ʻOkatopa
Te U Vahevahe ʻa e Ongoongoleleí mo e Fānau Kotoa ʻa e ʻOtuá
“Tuku ke ulo pehē hoʻomou māmá ʻi he ʻao ʻo e kakaí, koeʻuhí ke nau mamata ki hoʻomou ngāue leleí, pea fakamālōʻia ʻa hoʻomou Tamai ʻa ia ʻoku ʻi he langí.”
Fakalahiʻaki e ngaahi fakakaukau ʻoku ʻoatú ʻa hoʻo ngaahi fakakaukau pē ʻaʻaú. Palani ʻi he uike takitaha ʻa e ngaahi founga ke (1) fakamahinoʻi ai ʻa e tokāteliné, (2) tokoni ke mahino ia ki he fānaú, pea (3) tokoni ke nau moʻui ʻaki ia. Fehuʻi pē kiate koe, “Ko e hā ʻa e meʻa ʻe fai ʻe he fānaú ke nau ako aí, pea ʻe anga fēfē ʻeku lava ʻo tokoniʻi kinautolu ke nau ongoʻi ʻa e Laumālié?”
Uike 1: ʻOku tokoni hono moʻuiʻaki ʻo e ongoongoleleí kiate au ke u hoko ko ha faifekau ʻi he taimí ni.
Fakamahinoʻi ʻa e tokāteliné pea poupouʻi ke mahino (fanongo ki ha talanoa): Fakaʻaliʻali ha tā ʻo ha kau faifekau. Fehuʻi ange ki he fānaú pe ko e hā ha ngāue ʻa e kau faifekaú ʻoku fai. Vahevahe ʻa e talanoa ko ʻení pe taha mei he Friend pe Liahoná: “ʻI ha ʻaho ʻe taha naʻe tukituki atu ai ha ongo faifekau ʻi ha matapā ʻo ha ʻapi. Naʻe fakaava mai ʻa e matapaá ʻe ha fefine ko Misisi Sēmisi. Naʻe talaange ʻe he ongo faifekaú ko ʻena haʻu mei he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe fakaafeʻi kinaua ʻe Misisi Sēmisi mo ne talaange ʻokú ne fie ʻilo lahi ange ki he Siasí. … Naʻe talaange ʻe Misisi Sēmisi naʻá ne kaungāʻapi mo ha fāmili naʻa nau kau ki he Siasí. Naʻá ne pehē ko e fānau ʻi he fāmili ko iá naʻa nau fuʻu anga fakaʻapaʻapa mo angaʻofa. ʻOku nau vaʻinga potupotutatau pē mo e taha kotoa pea fakaʻapaʻapaʻi ʻa e ngaahi ʻapi ʻo e kakaí. Naʻe pehē ʻe Misisi Sēmisi ʻokú ne fie ako fekauʻaki mo e siasi ʻokú ne akoʻi ʻa e fānau ko iá ke nau angalelei ki he ngaahi kaungāʻapí” (Palaimeli 2, 52). Fehuʻi ange: “Naʻe hoko fēfē ʻa e fānau naʻe nofo kaungāʻapi mo Misisi Sēmisí ko ha kau faifekau?” Fakamatalaʻi ange ko e taimi ʻoku tau moʻui ʻaki ai ʻa e ongoongoleleí ʻoku tau hoko ai ko e kau faifekau. Fakaafeʻi ʻa e fānaú ke mou lea fakataha “ʻOku tokoni ʻa ʻeku moʻui ʻaki ʻa e ongoongoleleí ke u hoko ko ha faifekau ʻi he taimí ni,” fakamamafaʻi ʻa e foʻi lea ko e taimí ni.
Uike 2: ʻOku tokoni ʻa e moʻui ʻaki ʻo e ongoongoleleí kiate au ke u hoko ko ha faifekau ʻi he taimí ni.
Poupouʻi ke mahino (hivaʻi ha foʻi hiva mo aleaʻi ʻa e tuʻunga moʻui mahuʻinga ʻi he ongoongoleleí): Ngaohi ha kaati ʻe 13, ʻoku hiki ai ʻa e “Ko Hoku Ngaahi Tuʻunga Mahuʻinga ʻi he Ongoongoleleí” (vakai ki he “Sharing Time: Keep the Commandments,” Friend, Sune 2006, 36). Tufa atu ʻa e kātí ki he niʻihi ʻo e fānaú pea fekau ke nau hivaʻi ʻa e “ʻOku ou Fie Hoko Leva ko ha Faifekau” (THF, 90). ʻI he taimi ʻe ʻosi ai ʻa e hivá, ʻai ʻa e fānau ko ia ʻoku nau lolotonga pukepuke ʻa e kātí ke nau lau leʻo lahi mai ʻa e ngaahi tuʻunga mahuʻingá pea mou vahevahe ʻa e founga ʻoku tokoni ai ki he kiʻi tamasiʻi mo e kiʻi taʻahine ʻa hono moʻui ʻaki ʻo e ngaahi tuʻunga mahuʻingá ke nau hoko ai ko ha faifekau ʻi he taimí ni. Toutou fai pehē pē, kae fakaʻaongaʻi ʻa e kaati kehe ʻi he taimi takitaha.
ʻOku tokoni ʻa e hiva fekauʻaki mo ha tokāteline ki he fānaú ke nau ako mo manatuʻi ia. ʻE toe ako lelei ange foki ʻa e fānaú ʻo kapau te nau sio pe kau ki ha ʻekitivitī ʻoku fekauʻaki mo e hivá.
Poupouʻi ke moʻui ʻaki (fokotuʻu ha ngaahi taumuʻa): Kole ange ki he fānaú ke nau fili ha taha ʻo e ngaahi tuʻunga moʻui mahuʻinga ʻi he ongoongoleleí te nau feinga lahi ke moʻui ʻaki ʻi he uike ka hoko maí. Fekau ke nau tohi pe tā ha fakatātā ʻo e tuʻunga moʻui mahuʻinga ko iá ʻi ha laʻipepa pea sio ki ai ʻi he ʻaho kotoa ko ha fakamanatu. Fakaafeʻi kinautolu ke nau lipooti mai ʻenau ngaahi aʻusiá ʻi he uike hokó ʻi he Palaimelí.
Uike 3:Te u lava ʻo vahevahe ʻa e ongoongoleleí mo hoku fāmilí mo e kaungāmeʻá.
Fakamahinoʻi ʻa e tokāteliné (fanongo ki ha talanoa): Kimuʻa ʻi he Palaimelí, lau ʻa e lea ʻa ʻEletā Lōpeti C. ʻOakesi ʻi he konifelenisi ʻi ʻOkatopa 2000, “Sharing the Gospel” (vakai, Ensign, Nōvema. 2000, 81–82). Fai ʻa e talanoa ʻo e huhuʻaʻi molí. Fakamatalaʻi ange ʻoku melie fau ange ʻa e ongoongoleleí ia ʻi he huhuʻa ʻo e molí pea ʻoku totonu ke tau vahevahe atu ia mo e niʻihi kehé. ʻAi ke lea fakataha ʻa e fanaú ʻo pehē, “Te u lava ʻo vahevahe ʻa e ongoongoleleí mo hoku fāmilí mo e kaungāmeʻá.”
Poupouʻi ke mahino (fanongo ki ha lea ʻa ha taha naʻe fakaafeʻi): Fakaafeʻi mai ha faifekau pe ko ha taha ʻosi ngāue fakafaifekau ke haʻu ʻo lea fekauʻaki mo e ngaahi founga ʻe vahevahe atu ai ʻe he fānaú ʻa e ongoongoleleí ki ha niʻihi kehé (hangē ko haʻanau hoko ko ha faʻifaʻitakiʻanga lelei, fakaafeʻi mai ʻa e kaungāmeʻá ki he Palaimelí, pea vahevahe ʻenau ngaahi fakamoʻoní) pea mo e founga ʻo ʻenau feinga ke vahevahe ʻa e ongoongoleleí ʻoku tokoni ia ki he Tamai Hēvaní mo e kau faifekaú.
Poupouʻi ke moʻui ʻaki (fanongo ki ha talanoa mo ha vahevahe ʻo ha ngaahi fakakaukau): Fakamanatu ki he fānaú te nau lava ʻo hoko ko ha faifekau ʻi he taimí ni. Vahevahe ange ha taimi naʻá ke vahevahe ai mo hao maheni ʻa e ongoongoleleí. Fokotuʻu tahataha ʻa e fānaú pea ʻai ke nau lea ʻaki ʻa e foʻi lea ʻe taha mei he sētesí “Te u lava ʻo vahevahe ʻa e ongoongoleleí.” Fakaafeʻi ʻa e tamasiʻi ʻokú ne pehē “ongoongoleleí” ke ne fakakaukau ki ha founga ʻe lava ai ke ne vahevahe ʻa e ongoongoleleí mo e fāmilí pe mahení. Toutou fai pehē pē ʻo ka faingamālie ʻa e taimí.
Uike 4 : ʻOku fakamālohia ʻeku fakamoʻoní ʻi heʻeku vahevahe ʻa e ongoongoleleí.
ʻOku fakatupu fakamānako ʻa e lēsoni fakataumuʻá pea ʻoku tukutaha ʻa e tokanga ʻa e fānaú ki ha tefitoʻi moʻoni ʻo e ongoongoleleí.
Fakamahinoʻi ʻa e tokāteliné (vakai ki ha lēsoni fakataumuʻa): Fakafonu ha hina sioʻata ʻaki ha vai. Fakamatalaʻi ange ko e taimi kotoa pē ʻoku tau vahevahe ai ʻa e ongoongoleleí, ʻoku tupulaki ʻo mālohi ʻetau fakamoʻoní. ʻAi ha foʻi tulutā ʻo e meʻa fakalanu inú ki he foʻi hiná. ʻOange ha niʻihi ʻo e ngaahi founga te tau lava ke vahevahe ai ʻa e ongoongoleleí, tānaki atu mo ha toe tulutā ʻo e fakalanu inu tatau ki he founga takitaha. Fakamahinoʻi ange ʻi he ʻalu ke mālohi ange ʻa e lanú ʻi he foʻi tulutā takitaha, ʻoku tupulaki ʻo mālohi ʻa ʻetau fakamoʻoní ʻi he taimi kotoa pē ʻoku tau vahevahe ai ʻa e ongoongoleleí.
Poupouʻi ke mahino (aleaʻi e ngaahi fakamoʻoní): Faʻo ʻa e ngaahi meʻa ko ʻení ʻi ha kato: tā ʻo Sīsū Kalaisi, tā ʻo Siosefa Sāmita, tā ʻo e palōfita lolotongá, ko e Tohi ʻa Molomoná, mo e ngaahi foʻi lea ko e “Siasi moʻoní.” Tohiʻi ʻa e foʻi lea ko e fakamoʻoni ʻi he palakipoé, pea fehuʻi ki he fānaú pe ko e hā ʻa e fakamoʻoni. Aleaʻi ʻenau ngaahi talí. Fai ʻa e talanoa ko ʻení: “Naʻe ʻi ai ha kiʻi taʻahine naʻe ilifia ke vahevahe ʻene fakamoʻoní he naʻe ʻikai te ne fakapapauʻi ʻa e ngaahi meʻa ʻokú ne ongóʻi. Ka naʻá ne ʻiloʻi ʻoku mahuʻinga, ka ʻi ha ʻaho ʻe taha naʻá ne lototoʻa ʻo tuʻu pea fai ʻene fakamoʻoní, ʻi heʻene hiki hifo ha meʻa ʻe nima ʻokú ne tui ki aí. ʻI heʻene ʻosí, naʻá ne ongoʻi lelei peá ne ʻiloʻi ʻoku tupulaki ʻo toe mālohi ange ʻene fakamoʻoní.” Tuku ki he fānaú ke nau ʻilo ki he ngaahi meʻa ʻe nima naʻe fakamoʻoniʻi ʻe he taʻahiné ʻi haʻanau toho mai ia mei he kato kuó ke ʻosi teuteuʻí. Aleaʻi ʻa e meʻa takitaha peá ke tuku ia ke fakaʻaliʻali ʻi muʻa ʻi he lokí.
Poupouʻi ke moʻui ʻaki (vahevahe ʻo e ngaahi foungá): Tuku ki he fānaú ke nau vahevahe mai ha founga ʻoku nau vahevahe ai ʻa e ongoongoleleí. ʻI he taimi pē ʻoku lave ai ʻa e tamasiʻí ki ha meʻa, tānaki atu ha foʻi tulutā ʻo e fakalanu inú ki he hina vai sioʻatá ke fakahā ai ko e vahevahe ʻo e ongoongoleleí ʻokú ne fakamālohia ʻa e ngaahi fakamoʻoní. (Kapau ʻoku tokolahi hoʻo Palaimelí, mahalo te ke fie maʻu ke fai fakakulupu ʻeni ke lava ʻe he tokotaha kotoa ke vahevahe ʻene ngaahi fakakaukaú.)