Founga hono Fakaʻaongaʻi ʻo e Mūsiká ʻi he Palaimelí

Fakakaukauʻi e ngaahi meʻa ko ʻení ʻi hoʻo akoʻi ʻa e “Ko e Fāmilí Ke Taʻe Ngata” (THF, 98). Kole ange ki he fānaú ke nau fanongo ki he konga ʻo e palani ʻa e Tamai Hēvaní ʻi hoʻo hivaʻi ʻa e laine ʻuluaki ʻo e hivá pea ke nau tuʻu ʻi heʻenau ʻiloʻi iá (ko e fāmilí). Fakaafeʻi ʻa e fānaú ke nau hivaʻi fakataha mo koe ʻa e laine ko iá. Fakamahinoʻi ange ko e fasi ko ia ki he “taʻengatá” mo e “ʻOtuá” ʻokú na muimui atu pē he founga tatau, peá ke kole ange ki he fānaú ke nau hivaʻi ʻa e ongo foʻi lea ko iá. Kole ange ke nau fanongo ki he hoko atu ʻo e konga ʻo e hivá ke nau ʻiloʻi ai pe ko e hā e lōloa ʻo ʻenau nofo fakataha mo honau fāmilí. Hivaʻi ʻa e laine hono uá, fakamamafaʻi ʻa e ongo kupuʻi lea ko e “kinautolu fiefiá.” Fakaafeʻi ʻa e fānaú ke nau hivaʻi fakataha mo koe ʻa e laine ko iá, hili iá pea hivaʻi fakataha ʻa e ongo lainé. Kole ange ke nau fanongo ki he foʻi lea ʻe taha ʻoku ʻuhinga ki he “kinautolu fiefiá” ʻi he taú. Hivaʻi ʻa e “Ko e fāmilí ke taʻe ngatá,” pea ʻai ke nau toe hiva angimui mai kiate koe. Hiva kae tuku ke nau toe fakaongo mai hoʻo hivá, “Palani ʻa e Tamaí.” Fehuʻi ange pe ko e hā ʻa e Palani ʻa e Tamai Hēvaní, fakamanatuʻi ange kiate kinautolu ʻokú Ne fie maʻu ke nau mali ʻi he temipalé pea maʻu honau fāmili taʻengatá. Fakaʻosi hoʻo akoʻi ʻa e taú ʻi haʻo hivaʻi e ngaahi kupuʻi leá kae tuku ke nau toe hiva angimui mai.

ʻĪmisi

mūsiká

ʻOku maʻu atu ʻa e ngaahi nāunau tokoni ki he sió ʻi he sharingtime.lds.org

Fakakaukau ki he ngaahi meʻa ko ‘ení ʻi hoʻo akoʻi ʻa e “Ka ʻi heni ʻa e Fakamoʻuí” (peesi 28 ʻi he fokotuʻutuʻu ko ʻení):

• ʻAi ha ngaahi kaati lea ki he kupuʻi lea ʻo e hivá, pea kumi ha fakatātā ʻokú ne fakafofongaʻi ʻa e kaati lea takitaha. Tuku ʻa e fakatātaá ʻi he tafaʻaki ʻe taha ʻo e lokí. Aleaʻi mo e fānaú ʻe kehe ʻenau fakafeangaí ʻo kapau te nau sio ʻoku tuʻu ʻa e Fakamoʻuí ʻi honau tafaʻakí. Hivaʻi ʻa e foʻi hivá pea kole ange ki he fānaú ke nau fakatauhoa ʻa e ngaahi kaati leá ki he ngaahi fakatātaá.

• ʻAi e fānaú ke nau hiva fakataha mo koe ʻi hoʻo tuhu ki he ngaahi fakatātaá.

• ʻOange ki he kalasi takitaha ha kupuʻi lea ke nau tuʻu ʻo hivaʻi, hili ia pea fetongi ʻa e ngaahi kupuʻi leá kae ʻoua leva kuo kau kātoa ʻa e ngaahi kalasí he hivaʻi ʻo e ngaahi kupuʻi lea takitaha.

Fakakaukau ki he ngaahi meʻá ni ʻi hoʻo akoʻi ʻa e “ʻOku ʻOfa ʻEku Tamai Hēvaní ʻIate Au” (THF, 16–17). Fehuʻi ange ki he fānaú pe ʻoku fakahaaʻi fēfē ʻa ʻenau ʻofa ʻi he kau mēmipa honau fāmilí. Fehuʻi ange pe ʻoku fakahaaʻi fēfēʻi ʻe he Tamai Hēvaní ʻa ʻEne ʻofa kiate kinautolú. Fakamatalaʻi ange naʻá Ne fakatupu ʻa e māmaní maʻanautolu he ʻokú Ne ʻofa ʻiate kinautolu. Hivaʻi tahataha ʻa e ngaahi kupuʻi leá ki he fānaú, peá ke fakaafeʻi ke mou hivaʻi fakataha mo fakatātaaʻi ʻa e konga takitaha: hiva e manupuná, sio ki he langí, ngangana ʻa e ʻuhá ʻi honau fofongá, pea fai pehē atu ai pē. Ki he veesi hono uá, fakaafeʻi kinautolu ke fai hano fakatātaaʻi hangē ko e tuhu ki honau ongo matá, fakatātaaʻi ha fanga kiʻi pepe, pea peluki honau laʻinimá ʻi honau tuʻa telingá. Fakaafeʻi kinautolu ke nau kuku pē kinautolu ʻi heʻenau hivaʻi, “ʻOmi e moʻui,”, ʻai honau nimá ki honau mafú (“mo e lotó”), pea punou honau ʻulú mo kūnima (“Te u fakamālō ki ai”). Kole ange ke ʻai honau nimá ki honau mafú ʻi heʻenau hivaʻi, “ʻIo, ʻokú ne ʻofa ʻiate au.”

ʻĪmisi

hiva ʻa e fānaú