Chʼol 7
Xyiib’ankil li jukub’
Chirix naq lix junkab’al laj Lehi ke’xyiib’ lix muheb’aal t’ikr chire li palaw chiru k’iila kutan, li Qaawa’ kiraatina laj Nefi. Kixye re naq tixyiib’ jun li jukub’ re tixk’am lix junkab’al sa’ li yeechi’inb’il ch’och’.
Laj Nefi ink’a’ kixnaw chan ru xyiib’ankil jun li jukub’, a’b’an li Qaawa’ kixye re naq a’an tixk’ut chiru chan ru tixb’aanu. A’an kixye re laj Nefi b’ar tixsik’ li pek ch’iich’ re taaruuq chixyiib’ankileb’ li k’anjeleb’aal te’ajmanq chiru.
Laj Laman ut laj Lemuel ke’reetz’u laj Nefi xb’aan naq kiraj xyiib’ankil jun li jukub’. Ink’a ke’xpaab’ naq li Qaawa’ kixk’ut chiru laj Nefi chan ru xb’aanunkil. Ink’a ke’raj xtenq’ankil.
Laj Nefi kixye re laj Laman ut laj Lemuel naq te’xjal xk’a’uxl ut naq ink’a’ te’xpo’resi xch’ool. Kixjultika reheb’ naq rilomeb’ chaq jun li anjel. Kixye ajwi’ reheb’ naq li Dios wan xwankil re xb’aanunkil chixjunil li k’a’aq re ru.
Laj Laman ut laj Lemuel ke’josq’o’ rik’in laj Nefi ut ke’raj xkutb’al sa’ li palaw.
Naq ke’nach’ok rik’in laj Nefi, a’an kixtaqlaheb’ naq ink’a te’xch’e’ xb’aan naq nujenaq rik’in lix wankil li Dios. Laj Laman ut laj Lemuel ke’xuwak chiru xnumik k’iila kutan.
Toja’ naq li Qaawa’ kixye re laj Nefi naq tixch’e’eb’ laj Laman ut laj Lemuel. Naq kixb’aanu jo’kan laj Nefi, li Qaawa’ kixchiq’eb’. Laj Laman ut laj Lemuel ke’xnaw naq lix wankil li Dios wan rik’in laj Nefi.
Laj Nefi kixye re laj Laman ut laj Lemuel naq te’ab’inq chiru xna’ xyuwa’ ut chiru li Dios. Laj Nefi kixye reheb’ naq wi te’xb’aanu a’in, te’osob’tesiiq.
Laj Laman ut laj Lemuel ke’xjal xk’a’uxl ut ke’xtenq’a laj Nefi chixyiib’ankil li jukub’.
Laj Nefi xko’o chi kok’ aj xsa’ sa’ li tzuul chi tijok re xpatz’b’al lix tenq’. Li Qaawa’ kixk’ut chiru chan ru xyiib’ankil li jukub’.
Naq laj Nefi ut eb’ li ras ke’xchoy xyiib’ankil li jukub’, ke’xk’e reetal naq chaab’il. Ke’xb’antioxi re li Dios naq kixtenq’aheb’ chaq.