O Le Talalelei ma le Togiola a Iesu Keriso E Mo Tagata Uma

O le asō, ua tatou ola i se lalolagi ua leiloloa le tele o ona tulaga iloga. Ua faamanatu mai ma le manino e tusitusiga paia ia i tatou e faapea:

“e oo mai le aso, o i latou o e e le fia faalogo i le siufofoga o le Alii, po o le leo o ana auauna, pe le gauai i upu a perofeta ma aposetolo, o le a vavae ese mai totonu o le nuu; ona ua latou se ese mai a’u sauniga, ma soli lau feagaiga tumau-faavavau; Ua latou le sailia le Alii e faatu lana amiotonu, ae ua taitasi le tagata ma savali i lona lava ala ma tusa ai ma le faatusa o lona lava atua, o ona foliga ua tusa ma foliga o le lalolagi” (Mataupu Faavae ma Feagaiga 1:14–16).

E taitai atu e le talalelei i tatou i le upumoni, filemu, ma le olioli e faavavau. Ua aoao mai e le talalelei i tatou e faapea o i tatou uma o fanau faapelepele a lo tatou Tama Faalelagi, ua foafoaina i Lona faatusa. Pe a tatou malamalama i lo tatou faasinomaga faalelagi, tatou te iloa ai se alofa e le uma e sili mamao atu nai a tatou mea sese ma vaivaiga.

I le avea ai ma tagata o Le Ekalesia a Iesu Keriso o le Au Paia o Aso e Gata Ai, ua faamanuiaina i tatou i le malamalama o le atoaga o le talalelei ma le Togiola a lo tatou Faaola o Iesu Keriso, o le vaifofo mo lo tatou lalolagi. O le ala lea ua apoapoaiina ai i tatou taitoatasi e le Alii—o le ua finagalo e tauave i o tatou luga Lona suafa i le papatisoga—e folafola atu Lana talalelei. E tatau ona avea i tatou ma amepasa o Lana talalelei i le lalolagi, ma o le ala lea e tatau ai ona tatou ola i Lana talalelei. O le Talalelei a Iesu Keriso o se savali o le alofa ma le togiola mo tagata uma.

O lo tatou tuuto atu i le galuega faafaifeautalai o se faailoaga e tatau ai lea o lo tatou talitonuga i le “taua o le talalelei i le atulaulau.” O a tatou faifeautalai ua i ai le agaga o le misiona a Keriso, e aapa atu i e faaaunuua ma faaulufale mai ma le agalelei i latou uma ua saunia e faalogologo. Latou te tauaveina le sulu o le savali laugatasia o le talalelei, e faamautu atu ai o loo avanoa le alofa o le Atua ma le Togiola a Iesu Keriso mo tagata uma.

O loo matagofie le faapupula mai o lenei upumoni i le 2 Nifae 26:33:

“. . . Ua Ia [le Alii] valaaulia i latou uma e o mai ia te ia ma taumamafa i lona agalelei; ma e le teena e Ia se tasi e sau ia te ia, e uliuli pe pa’epa’e, e pologa pe saoloto, o tane ma fafine; ma e manatua e ia lē ua faapaupau; ma ua tutusa tagata uma i le Atua, o le Iutaia ma le Nuuese.”

E tatau ona tatou manatua o tagata uma tatou te feiloai i ai o se atalii/afafine o le Atua, ua agavaa mo le alofa, faaaloalo, ma le avanoa e faalogo ai i le savali o le talalelei. I le Alema 16:16, ua faamanatu mai ai ia i tatou o le a liligi mai e le Alii “lona Agaga i luga o le laueleele atoa e saunia ai mafaufau o le fanauga a tagata, pe saunia ai o latou loto, e talia le afioga lea o le a aoaoina i totonu o i latou i le taimi o Lona afio mai.”

O le isi itu taua o la tatou aoaoga faavae o le talitonuga i le natura e faavavau o aiga ma le avanoa mo le faaolataga o tupulaga uma. I o tatou malumalu, tatou te faatinoina ai sauniga mo o tatou tuaa ua maliliu. O lenei faiga paia ua faamautu ai lo tatou talitonuga o loo avanoa le faaolataga mo tagata uma, e oo lava ia i latou e lei mauaina le avanoa e faalogo ai i le talalelei a o soifua.

O lo tatou tuuto i le galuega i malumalu e atagia ai lo tatou talitonuga o le alofa o le Atua e oo i talaatu o tuaoi o lenei olaga. O lona uiga ua tatou malamalama o le Togiola a Iesu Keriso e ofo atu ai le faamoemoe ma le togiola e le gata mo e o soifua, ae faapea foi i latou o i le isi itu o le veli.

O le Togiola a Iesu Keriso o le faavae o lo tatou faatuatua. O Lana taulaga togiola, na Ia tauaveina ai i Ona lava luga a tatou agasala, tiga, ma mafatiaga, o lea ua aumai ai ia i tatou le avanoa e salamo ai ma maua le faamagaloga paia. O se meaalofa laugatasia lea, e avanoa mo tagata uma e talia le Alii i o latou olaga.

Ia tatou tutu mausali i le upumoni e faapea o le talalelei ma le Togiola a Iesu Keriso e moni lava e mo tagata uma. O se savali o le faamoemoe, togiola ma faamanuiaga e faavavau, ua ofofuaina mai i tagata naunau uma e aoao atili. Ia tatou aapa atu ma le alofa, agaalofa, ma le lotomalamalama i o tatou uso ma tuafafine uma, ma le iloa o i tatou o meafaigaluega o Lana fuafuaga paia, e ofo atu ai le faaolataga i tagata taitasi uma.

I le faaiuga, ou te molimau atu i le moni o le talalelei a Iesu Keriso ma le mana o Lana Togiola. Ia tatou tatalo ia lotogatasi i la tatou tautinoga e mulimuli ia Keriso e faasalalau atu lenei tala lelei i fanau uma a le Atua, tusa lava po o a o latou talaaga po o tulaga o i ai. Ua matua manaomia lava e le lalolagi le talalelei ma le Togiola a Iesu Keriso i o latou olaga. Tatou lavea’ia faatasi i latou. I le suafa paia o Iesu Keriso, amene.