Itukutuku ni Veiliutaki ni Iwasewase
Kevaka a Sega na iVola i Momani, Ke’u a Sega ni Kila
Ena noqu bula taucoko au sa wilika e levu na ivola—me baleta na vei ilakolako cecere, itukutuku makawa vakasakiti, itukutuku ni bula veilaveti, kei na ivola ni cakacaka veivakavulici eso. Ni ra sa mai yaga e levu ena noqu bula, ia e dua ga sa veisautaka vakataucoko sara. Na iVola i Momani e sa vukei au me’u toro voleka vua na Kalou ka taracake na noqu yavu ena uluvatu ni noqu Dauveivueti, o Jisu Karisito (raica na Ilamani 5:12).
iVakadinadina
E dina ga ni’u sega ni dau bulabula tu ena Lotu ni’u se qai yabaki 14, au a sureti me’u vakaitavi ena semineri. Ena ituvatuva vakalou a vakalougatataki au kina na Turaga ena dua na isau rawarawa ka bibi ki na dua na masu ena vica ga na siga yani ki liu ka’u sa qai vakarau kina tu me’u ciqoma na veisureti. Ena yabaki o ya, keimami a vulica kina na iVola i Momani. Ena nona veitokoni e dua na qasenivuli dauloloma kei ira na noqu lewe ni kalasi, au a ciqoma kina na veisureti me’u wilika na iVola i Momani ena loma ni yabaki. Na ka bibi cake, au a ciqoma na veisureti ni parofita o Moronai me’u taroga vua na Kalou kevaka e dina na ivola (raica na Moronai 10:3–5).
Ni oti ga vakalailai na tekivu ni semineri, au a torovi Tamaqu mai Lomalagi tale, ena yalo dina kei na inaki dei, ka vinakata me’u kila vakataki au kevaka e dina na iVola i Momani, ka vakadewataka o Josefa Simici ena isolisoli kei na kaukauwa ni Kalou me vaka a kaya. Na yalo vata ga au a sotava e liu a savai au mai. Na yalo ni loloma savasava oya a kama curumi au, ka’u qai kila—kila vakaidina sara—ni iVola i Momani e vosa ni Kalou.
Gauna vata ga oqori, au sa kila ni baleta ni dina na iVola i Momani, o Jisu Karisito e noqu iVakabula, o Josefa Simici e Nona parofita, a lesi taumada me vakalesuya mai na Lotu dina ni Turaga e vuravura, ka ni dau solia e dua na parofita bula e vuravura na ivakasala kei na veidusimaki au gadreva me’u muria ena noqu tovolea me’u bulataka na ivakaro kei na ivakatagedegede ni Lotu. Oqori na veika bibi me kilai ni’u se gonetagane yabaki 14.
Na kila oqori a veisautaki au. Au a vinakata me’u vinaka. Au a vinakata me’u cakava na veika dodonu, ia ni’u a caka cala au rarawataka na veika au sa cakava, au a veivutuni, ka vakararavi vua na Turaga me vukei au me’u vinaka cake. A tubu cake na noqu vakabauti Jisu Karisito e veisiga ena noqu vaqaqacotaka na noqu ivakadinadina kei na kila-ka me baleta na ivakavuvuli ena iVola i Momani.
A kerei ira na lewe ni Lotu o Peresitedi Russell M. Nelson me ra vakasamataka e tolu na taro: “iMatai, ena vakacava tu beka na nomu bula ke sega na iVola i Momani? iKarua, na cava o na sega ni kila? Ka ikatolu, na cava o na sega ni rawata”?1
Kevaka o se bera ni cakava vakakina, au sureti iko mo vakasamataka vakatitobu ena masumasu na taro oqori ka sauma ena yalodina. Ni’u a sauma, na noqu loloma kei na vakavinavinaka me baleta na iVola i Momani, kei Jisu Karisito o koya ka vakadinadinataka, a tubu cake vakalevu sara.
Keu a sega ni kila kina me baleta na ituvatuva cecere ni veivueti, na isoro veivakaduavatataki kei na loloma soliwale i Jisu Karisito, se na nodra ivakavuvuli na parofita bula. Na noqu bula sa mai vaka oqo baleta na iVola i Momani. Na ivakavuvuli e tiko kina ena vukei au me’u tiko ga ena salatu ni veiyalayalati ena dua na vuravura sa qai ca tikoga mai.
Veivakalougatataki Vakamatavuvale
A yalataka o Peresitedi Marion G. Romney, na ikarua ni daunivakasala e liu ena Mataveiliutaki Taumada:
“Au vakadeitaka ni kevaka, ena noda itikotiko, era na wilika ena masumasu ka vakawasoma na itubutubu na iVola i Momani, ruarua vakataki ira kei ira na luvedra, na yalo ni ivola cecere oya ena yaco me curuma na noda itikotiko kei ira kece era tiko kina. Ena tubu cake na yalo ni vakarokoroko; ena tubu na veidokai kei na veikauwaitaki. Ena takali na yalo ni veileti. Era na vakasalataki ira na luvedra na itubutubu ena loloma kei na vuku levu cake. Era na dau vakarorogo ka talairawarawa vakalevu cake na gone ki na nodra ivakasala na nodra itubutubu. Ena tubu cake na ivalavala dodonu. Na vakabauta, inuinui, kei na loloma cecere—na loloma savasava i Karisito—ena vakalevutaki ena noda itikotiko kei na noda bula, ka kauta mai na vakacegu, reki, kei na marau.”2
Na gauna a mai lima kina na luvei keirau lalai, a dredre sara vei keitou vakamatavuvale me keitou muria na ivakasala vakaparofita oqo. A taura e rauta ni 18 na vula me keitou wilika rawa na iVola i Momani. E vuqa na siga keitou wilika e yadua na tabana. Keitou dau wilika yadua e dua na tikina ka dau vukei luvei keirau yalewa gone duadua, yabaki va, me tokaruataka e dua na tikina ni dau wilika oti rawa vua e dua vei keitou. Ena neitou marautaka keitou a lako kece yani me keitou lai kanavata, ia ena teveli au a tarogi iratou kina na noqu matavuvale se cava na nodratou italanoa taleitaki ni iVola i Momani. Na italanoa eso oqori a oka kina baleti Alama ena kedra maliwa na Soramaiti, na ilakolako ki na vanua yalataki ni matavuvale nei Liai, Ilamani kei ira na cauravou yaloqaqa, Momani kei Moronai, na cakacaka ni kaulotu nei Amoni, kei na saumaki mai nei Alama Lailai. Ia e muri, a qai vakuria mai na domona na luvei keirau yalewa yabaki va ni kaya mai, “O Jisu ga!” A vakavulica vei keitou o koya e dua na lesoni kaukauwa ni vakabauta vaka-gonelailai ena siga o ya.
Veisureti kei na Yalayala
A vakavulica o Peresitedi Nelson:
“Ni’u vakasamataka na iVola i Momani, au dau nanuma na vosa na kaukauwa. Na dina ni iVola i Momani e tu kina na kaukauwa me vakabula, vakaceguya, vakalesuya mai, vukea, vaqaqacotaka, vakayalovinakataka, ka laveta na yaloda. . . . Au yalataka ni gauna o vulica kina ena masumasu na iVola i Momani ena veisiga, ko na vakatulewa vakavinaka cake—ena veisiga. Au yalataka ni o vakasamataka vakatitobu na veika o vulica, ena tadola na katuba ni lomalagi, ka o na ciqoma na isau ni nomu taro eso kei na veidusimaki ki na nomu bula.”3
Na yalayala nei Moronai e baleti ira kece era wilika na iVola i Momani, se ena imatai se ikalimasagavulu ni gauna. Nanuma tiko na vakabauta kei na masu, e dua na yalo dina, kei na gagadre dina mo vuli. Ni cokoti vata kei na nomu sasaga mo vuli, vakasamataka vakatitobu, ka masu, o na rawata talega na ivakadinadina o ya ka ciqoma na veivakalougatataki totoka e kauta mai. Ena vakavinakataki cake oqo ni ko wasea na ivola kei na nomu ivakadinadina vei ira tale eso.
Au sureti iko mo cakava na iVola i Momani me tiki ni nomu bula ena veisiga. Vulica na kena ivakavuvuli, marautaka na kena italanoa, ka muria na nodra ivakaraitaki na imuri dina i Jisu Karisito. Au yalataka, ni o vakayacora vakakina ena vaqaqacotaki na nomu vakabauti Karisito, o na sotava na inuinui levu cake, ka ena loloma cecere ni Turaga, o na vakila na loloma savasava ni Kalou ni vakasinaita na yalomu.