Chʼol 12
Li rey aj Benjamin
Li rey aj Benjamin a’an jun rey aj Nefita tiik xch’ool. Rik’in lix tenq’ junjunq chik li winq tiikeb’ xch’ool, kixk’ojob’ li tuqtuukilal sa’ li ch’och’.
Li rey aj Benjamin kitix ut kiraj raatinankileb’ lix tenamit. Kiraj xyeeb’al reheb’ naq li ralal, laj Mosiah, a’anaq chik li rey.
Ke’k’ulun li tenamit chiru chixjunil li ch’och’ ut ke’xch’utub’ rib’ nach’ rik’in li santil ochoch. Ke’xyiib’ lix muheb’aal t’ikr rik’in li rokeb’aal sa’ xjayal li santil ochoch.
Li rey aj Benjamin ki’aatinak sa’ xb’een chaq jun li najt xteramil kab’l re naq te’ruuq laj Nefita chirab’inkil.
Kixye reheb’ lix tenamit naq kixyal chaq xq’e chi naab’al re k’anjelak chiruheb’. Kixye naq nokok’anjelak chiru li Dios naq nokok’anjelak chiru qas qiitz’in.
Li rey aj Benjamin kixye reheb’ naq te’xpaab’ lix taqlahom li Dios. Li aniheb’ te’xpaab’ chi tiik lix taqlahom li Dios sahaqeb’ xch’ool ut sa’ junaq kutan te’wanq rik’in li Dios.
Li rey aj Benjamin kixye naq li Jesukristo sa’ junpaat taayo’laaq sa’ li ruchich’och’. Li xMaria taak’ab’a’iiq lix na’.
Li Jesus tixb’aanuheb’ li sachb’a-ch’oolej. Tixk’irtesiheb’ li yaj ut tixwaklesiheb’ li kamenaq. Tixk’e chi ilok li mutz’ ut tixk’e chi ab’ink li tz’ap xik.
Li Jesus tixk’ul rahilal ut taakamq choq’ re lix maakeb’ chixjunileb’. Eb’ li te’xjal xk’a’uxl ut te’xpaab’ li Jesus taakuye’q lix maakeb’.
Li rey aj Benjamin kixye reheb’ laj Nefita naq eb’ li maa’us aj winq te’xraple li Jesus. Toja’ naq te’xk’e chiru krus.
Chirix xnumik oxib’ kutan, li Jesus taawakliiq sa’ xyanqeb’ li kamenaq.
Chirix naq li rey aj Benjamin ki’aatinak, eb’ laj Nefita ke’t’ane’ chi ch’och’. Ke’raho’ xch’ool xb’aan lix maakeb’ ut ke’raj xjalb’al xk’a’uxl.
Eb’ li tenamit ke’xpaab’ li Jesukristo ut ke’tijok re naq taakuye’q lix maakeb’.
Ke’nujob’resiik xch’ooleb’ rik’in li Santil Musiq’ej. Ke’xnaw naq li Dios kixkuyeb’ xmaak ut naq raarookeb’ xb’aan. Ke’reek’a tuqtuukilal ut sahil ch’oolejil.
Li rey aj Benjamin kixye reheb’ lix tenamit naq te’xpaab’ li Dios. A’an kiraj naq te’xnaw naq li Dios kixyo’ob’tesi chixjunil li k’a’aq re ru ut naq wan xna’leb’ ut nim xwankilal.
Li rey aj Benjamin kixye reheb’ lix tenamit naq te’xtuulanob’resi rib’ ut naq te’tijoq rajlal kutan. A’an kiraj naq eb’ lix tenamit junelik te’xk’oxla li Dios ut tiikaqeb’ chi paab’ank.
A’an kixye reheb’ li na’b’ej yuwa’b’ej naq me’xk’anab’eb’ lix kok’al chixpleetinkil rib’ ut chixwech’b’al rib’ chirib’ileb’ rib’.
A’an kixye reheb’ naq te’xtzoleb’ lix kok’al re te’ab’inq ut te’xra rib’chirib’ileb’ rib’ ut te’k’anjelaq li jun chiru li jun chik.
A’an kixtijeb’ li tenamit naq te’ril rib’ rik’in li k’a’ru neke’xk’oxla, neke’xye, ut neke’xb’aanu. Te’wanq raj sa’ tiikilal ut te’xpaab’ raj lix taqlahom li Dios toj sa’ roso’jik lix yu’ameb’.
Li rey aj Benjamin kixpatz’ reheb’ ma neke’xpaab’ li aatin li kixye chaq reheb’. Chixjunileb’ ke’xye naq neke’xpaab’. Li Santil Musiq’ej kixjaleb’ chaq xch’ool, ut ink’a chik ke’raj maakob’k.
Chixjunileb’ a’an ke’ok sa’ jun li sumwank, malaj ke’xyeechi’i, naq te’ab’inq chiruheb’ lix taqlahom li Dios. Li rey aj Benjamin kisaho’ xch’ool.
Li rey aj Benjamin kixk’e re li ralal, aj Mosiah, lix k’ulub’ chi wank choq’ li ak’ rey. Kikam li rey aj Benjamin oxib’ chihab’ chik chirix a’an.
Laj Mosiah kiwan jo’ jun rey tiik xch’ool. Kik’anjelak chi kaw ut kixtenq’a lix tenamit, jo’ chanru kixb’aanu chaq lix yuwa’.