafoaga o le lalolagi. Pe ana faapea o le a avea lena ma ‘auga, o le a tutusa lava ma le lalolagi ua taia i se fetuu pe “faaumatia atoa” i le afio mai o le Alii.²³

Ua mafai ona tatou vaai atu i le mafuaaga o le “faaipoipoga i le va o se alii ma se tamaitai ua faauuina e le Atua, ma o le aiga o le totonugalemu lea o le fuafuaga a lē Foafoa, mo le taunuuga e faavavau a Lana fanau.”²⁴ I le taimi lava foi lea, tatou te iloa ai i le taimi nei lē atoatoa, e le o le mea tonu lea pe o se mea foi o mafai mo nisi. Ae ua i ai lo tatou faamoemoe ia Keriso. A o tatou faatalitali ai i le Alii, ua faamanatu mai e Peresitene M. Russell Ballard ia i tatou e faapea “ua faamautu mai e tusitusiga paia ma perofeta o aso e gata ai e faapea, o tagata uma o e faamaoni i le tausiga o feagaiga o le talalelei o le a maua le avanoa mo le faaeaga.”²⁵

O ni isi ua oo i tulaga lē fiafia ma lē maloloina faaleaiga ma lagona ai sina manao itiiti mo se mafutaga faaleaiga e faavavau. Na ta’ua e Elder David A. Bednar lea matauga: “Ia te oe na lagona le lototiga ona o se tatalaga o se faaipoipoga i lou aiga pe sa e lagonaina le tiga i le solia o le faatuatuaina, faamolemole ia manatua [o le mamanu a le Atua mo aiga] e toe amata foi ia te oe! Atonu e tasi le sooga i le filifili o au augatupulaga ua motusia, ae o isi sooga amiotonu ma mea o totoe o le filifili e le faaitiitia le taua e faavavau. E mafai ona e faaopoopoa i ai le malosi i lau filifili ma e masalo e oo lava i le fesoasoaniga e toefuatai mai sooga ua motusia. O lena galuega o le a faataunuuina taitasi.”²⁶

I sauniga o le falelauasiga o Sister Pat Holland, le faletua o Elder Jeffrey R. Holland, ia Iulai na te’a nei, na aoao mai ai Peresitene Russell M. Nelson: “E i ai le taimi, e toe tuufaatasia ai Patricia ma Jeffrey. Mulimuli ane o le a aufaatasi atu ai foi ma a la fanau ma a la fanau e tausia feagaiga ia maua ai le atoaga o le olioli lea na faapolopolo e le Atua mo Ana fanau faamaoni. O le iloa ai o lena mea, ua tatou malamalama ai o le aso aupito taua i le soifuaga o Patricia e le o lona aso na soifua mai ai po o lona aso na maliu ai. O lona aso aupito taua o le aso 7 Iuni, 1963, ina ua faamauina o ia ma Jeff i le Malumalu o St. George. … Aisea e taua tele ai lenei mea? Ona o le mafuaaga tonu lava na foafoa ai le lalolagi, ia mafai ai ona faatuina aiga ma faamauina ai le tasi i le isi. O le faaolataga o se mataupu e patino i le tagata, ae o le faaeaga o se mataupu faaleaiga. E leai se tasi e mafai ona faaeaina na o ia.”

E le’i leva tele atu, na ma faatasi atu ai ma lo’u toalua i se uo pele i se potu faamauga o le Malumalu o Bountiful Utah. Na ou mua’i feiloai i lenei uo a o laitiiti i Córdoba, Atenitina. Sa ma faafesootaia ma la’u soa faifeautalai ia tagata o se pitonuu e le mamao ese mai le ofisa o le misiona, ma sa ia taliina le faitotoa ina ua ma o atu i lo latou fale. Ina ua oo i le taimi e tatau ai, sa auai o ia ma lona tina ma nai ona tei i le Ekalesia, ma sa tumau ai o ni tagata faamaoni o le ekalesia. Ua avea nei o ia o se tamaitai lalelei, ma o le aso lea sa matou i ai i le malumalu e faamauina o ona matua ua maliliu i le tasi ma le isi ona faamau ai lea o ia ia te i la’ua.

O se ulugalii ua tele tausaga o avea ma uo mamae, na fai ma sui o ona matua i le fatafaitaulaga. O se taimi faamomoiloto na avea o se taimi ua sili atu ona matagofie ina ua faamau la ma uo Atenitina i ona matua. Sa na o le toaono i matou sa i ai i se aoauli toafilemu mai le lalolagi, ae sa tupu ai se tasi o mea aupito sili o mea ua tutupu i le lalolagi. Sa faamalieina a’u ona ua atoa li’o i le taimi nei o la’u matafaioi ma le mafutaga mai le tu’itu’i i lona faitotoa a o avea au o se faifeautalai talavou, i nei tausaga e tele mulimuli ane, e faatinoina sauniga faamau e so’ota’i ai o ia i ona matua ma augatupulaga ua mavae.

O se vaaiga lenei o loo tupu pea lava pea i le lalolagi atoa i malumalu. O le laasaga mulimuli lenei i le faapotopotoina o le nuu o le feagaiga. O le avanoa paia aupito maualuga o le avea ai o oe ma tagata o Le Ekalesia a Iesu Keriso. Ou te folafola atu a outou sailia ma le faamaoni lena avanoa paia, i le olaga nei po o le faavavau o le a avea moni mou.

Ou te molimau atu o le mana faamau ma le pule na toefuatai mai i le lalolagi e ala ia Iosefa Samita e moni, o mea foi e fusifusia i le lalolagi e fusifusia moni foi i le lagi. Ou te molimau atu o Peresitene Russell M. Nelson, i le avea ai ma Peresitene o le Ekalesia, o le tamalii lea e tasi o i le lalolagi i ona po nei o ana ki o loo taita’ia ai le faaaogaina o lenei mana faalelagi. Ou te molimau atu o le Togiola a Iesu Keriso ua mafai ai ona moni le tino ola pea, ma tino moni mai ai foi sootaga o aiga e faaeaina. I le suafa o Iesu Keriso, amene.