Chʼol 17
Na’eelelik laj Alma ut lix tenamit
Eb’ laj Nefita ke’xuwak ut ke’alinak sa’ li tenamit re te’xkol rib’. Laj Alma kixye reheb’ naq te’xjultika li Dios ut a’an tixkoleb’. Eb’ laj Nefita ke’ok chi tijok.
Li Qaawa’ kixq’unob’resi xch’ooleb’ laj Lamanita, ut maak’a’ ke’xb’aanu reheb’ laj Nefita. Eb’ laj Lamanita ke’sach xb’e naq yookeb’ chixsik’b’aleb’ lix tenamit li rey aj Limhi.
Eb’ laj Lamanita ke’xyeechi’i re laj Alma naq ink’a’ te’xch’i’ch’i’i lix tenamit wi te’xk’ut chiruheb’ chan ru te’sutq’iiq sa’ lix ch’och’. Laj Alma kixk’ut chiruheb’ li b’e.
A’b’an eb’ laj Lamanita ink’a’ ke’xb’aanu li ke’xyeechi’i chaq. Ke’xxaqab’eb’ b’an laj k’aak’alenel chixsutam li ch’och’, ut laj Alma ut lix tenamit ink’a’ chik wankeb’ chi ach’ab’anb’il.
Li rey aj Lamanita kixxaqab’ laj Amulon choq’ taqlanel sa’ xb’een lix tenamit laj Alma. Laj Amulon junxil a’an jun aj Nefita ut maa’us aj tij re li rey aj Noe.
Laj Amulon kixk’eheb’ chi k’anjelak jwal kaw lix tenamit laj Alma. Ke’tijok re xpatz’b’al xtenq’ankil, a’b’an laj Amulon kixye naq taakamsiiq li ani taatawe’q chi tijok. Eb’ li tenamit toj yookeb’ chi tijok sa’ xch’ool.
Li Dios kirab’iheb’ lix tij ut kixk’eheb’ xmetz’ew re naq lix k’anjel ke’seeb’ob’resiik. Saheb’ sa’ xch’ool ut aj kuyuneleb’.
Li Dios sa kiril naq li tenamit tiikeb’ chi paab’ank. A’an kixye re laj Alma naq tixtenq’aheb’ chi eelelik chiruheb’ laj Lamanita.
Chiru li q’ojyin li tenamit ke’xch’utub’ lix tzakemq ut lix ketomq. Sa’ li eq’la jun chik, li Dios kixwartesiheb’ laj Lamanita naq laj Alma ut lix tenamit ke’el chaq sa’ li tenamit.
Chirix naq ke’b’eek chiru kab’laju kutan, ke’wulak Tzarahemla b’ar wi’ li rey aj Mosiah ut eb’ lix tenamit ke’xk’uleb’.