Fiafia i le Sapati e Ala i le Ositaulaga

O Oleni ma Ana Ngungutau o Sini, Ausetalia, faatoa faaipoipo, na amataina lo la’ua olaga faatasi e ala i le tatalo ia iloa le mea o teuina e le Alii mo i la’ua e aoao. E lei pine, ae ofo atu ia Oleni se konekarate e 2-tausaga e taalo lakapi ai mo se kalapu a le pitonuu o Griffith, o se taulaga laitiiti e ono itula mai Sini. I le mavae ai o le tele o ni talanoaga ma tatalo, sa tonu ia i la’ua e talia le ‘ofa, ma sa totogi atu muamua e le kalapu ia totogi ma ponesi a o le’i amata, ina ia fesoasoani ai i le aiga e masii atu ma faamautu i lo la nuu fou.

Na faateia le ulugalii, ona o le taimi lava na amata ai le vaitau o taaloga, o le tele o taaloga sa faatulaga i Aso Sa. O lo la manatu muamua lava o le fesoasoani a le kalapu ina ua la taunuu. Sa faamanino atu e le taitaifono e tatau ia Oleni ona totogi uma lana aitalafu i lona taalo lea i taaloga na faatulagaina.

Fai mai Oleni, “A o ou taalo i Sini . . . o matou taaloga uma lava sa faia i Aso Toonai. O se mea fou lenei ia te au, ma sa ou lagona le faaletonu e taalo i Aso Sa . . . Sa ou lagonaina e manaomia ona ou faailoa atu lea atugaluga i la’u kalapu.”

E le’i leva ona mavae lena talanoaga, ae taunuu mai le KOVITI-19, ma sa faaleaogaina le vaitau o taaloga mo le tausaga atoa. Sa lagona e Oleni o le tali lea i ana tatalo, ae sa toe faaumiumi atu lana konekarate mo le isi lua tausaga ina ia mafai ai ona ia taalo i le vaitau atoa ma faauma ai lana aitalafu i le kalapu.

Fai mai Oleni, “Ina ua lata mai le vaitau fou i le 2021, sa ou fautuaina [le taitaifono o le kalapu] faapea o le a le mafai ona ou taalo i Aso Sa, ma o le a ou sueina se auala e toe totogi atu ai tupe na ou aitalafu ai. Sa ia fai mai ia te au e lua mea ou te filifili ai: ‘Taalo’ po o le ‘Totogi uma’. Sa ou iloaina e aunoa ma se masalosalo, o le mea sa’o e fai o le tausia o le poloaiga a le Alii ma o le a Ia saunia se ala.”

Sa ia faafesoota’ia le epikopo mo se faamafanafanaga ma se fautuaga ma sa faamautinoa atu ia te ia, sa sa’o lana faaiuga. “Sa ou toe vili i le taitaifono ma ta’u i ai o le a ou [tuua] le kalapu ma o le a ou totogia uma la’u aitalafu. Sa latou tuu mai ia te au le sefulu masina e fai ai.”

Sa malilie le au Ngungutaus o le a la faigaluega malosi e totogi uma ai le la aitalafu, ma galulue malosi foi i o la’ua valaauga o ni faiaoga seminare. Sa la talitonu afai la te faia la la’ua vaega, o le a saunia e le Alii se ala.

“I le mavae ai o la’u faaiuga e tausia le paia o le Sapati . . . sa faamanuiaina i ma’ua e le Tama Faalelagi i le tele o auala. Sa talaia mai faitotoa ma sa ou mauaina se siitaga o le totogi i la’u galuega,” o le tala lea a Oleni. I ni mai masina mulimuli ane, sa amata ai e Oleni lana ia lava pisinisi ma sa vave mafai ai ona totogi atoa le aitalafu i le kalapu. Sa mafai ai loa ona masii ese atu le ulugalii i Sini.

O le taimi lena na maua ai e Oleni se valaau e feiloai ma le peresitene o le siteki, o le sa valaauina o ia e avea ma epikopo o le Uarota a Griffith, Siteki o Riverina. “O se mea na ma tete’i ai,” o lana tala lea. “O le alu atu o le taavale i le fale sa sāō ma loimatā.” Ina ua la taunuu, sa tootutuli Oleni ma Ana e tatalo ma sa ole atu i le Tama Faalelagi mo se faamafanafanaga.

E manatua e Oleni: “O iina na faamautinoa mai ai e le Agaga ia te a’u e faapea ou te le’i sau iinei i Sini e taalo lakapi. Sa aumai e le Tama Faalelagi a’u iinei e auauna i Ana fanau ma avea o se meafaigaluega e fausiaina Lona malo i lenei vaega o Lana tovine. O le taimi nei, e leai ni ma fuafuaga e toe foi i Sini ae o le fuafuaga e auauna atu ma o ma’ua loto atoa, mafaufau atoa, ma le malosi atoa i lenei valaauga. Ua ou vaai i le aao o le Alii i la’u auaunaga, ma ua matua tele naua lo’u alofa i la’u uarota ma lenei galuega tele.”

“Ua ou iloa sa ositaulaga e lo’u Faaola Lona soifua mo au, ma o le tele e mafai ona ou fai e faafoi atu ai, o le usitai lea i le tausiga o Ana poloaiga. A ou vaivai, ua ou iloa e mafai ona ou liliu atu i Lana Togiola e siitia a’u ma faamalosia ai au e fetuleni atu pea i luma. O le tausia o le paia o le Sapati o se faamanuiaga. Ou te iloa a tatou mulimuli i lenei poloaiga o le a tutumu o tatou olaga i le malamalama ma le poto e faamanuiaina ai isi i le aluga o le vaiaso.”