Chʼol 1
Chan ru naq xqak’ul lix Hu laj Mormon
Sa’ jun kutan, laj Jose kiril ru Santiago 1:5 li wan sa’ li Santil Hu: “Wi junaq eere moko tz’aqal ta xna’leb’, chitz’aamanq re li Dios.” Laj Jose kiraj xnawb’al b’arwan li iglees tz’aqal yaal, jo’kan naq kixk’e xch’ool chixpatz’b’al re li Dios.
Chiru jun eq’la sa’ xtiklajik li saq’ehil, laj Jose xko’o chi tijok sa’ li k’iche’ wan chixk’atq li rochoch.
Naq kiwiq’la ut ki’ok chi tijok, laj Satanas kixsik’ xramb’al. Laj Jose kitijok rik’in x’anchalil lix ch’ool ut kixpatz’ xtenq’ankil re li qaChoxahil Yuwa’.
Li qaChoxahil Yuwa’ ut li Jesukristo ke’xk’ut rib’ chiru laj Jose sa’ jun xaqal li saqen. Li qaChoxahil Yuwa’ kixk’ut chi ruq’ li Jesus ut kixye: “A’in li Walal Raaro Inb’aan. Chawabʼi aʼan!”
Laj Jose kixpatz’ b’ar wan reheb’ li jar ch’uut chi iglees tixjunaji wi’ rib’. Li Jesus kixye re naq maajun reheb’ tixjunaji wi’ rib’, xb’aan naq sachsookeb’ chixjunileb’.
Naq laj Jose kixye resil li k’a’ru kiril ut kirab’i reheb’ junjunq li winq, ke’xse’e. Eb’ laj jolominel sa’ naab’al li iglees sa’ lix tenamit ke’xrahob’tesi.
Kinume’ oxib’ chihab’. Sa’ jun q’ojyin, laj Jose yoo chi tijok re naq taakuye’q lix maak ut re tixnaw k’a’ru tento tixb’aanu.
Kixk’ut rib’ jun li anjel, aj Moroni xk’ab’a’, ut kiraatina laj Jose chirix jun li hu tz’iib’anb’il chiruheb’ perel ch’iich’ oor. Laj Jose tento tixjaltesi ru li k’a’ru tz’iib’anb’il chiru li perel ch’iich’ a’in sa’ li aatinob’aal Ingles.
Chirix naq xikenaq laj Moroni, laj Jose kixk’oxla rix li k’a’ru kiyehe’ re xb’aan laj Moroni. Laj Moroni kisutq’i chaq wiib’ sut chik sa’ li q’ojyin a’an.
Wulajaq chik, laj Jose xko’o toj sa’ xb’een li tzuul Kumorah li kiril chaq sa’ jun k’utb’esinb’il matk’. Aran kixtaw jun li nimla pek. Kixtaqsi li pek rik’in jun li che’.
Rub’el li pek kiwan jun li kaxon pek. Naq ki’ilok laj Jose chi sa’ li kaxon, kirileb’ li perel ch’iich’ oor.
Laj Moroni kixk’ut rib chiru laj Jose ut kixye re naq ink’a’ taarisi li perel ch’iich’, a’b’an naq taasutq’iiq chaq rajal chihab’ sa’ tz’aqal li kutan a’an chiru kaahib’ chihab’. Rajlal sut naq kisutq’i chaq laj Jose, laj Moroni kixk’e xtzolb’al.
Naq ak kinume’ kaahib’ chihab’, kikanab’aak laj Jose chixk’amb’aleb’ li perel ch’iich’ oor. Kiroksi li Urim ut Tumim re xjaltesinkil ru junjunq reheb’.
Eb’ laj tz’iib’ ke’xtenq’a laj Jose chixtz’iib’ankileb’ li aatin naq a’an kixjaltesi ru chiruheb’ li perel ch’iich’ oor.
Laj Jose kixk’ameb’ li aatin jaltesinb’ileb’ ru chiru laj k’uub’anel hu re naq tixk’uub’ jun li hu.
History of the Church 1:71
Lix k’ab’a’ li hu a’an lix Hu laj Mormon. Na’aatinak chirixeb’ li ani ke’wan chaq arin America sa’ najter kutan. Na’aatinak ajwi’ chirix li Jesukristo, li Ralal li Dios.