I Lona 78 Ua Ia Faasusulu Atu ai le Malamalama o le Talalelei

Ua faasusulu atu e Brother John William Orth, 78, le malamalama o le talalelei e ui i ana tauiviga ma le ma’i Pakinisona. Sa avea John ma tagata faamaoni o Le Ekalesia a Iesu Keriso o le Au Paia o Aso e Gata Ai, sa galue i valaauga eseese, e aofia ai ma se epikopo. Toetoe o le lima tausaga talu ai, i le mavae ai o se tauiviga umi ma le gasegase, sa oo ina ua tatau ai ia John ona fai mona aiga le Fale mo Tagata Matutua o Lutheran i Glynde, Ausetalia i Saute, o se nofoaga e tausi ai tagata matutua e faatautaia e le Ekalesia Luteru.

E ui i ona faafitauli tau i le soifua maloloina, e tumau pea le faamoemoe o John ma e saofaga malosi i lona alalafaga o Lutheran Homes lea e fai ai sauniga ma vasega e vaaia e se faifeau tausinuu. E le’i leva ona sii atu i lona nofoaga lea, sa iloa e John o le a malaga le faifeau mo sina taimi, ma sa fautuaina, e mafai ona ta’ita’i ia vasega e isi tagata o le nofoaga, pe a leai o ia—Sa fiafia John e taitai e ia lava se vasega, pe a manaomia. Sa talia e le faifeau lana ‘ofa, ma talu mai lena taimi sa aoao e John le tele o vasega, lea e aofia ai se faasalalauga faalevaiaso (pe a faatagaina ai e lona soifua maloloina) i se alaata o se TV ma faasalalau atu ai i le faitau selau o tagata matutua i nofoaga i nuu sa siosiomia ai.

Tusa lava pe o feagai o ia ma ona tuaoi faaletino, e faaalu e John le tele o itula i vaiaso taitasi e sauniuni ai ana lesona, e nofouta foi i le faaaogaina o vitio ma isi anomea e aoao ai mai Le Ekalesia a Iesu Keriso o le Au Paia o Aso e Gata Ai. I le taimi muamua, sa siaki ai e le faifeau lesona taitasi a o le’i tuuina atu, ae ua le toe i ai nei sona popole i aoaoga a John. O le mea moni, o savali a John ua vaaia ai le tele o kopi o le Tusi a Mamona ua tuu i tagata matutua, o le toatele o i latou e talosagaina o ia e fai ni autu patino. Na te ta’ua ma le faamama’i se tasi o na talosaga, lea na mafua ai ona faia se kosi e 5-vaiaso o le aoaoga e uiga i le alofa tunoa.

Na tosinaina foi e John isi suiga i le nofoaga. Sa ia saunia kata o faatonuga ua faavaa mau, e avatu ai i tagata o le nofoaga se aotelega mo a latou tatalo. Ua latou faamanuiaina nei mea taumafa i le taimi o taumafataga, ma tuu atu se mafaufauga faaleagaga e fai ma se vaega o a latou fonotaga masani faalepulega ma tagata o le nofoaga. Ua faamoemoe o ia o le a uunaia ai i latou e tatalo soo ma teuina le ata o le faaolataga i o latou mafaufau.

Ua faatalitonuina John o lana misiona o le faasoa atu lea o le talalelei i ona tuaoi i le nofoaga mo tagata matutua, e saunia ai i latou mo nisi aoaoga ma toto ai le faamoemoe ia i latou o e fefefe i mea o i luma. E manao o ia ia latou lagona lelei i le olaga i talaatu o le veli, ma ia iloa le alofa o le Tama Faalelagi. A maliu se tagata i le nofoaga, e saunia e John lo latou talafaasolopito faaleaiga ma auina atu o latou igoa mo galuega i le malumalu e fai, i mea e mafai ai.

E le o se mea e ofo ai, o lana mau e fiafia i ai o le Mosaea 2:17: “Ma faauta, ua ou ta’u atu nei mea ia te outou ina ia mafai ona outou aoaoina le poto; ina ia mafai ona outou aoaoina pe a outou auauna atu i o outou uso a tagata, ua na o lo outou auauna atu lava lea i lo outou Atua”.

Ia Me o le 2023, na maua ai e John se asiasiga e le’i faamoemoeina mai ia Elder Paul Whippy o le Fitugafulu Eria i le Pasefika mo le Ekalesia. Sa matuai fiafia Elder Whippy i le faataitaiga a John o le alofa faaKerisiano ma le auaunaga, ma sa ia faasoa atu lea aafiaga ia Elder Taniela B. Wakolo, o lona taitai perisitua i le Au Peresitene Eria.

Ina ua ta’u atu ia John e manao foi Elder Wakolo e feiloai atu ia te ia, sa ia faatonuina tagata e tausia i latou ia mautinoa ua ala o ia, ma fai faalelei ona lavalava lotu, e saunia ai mo le asiasiga. I nei asiasiga uma e lua, sa faasoa atu ai e John lana molimau i toeaina ma nisi o lesona sa ia aoaoina i le tele o tausaga o le auauna atu ma le faamaoni i le ekalesia.

E loloto le alofaina o John e lona toalua o Diana, ma ona atalii e toalima: O Benjamin, John William Junior, David, Andy, Sam ma o latou aiga. E mitamita i latou i lana auaunaga faaKeriso faifai pea ma o loo mulimuli i lana faataitaiga i o latou lava valaauga i totonu o a latou uarota ma siteki.

I le 2018 na tautino mai ai e Peresitene Russell M. Nelson, “Ua faatelevave e le Alii Lana galuega e faapotopoto ai Isaraelu. O lena faapotopotoina o le mea aupito taua lea o loo tupu i le lalolagi i le taimi nei. E leai se isi mea e faatusalia i le tele, e leai se isi mea e faatusalia i le taua, e leai se isi mea e faatusalia i le malualii.”¹

Ua opoina e Brother John Orth le tautinoga ma o loo ia faia mea uma na te mafaia e faapotopoto ai Isaraelu i itu uma o le veli. O ia o se faataitaiga matagofie o le faasusulu atu o lou malamalama ma tumau e oo i le iuga, e ui i luitau ma faigata o le olaga.