ʻOku Akoʻi Kitautolu ʻe he Kau Palōfitá ke Moʻui ʻAki ʻa e Ongoongolelei Kuo Toe Fakafoki Maí

Fakamahinoʻi ʻa e tokāteliné (sio ki ha ngaahi fakatātā pea fai ha foʻi vaʻinga): Fakaʻaliʻali ha tā ʻo ha palōfita moʻui. Kole ange ki ha niʻihi ʻo e fānaú ke nau taufetongi ʻi hano tataki ʻo e Palaimelí ʻi hano fai ha faʻahinga ngaue faingofua ʻo hangē ko e punopuna pe pasipasi e ongo nimá. Tuhu ki he tā ʻo e Palōfitá pea fakamatalaʻi ko e Palesiteni ia ʻo e Siasí pea ʻoku totonu ke tau muimui ki he meʻa ʻokú ne kole mai ke tau faí. Fehuʻi ange: “Ko hai ʻoku muimui ki ai ʻa e palōfitá?” Fakaʻaliʻali ʻa e fakatātā ʻo Sīsū Kalaisí, mo fakamatala ʻoku ngāue ʻa e palōfitá ʻi Heʻene fakahinohinó.

Poupouʻi ke mahino (aleaʻi ʻa e ngaahi akonaki ʻa e palōfitá): Fakaʻaliʻali ange ki he fānaú ha tatau ʻo e konifelenisi fakamuimuitahá ʻi he Ensign pe Liahoná. Fakamatalaʻi ko e konifelenisi lahí, ʻoku hanga ai ʻe he palōfitá ʻo akoʻi kitautolu ʻaki e meʻa ʻoku finangalo ʻa Sīsū Kalaisi ke tau faí. Fili ha ngaahi sētesi mei he lea ʻa e palōfitá pea fakaafeʻi e fānaú ke nau lau leʻo lahi. Te mou kau kotoa, ʻi hono hiki ha lisi ʻo e ngaahi meʻa ʻe fai ʻe he fanaú ke muimui ki he palōfitá.

Poupouʻi ke moʻui ʻaki (tā ha fakatātā): Tufa ke taki taha ʻa e tamasiʻi he laʻipepa. Fakaafeʻi kinautolu ke pelu ia. Kole ange ke nau tā ha fakatātā ʻo e palōfitá ʻi he faʻahi ʻe taha ʻo e laʻipepá peá ke tohi pe tā ha founga ʻe taha te nau muimui ai ki he palōfitá ʻi he faʻahi ʻe tahá. Fakaafeʻi e fānaú ke nau tuʻu mo puke ki ʻolunga ʻenau ngaahi fakatātaá mo nau hivaʻi ʻa e tau ʻo e “Muimui ʻi he Palōfitá” (THF, 58–59).

Ki he uike 2, akoʻi ʻa e fānaú fekauʻaki mo ha meʻa naʻe toki akoʻi mai ʻe he palōfitá ʻi ha konifelenisi lahi ne toki fai. ʻI hoʻo palani ʻa e ʻekitivitī ko ia te ke faí, fakakaukau ki haʻo hanga ʻo fakamahinoʻi ʻa e ngaahi meʻa naʻe akoʻi ʻe he palōfitá pea tokoniʻi e fānaú ke mahino mo nau moʻui ʻaki ia.

Fakamahinoʻi ʻa e tokāteliné (lau ha potufolofola pea fanongo ki ha talanoa): Fakamatalaʻi ange ko Malakaí ko ha palōfita ʻi he Fuakava Motuʻá naʻá ne akoʻi ʻa e kakaí ke nau totongi ʻenau vahehongofulú. Kole ange ki ha tamasiʻi ke ne lau ʻa e Malakai 3:10 kae fanongo ʻa e toenga ʻo e fānaú ki he meʻa naʻe talaʻofa mai ʻe he ʻEikí kapau te tau totongi vahehongofulu. Fakamatalaʻi ange ko e “fakaava ʻa e matapā ʻo langí” ʻoku ʻuhinga ia ki he ngaahi tāpuaki te tau maʻu ʻi heʻetau totongi ʻetau vahehongofulú.

Poupouʻi ke mahino (vakai ki ha lēsoni fakataumuʻa): Fakaafeʻi ha fānau ʻe toko 10 ki muʻa ʻi he lokí. ʻOange ke nau taki taha ha foʻi ʻāpele (pe ha faʻahinga fuaʻiʻakau) pea kole ange ke nau puke ia ki ʻolunga ʻo ʻai ke hangē ha fuʻu ʻāpelé. ʻAi ha tamasiʻi ke ne “toli” ʻa e fuʻu ʻāpelé pea faʻo ia ki ha kato. Fakamatalaʻi ange ko e vahehongofulú ko e vahe hongofulu ʻe taha ʻo e meʻa ʻoku tau maʻú pea ʻoku faʻa totongi ʻaki ia ʻa e paʻanga, ka naʻe ʻi ai ha taimi naʻe totongi pē ʻe he kakaí ʻaki ʻa e meʻa naʻa nau maʻú. Fehuʻi ange pe ko e foʻi ʻāpele ʻe fiha ʻe ʻave ʻe he tamasiʻí ki he pīsopé ko e vahehongofulú.

ʻĪmisi

tau pehē ko e fānau ʻoku nau paki hifo ha ngaahi foʻi ʻāpele

Poupouʻi ke nau moʻui ʻaki(aleaʻi ʻa e vahehongofulú): Fakaʻaliʻali ha laʻi tali totongi vahehongofulu mo ha sila. Aleaʻi hono founga totongi ʻo e vahehongofulú. Fakaafeʻi ʻa e fānaú ke nau vahevahe mai ʻa e ngaahi tāpuaki ʻoku maʻu ʻe honau fāmilí ʻi hono totongi ʻo ʻenau vahehongofulú. Fai haʻo fakamoʻoni ki ha ngaahi tāpuaki ʻoku maʻu mei he talangofua ki he akonaki ʻa e palōfitá ke totongi ʻa e vahehongofulú.

Fakamahinoʻi ʻa e tokāteliné (lau ha potufolofola): Kole ange ki he fānaú ke nau talamai ha taimi naʻe fakatokanga ange ai ʻenau mātuʻá fekauʻaki mo ha meʻa fakatuʻutāmaki. Fehuʻi ange pe ko e hā ne fakatokanga ange ai ʻenau mātuʻá. Fakamatalaʻi ange ʻoku ʻofa ʻa e Tamai Hēvaní ʻiate kitautolu pea ʻokú Ne fakatokanga mai ki ha fakatuʻutāmaki ʻo fakafou mai ʻi Heʻene kau palōfitá. Kole ange ki ha tamasiʻi ke ne lau ʻa e Tokāteline mo e Ngaahi Fuakavá 89:4, pea fekau ke fanongo ʻa e fānaú pe ko e hā hono ui ʻa e fakatokanga ko ʻení. Fakamatalaʻi ange naʻe maʻu ʻe Siosefa Sāmita ʻa e fakatokanga ko ʻení, ko e Lea ʻo e Potó, ko ha fakahā mei he ʻOtuá.

Poupouʻi ke mahino (lau e ngaahi potufolofolá): Kimuʻa ʻi he Palaimelí, fakapipiki ʻa e ngaahi veesi folofola ko ʻení ʻi ha ngaahi lalo sea kehekehe: T&F 89:7, T&F 89:8, T&F 89:9, T&F 89:10, T&F 89:12, T&F 89:16. Fakamatalaʻi ange naʻe foaki mai ʻe he Tamai Hēvaní hotau sino fakamatelié peá Ne fie maʻu kitautolu ke tau tauhi ia; Kuó Ne foaki mai kiate kitautolu ʻa e Lea ʻo e Potó ke tokoni mai ke tau ʻilo ʻa e meʻa ʻe tokoni ki hotau sinó mo e meʻa te ne maumauʻi iá. Kole ange ki he fānaú ke nau sio ki honau lalo seá ke maʻu hake ai ha ngaahi potufolofola. Fakaafeʻi ha tamasiʻi ʻokú ne maʻu ha potufolofola ke ne lau leʻo lahi ia. Aleaʻi ʻa e ʻuhinga ʻo e ngaahi veesi takitaha. Fakamahinoʻi ko e “inu mālohí” ko e ʻolokaholo pea ko e inu “velá” ko e kofi mo e tī.

Poupouʻi ke mahino (fai ha foʻi vaʻinga): Faʻo ki ha kato ha fakatātā ʻo ha meʻakai, inu, pea mo ha ngaahi meʻa ʻoku lelei pe kovi ki he sinó. Fakaafeʻi ha tamasiʻi ke ne fili ha fakatātā mei he kató pea fakaʻaliʻali ia ki he toenga ʻo e fānaú. Fekau e fānaú ke fakamanga honau ngutú ʻo kapau ko e meʻa ko iá ʻoku lelei pea puke honau ngutú ʻo kapau ʻoku kovi. Lau ʻa e Tokāteline mo e Ngaahi Fuakava 89:18–21 pea aleaʻi ʻa e ngaahi tāpuaki ʻoku tau maʻu ʻi heʻetau muimui ki he akonaki ʻa e palōfitá ke moʻui ʻaki ʻa e Lea ʻo e Potó.

ʻĪmisi

fānau ʻoku nau sio ki ha ngaahi fakatātā

ʻE lava pē ke hoko ʻa e “Fakamālō Ki he ʻOtuá” ko e hiva ia ki he māhina ní (Ngaahi Himi, fika 10). Ko ha ngaahi fakakaukau ʻeni ʻe lava ke akoʻi ʻaki ha faʻahinga hiva. Neongo ko e ngaahi kaati lea ʻoku fakaʻaongaʻi ʻi he fakatātā ko ʻení, ka ʻe lava ke fakaʻaongaʻi ha ngaahi fakatātā ke akoʻi ʻaki ʻa e fānau ʻoku toe iiki angé.

Tohi ʻa e kupuʻi lea ʻo e hivá ʻi ha ngaahi kaati lea lanu kehekehe (pe tohi ʻa e kupuʻi leá ʻaki ha ngaahi lanu kehekehe). Vahevahe ʻa e ngaahi kupuʻi leá ki he konga ʻe ua. Fakaʻaongaʻi ha taha ʻo e ngaahi founga ko ʻení ke akoʻi ʻaki ʻa e hivá:

1. Tufa tavale holo ‘a e ngaahi kaati leá ʻi he lokí. Tuku ki ha niʻihi ʻo e fānaú ke nau fokotuʻutuʻu ʻa e ngaahi kupuʻi leá ki he hokohoko totonú lolotonga hoʻomou toutou hivaʻi mo e toenga ʻo e fānaú. Hivaʻi pea aleaʻi ʻa e ngaahi kupuʻi lea takitaha, pea mou toki hivaʻi ʻa e kakato ʻo e foʻi hivá.

2. Kamata ʻaki ʻa e ngaahi kaati lea ʻoku tonu hono fokotuʻutuʻú ʻi he palakipoé. Hivaʻi ʻa e foʻi hivá mo e fānaú. Kole ange ki ha tamasiʻi ke ne toʻo ha kaati lea ʻe taha, pea toe hivaʻi ʻa e foʻi hivá. Toutou fai pehē pē kae ʻoua leva kuo ʻosi ʻa e ngaahi kaati leá hono toʻo.

3. Fokotuʻu ʻa e konga ʻuluaki ʻo e kupuʻi leá ʻi hono tuʻunga totonú pea fokotuʻu tavale pē ʻa e konga hono uá. Hivaʻi ʻa e konga ʻuluakí pea kole ange ki he fānaú ke nau kumi ʻa e konga hono ua ʻo e kupuʻi leá pea fakamatalaʻi ʻa e ʻuhinga ʻo e kupuʻi leá.

4. Vahevahe ʻa e fānaú ki ha ongo kulupu ʻe ua. ʻAi ʻa e kulupu ʻe taha ke ne hivaʻi ʻa e konga ʻuluaki ʻo e kupuʻi leá pea hivaʻi ʻe he kulupu ʻe tahá ʻa e konga hono uá. Fakafetongi ʻa e ongo kulupú pea toe ʻai.

ʻĪmisi

ngaahi kaati lea

ʻOku maʻu atu ʻa e kaati leá ʻi he sharingtime.lds.org