Chʼol 21
Eb’ laj Amlicita
Laj Amlici a’an jun winq q’axal seeb’ xna’leb’ ut aj maak, li kiraj wank jo’ xreyeb’ laj Nefita. Wan naab’aleb’ aj taaqenel re.
Eb’ laj Nefita li tiikeb’ xch’ool ink’a’ ke’raj naq laj Amlici taawanq choq’ xreyeb’. Ke’xnaw naq a’an kiraj xsachb’al lix Iglees li Dios.
Eb’ laj Nefita ke’xch’utub’ rib’ sa’ jar paay chi ch’uut re xk’oxlankil ma taawanq choq’ lix reyeb’ laj Amlici. Lix k’ihaleb’ li tenamit ink’a’ ke’xk’ulub’a laj Amlici, jo’kan naq ink’a’ ki’ok choq’ rey.
Laj Amlici ut li ke’taaqenk re ke’josq’o’. Ke’xjach rib rik’ineb’ laj Nefita, ke’xk’ojob’ laj Amlici choq’ rey sa’ xb’eeneb’, ut aj Amlicita ke’xk’ab’a’i rib’. Laj Amlici kixk’e xtaqlankileb’ naq te’xpleetiheb’ laj Nefita.
Eb’ laj Nefita li tiikeb’ xch’ool ke’xkawresi rib’ rik’in tzimaj, yok’leb’ ch’iich’, ut xkomon chik li k’anjeleb’aal re pleet, re te’xkol rib’.
Eb’ laj Amlicita ke’chal chi pleetik, ut eb’ laj Nefita, li b’eresinb’ileb’ xb’aan laj Alma ut kawresinb’ileb’ xb’aan li Qaawa’, ke’xkamsi naab’al reheb’. Eb’ li rela’ laj Amlicita ke’eelelik.
Laj Alma kixtaqlaheb’ aj muqmuukil k’ehol eetal re te’xk’aak’aleheb’ laj Amlicita. Eb’ laj muqmuukil k’ehol eetal ke’rileb’ chixch’utub’ankil rib’ rik’in jun nimla teep aj pleet reheb’ laj Lamanita ut chi chalk sa’ xb’eeneb’ laj Nefita li nach’ wankeb’ rik’in Tzarahemla.
Eb’ laj Nefita ke’tijok, ut li Dios kixtenq’aheb’ wi’chik. Ke’xkamsi naab’aleb’ aj pleet reheb’ laj Lamanita ut aj Amlicita.
Laj Alma ut laj Amlici ke’xpleeti rib’ chirib’ileb’ rib’ rik’in li yok’leb’ ch’iich’. Laj Alma kitijok re naq taakole’q lix yu’am, ut li Dios kixk’e’ xmetz’ew re xkamsinkil laj Amlici.
Eb’ laj Nefita ke’ralinasiheb’ laj Lamanita ut laj Amlicita toj sa’ li yamyookil ch’och’. Ke’kam naab’al xb’aan xtoch’olaleb’ ut ke’k’uxe’ xb’aaneb’ li xul.
Jo’ chanru ki’ux rik’ineb’ laj Lamanita, eb’ laj Amlicita ke’xb’on rib’ chi kaq, ut chi jo’kan kitz’aqlok ru jun profeetil aatin. Eb’ laj Amlicita ke’xjach rib rik’ineb’ li osob’tesink re li evangelio.