Ia Mafaufau Faaselesitila!

O’u uso e ma tuafafine pele, ou te matuā faafetai e lauga atu ia te outou i lenei asō. I lo’u matua lea ua i ai, e aumaia e aso fou taitasi ia mea matagofie toe lu’itauina foi e faate’ia ai. I le tolu vaiaso talu ai, sa faamanu’alia ai maso o lo’u tua. Ia, e ui sa ou tulai ma tuu atu le silia ma le 100 lauga i konafesi aoao, ae o le asō ua ou mafaufau ai o le a ou saofai ma lauga atu. Ou te tatalo o le a molioo atu e le Agaga la’u savali i o outou loto i le asō.

Sa ou faamanatuina talu ai nei lo’u 99 tausaga ma o lea ua amatalia ai le lona 100 o tausaga o le olaga. E masani ona fesiligia a’u i le mealilo o le ola umi. Ae o se fesili e lelei atu e faapea “O le a se mea ua ou aoaoina i le toetoe atoa le seneturi o lo’u olaga?”

E le faatagaina e le taimi i le asō a’u e tali atoatoa atu lena fesili, ae e mafai ona ou faasoa atua se tasi o lesona sili ona taua na ou aoaoina?

Ua ou aoaoina o le fuafuaga a le Tama Faalelagi mo i tatou e ofoofogia, aua o mea tatou te faia i lenei olaga e taua moni lava, ma o le Togila a le Faaola ua mafai ai le fuafuaga a lo tatou Tama.¹

A o ou tauivi ma le tiga matuitui na mafua ona o lo’u manu’aga talu ai nei, sa ou lagona loloto atili ai le talisapaiaina o Iesu Keriso ma le meaalofa lemafaamatalaina o Lana Togiola. Mafaufau i ai! Sa puapuaga le Faaola i “tiga ma mafatiaga ma faaosoosoga o ituaiga uma”² ina ia mafai ona Ia faamafanafana i tatou, faamalolo i tatou, laveai i tatou—i taimi e manaomia ai.³ Sa faamatala e Iesu Lona aafiaga i Ketesemane ma Kalevario: “O le mafatia lea na oo ai ia te au lava, o le Atua lava lea, o lē ua silisili i tagata uma, le gatete ona o le tiga, ma tafe toto ai i pu afu uma.”⁴ O lo’u manu’aga na mafua ai ona ou toe mafaufau pea lava pea i “le silisiliese o le Paia e Toatasi o Isaraelu.”⁵ I le gasologa o lo’u faamalologa, sa faailoa mai e le Alii Lona mana paia i ni auala filemu ma le lē mafaaseseina.

Ona o le Togiola le i’u a Iesu Keriso, o le fuafuaga a lo tatou Tama Faalelagi o se fuafuaga atoatoa! O se malamalamaaga i le fuafuaga ofoofogia a le Atua ua aveesea ai le mealilo mai i o tatou olaga ma masalosaloga ma lemautonu mai lo tatou lumanai. Ua faataga ai tatou taitoatasi e filifili pe faapefea ona tatou ola iinei i le lalolagi ma pe o fea o le a tatou ola ai e faavavau. O le manatu lē faavaēa e faapea e tatau ona tatou “aai, feinu ma fiafia, aua o taeao tatou feoti; ma o le a tatou lelei”⁶ o se tasi lea o pepelo sili ona leaga i le atulaulau.

O le tala sili lenei e uiga i le fuafuaga a le Atua: o mea tonu o le a faia lou olaga faaletino i le mea sili e mafai ona oo i ai o mea tonu foi ia e tasi o le a faia lou olaga i le faavavau atoa i le mea sili e mafai ona oo i ai! O le asō, ina ia fesoasoani ia te oe ia agavaa mo faamanuiaga silisili ua i ai i le Tama Faalelagi mo oe, ou te valaaulia ai oe ia taliaina le faatinoga o le “mafaufau faaselesitila”!⁷ O le mafaufau faaselesitila o lona uiga ia mafaufau faaleagaga. Ua tatou aoao mai le perofeta o Iakopo i le Tusi a Mamona e faapea “o le mafaufau-faaleagaga o le ola lea e faavavau.”⁸

O le olaga faaletino o se vasega aupito sili lea e aoao ai e filifili mea e silisili ona taua e faavavau. Ua matua toatele na’ua tagata ua ola e peisea’i ua na o le pau lenei o le olaga. Peitai, o au filifiliga i le asō o le a filima’otia ai ni mea se tolu: o fea o le a e ola ai i le faavavau atoa, o le ituaiga tino o le a e toetu mai ma oe, ma i latou o le a outou nonofo faatasi e faavavau. O lea la, ia mafaufau faaselesitila.

I la’u ulua’i savali lava o se Peresitene o le Ekalesia, sa ou uuna’ia ai outou ia amata i le taunuuga i le mafaufau. O lona uiga o le faia lea o le malo selesitila ma au sini e faavavau ona e iloiloina lea ma le faaeteete au faai’uga ta’itasi a o e i ai iinei i le lalolagi, po o fea o le a latou tuu ai oe i le lalolagi a sau.⁹

Ua aoao manino mai e le Alii e faapea, ua na o alii ma tamaitai lava ua faamauina o se tane ma se āva i totonu o le malumalu, ma o ē tausi i a latou feagaiga, o le a faatasia i le faavavau atoa. Sa Ia fetalai: “O feagaiga, konekarate, ioega, tautinoga, tautoga, folafolaga, tu, sootaga, mafutaga, po o faamoemoega uma, e lē faia ma osia ma faamauina i le Agaga Paia o le folafolaga … e i ai se iuga pe a oti tagata.”¹⁰

O lea, afai tatou te filifili ma le lē atamai e ola i tulafono faatelesitila i le taimi nei, o loo tatou filifili la ina ia toetutu mai ma se tino telesitila. O loo tatou filifili ia lē ola faatasi ma o tatou aiga e faavavau.

O lea la,o’u uso e ma tuafafine pele, e faapefea ma o fea ma o ai foi e te manao e te ola faavavau ai? O oe e filifili.¹¹

Pe a e faia ni filifiliga, ou te valaaulia oe ia faia se vaaiga umi—o se vaaiga e faavavau. Ia faamuamua Iesu Keriso, ona o lou ola e faavavau e faalagolago i lou faatuatua ia te Ia ma i Lana Togiola.¹² E faalagolago foi i lou usiusitai i Ana tulafono. E saunia e le usiusitai le ala mo se olaga fiafia mo oe i le taimi nei ma se taui mamalu e faavavau a taeao.

A faafetaia’ia oe e se faafitauli, mafaufau faaselesitila! A tofotofoina e faaosoosoga, mafaufau faaselesitila! A faavaivaia oe e le olaga po o ē pele, mafaufau faaselesitila! A maliu “faafuasei” se tasi, mafaufau faaselesitila. A faaumiumi ona i ai se ma’i matuia i se tasi, mafaufau faaselesitila. A oo ina mamafatū le mau avega o le olaga i ou luga, mafaufau faaselesitila! A o e toe malosi mai se faalavelave po o se manu’aga, pei o a’u nei, mafaufau faaselesitila!

A e taulai atu i le mafaufau faaselesitila, ia faamoemoe foi e fetaia’i ma mea faafeagai.¹³ I le tele o tausaga ua mavae, sa faitioina ai a’u e se tasi na ma faigaluega faatasi mo le “tele na’ua o lo’u taimi e alu i le malumalu”, ma e sili atu ma le toatasi supavaisa na faasalaina a’u ona o lo’u faatuatuaga. Peitai, ua ou talitonu, o le mafaufau faaselesitila ua faaleleia ai la’u matātā.

Pe a e mafaufau faaselesitila, o le a faasolosolo ina suia lou loto. O le a e manao ia tatalo soo ma faamaoni atili. Faamolemole ‘aua ne’i faia a outou tatalo e pei o se lisi o faatauga. O le silafaga a le Alii e sili atu nai lo lou poto faaletino. O Lana tali i au tatalo atonu e faate’ia ai oe ma o le a fesoasoani ia te oe ia mafaufau faaselesitila.

Mafaufau i le tali a le Alii ia Iosefa Samita ina ua ia aioi atu mo se toomaga i totonu o le Falepuipui o Liperate. Sa aoao atu e le Alii le Perofeta e faapea o le faiga lē alofa o ia o le a ia maua ai le aafiaga po o le poto masani ma o le a avea ma ona lelei.¹⁴ “Afai e te talitalia lelei,” sa folafola atu e le Alii, “o le a faaeaina oe e le Atua i lugā.”¹⁵ Sa aoao atu e le Alii ia Iosefa e mafaufau faaselesitila ma ia vaai faalemafaufau i se taui e faavavau nai lo le taulai atu i faigata ogaoga o le aso. E mafai ona avea a tatou tatalo—ma e tatau ona avea ma—talanoaga mataalia ma lo tatou Tama Faalelagi.

A e mafaufau faaselesitila, o le a e iloa ai lou aloese o oe lava ia mai soo se mea e faoa mai ia te oe lou faitalia. Soo se vaisu—po o ni taaloga, taaloga faitupe, aitalafu, fualaau faasaina, avamalosi, ita, ponokalafi, feusuaiga, po o meaai foi—e tausuai i le Atua. Aisea? Ona o lou tu’inanau ua avea ma ou atua. Ua e vaai i le tu’inanau nai lo o Ia mo le filemu. Afai o loo e tauivi ma se vaisu, saili atu i fesoasoaniga faaleagaga ma matātā faapolofesa e te manaomia. Faamolemole ‘aua ne’i e faatagaina se tu’inanau na te faoa lou saolotoga mai ia te oe e mulimuli ai i le fuafuaga ofoofogia a le Atua.

O le mafaufau faaselesitila o le a fesoasoani foi ia te oe ia usiusitai i le tulafono o le ola mamā po o le lēgaviā. E i ai nai mea o le a vave ona faafaigataina lou olaga nai lo le soliina o lenei tulafono paia. Mo i latou e osia feagaiga ma le Atua, o le ola lē mamā o se tasi o auala sili ona vave e vaivai ai lau molimau.

O le tele o faaosoosoga sili ona lē faavaivai a le fili e aofia ai le soliga o le amio mamā. O le mana e foafoa ai le ola o le avanoa lea e tasi o le faaleatua ua faatagaina ai e le Tama Faalelagi Ana fanau faaletino e faaaoga. O lea, ua faatulaga ai e le Atua ni taiala manino mo le faaaogaina o lenei mana ola, paia. O lagona feusuai faaletino e mo na o se alii ma se tamaitai ua faaipoipo le tasi i le isi.

O le toatele o le lalolagi e le talitonu i lenei mea, ae o manatu lautele e le o le faamasino ia o le upumoni. Ua folafola mai e le Alii, e leai se tagata ola lē mamā o le a mauaina le malo selesitila. O lea la, a e faia ni faai’uga e faatatau i le ola mamā, faamolemole mafaufau faaselesitila. Ma afai e te le o ola mamā, ou te augani atu ia te oe ia e salamo. Sau ia Keriso ma maua Lana folafolaga o le faamagaloga atoatoa pe a e salamo atoatoa i au agasala.¹⁶

A e mafaufau faaselesitila, o le a e vaai atu i tofotofoga ma mea faafeagai i se malamalama fou. Pe a osofa’ia e se tasi e te alofa i ai le upumoni, mafaufau faaselesitila, ma ‘aua ne’i fesiligia lau molimau. Sa valo’ia e le Aposetolo o Paulo e faapea, “e o ese nisi [mai] le faatuatua i tausaga amuli, latou te faalogo i agaga e faasese ma mataupu a temoni.”¹⁷

E leai se muta’aga i mea taufaasese a le fili. Faamolemole ia saunia. ‘Aua ne’i e faalogo i se fautuaga mai ia i latou o ē lē talitonu. Saili atu i le taitaiga mai leo e mafai ona e faatuatuaina—mai perofeta, tagatavaai, ma talifaaaliga ma mai musumusuga a le Agaga Paia, o lē “o le a faaali mai e ia ia te outou mea uma e tatau ona outou faia.”¹⁸ Faamolemole ia faia le galuega faaleagaga e faateleina ai lou gafatia e maua ai faaaliga faaletagata lava ia.¹⁹

A e mafaufau faaselesitila, o le a faateleina lou faatuatua. A o avea a’u ma se talavou sa faigaluega faata’ita’i, o lo’u totogi sa $15 i le masina. I se tasi po, sa fesili mai ai lo’u toalua o Dantzel pe sa totogi la’u sefuluai i lena tama’i totogi. Sa ou le’i totogia. Sa vave ona ou salamo ma amata totogi le $1.50 faaopoopo i sefuluai faalemasina.

Pe sa ese se tulaga o le Ekalesia ona sa faateleina le matou sefuluai? E leai. Peitai, o le avea ma se tagata e totogi atoa le sefuluai na suia ai a’u. O iina sa ou aoao ai loa o le totogiina o le sefuluai e faatatau atoa i le faatuatua ae le o le tupe. I le avea ai o a’u ma se tagata totogi atoa le sefuluai, sa amata ona matala mai pupuni o le lagi mo a’u. Ou te faailoa atu le tele o avanoa faapolofesa e mulimuli mai i lo tatou totogiina faamaoni o sefuluai.²⁰

O le totogiina o le sefuluai e manaomia ai le faatuatua, ma e fausia ai foi le faatuatua i le Atua ma Lona Alo Pele.

O le filifili e ola i se olaga mamā i se lalolagi o feusuaiga, faapolotiki,e fausia ai le faatuatua.

O le faaalu atili o se taimi i totonu o le malumalu, e fausia ai le faatuatua. Ma o lau auaunaga ma tapuaiga i totonu o le malumalu o le a fesoasoani ia te oe ia mafaufau faaselesitila. O le malumalu o se nofoaga o faaaliga. O iina e faaali atu ai ia te oe le auala e agai ai luma i se olaga faaselesitila. O iina o le a e latalata atili ai i le Faaola ma maua ai le avanoa sili atu e maua ai Lona mana. O iina o le a taialaina ai oe i le foiaina o faafitauli i lou olaga, e oo lava i ou faafitauli sili ona lavelave.

O sauniga ma feagaiga o le malumalu e taua e faavavau. E faaauau pea ona tatou fausia le tele o malumalu ina ia tino moni mai nei gafatia paia i o outou soifuaga taitoatasi. Matou te faafetai lava e faasilasila atu a tatou fuafuaga e fausia se malumalu i nofoaga taitasi nei e 20:

• Savaii, Samoa

• Cancún, Mexico

• Piura, Peru

• Huancayo, Peru

• Viña del Mar, Chile

• Goiania, Pasila

• João Pessoa, Brazil

• Calabar, Nigeria

• Cape Coast, Kana

• Luanda, Angola

• Mbuji-Mayi, Democratic Republic of the Congo

• Laoag, Philippines

• Osaka, Iapani

• Kahului, Maui, Hawaii

• Fairbanks, Alaska

• Vancouver, Washington

• Colorado Springs, Colorado

• Tulsa, Oklahoma

• Roanoke, Virginia

• Ulaanbaatar, Monokolia

O loo taitaia e le Alii i tatou e fausia nei malumalu e fesoasoani ai ia i tatou ia mafaufau faaselesitila. O loo soifua le Atua. O Iesu o le Keriso. Ua toefuatai mai Lana Ekalesia ia manuia ai fanau uma a le Atua. O lea ou te molimau atu ai i le suafa paia o Iesu Keriso, amene.