Chʼol 49
Laj Mormon ut eb’ lix k’utum
Naab’al chihab’ chirix lix k’ulunik li Jesukristo sa’ xyanqeb’ laj Nefita, jun ch’ina raqal re li tenamit ke’xkanab’ li Iglees ut laj Lamanita ke’xk’ab’a’i rib’.
Chirix xnumik li kutan, ka’ch’in chik ma chixjunileb’ ke’ok choq’ aj maak, eb’ laj Nefita jo’ ajwi’ eb’ laj Lamanita.
Jun winq tiik xch’ool, laj Ammaron xk’ab’a’, ke’wan li loq’laj tz’iib’anb’il esil rik’in. Li Santil Musiq’ej kixye re naq tixmuqeb’ re naq chi jo’kan te’wanq chi kolko.
Laj Ammaron kixye re laj Mormon, jun saaj al lajeeb’ chihab’ xyu’am, b’ar wankeb’ chi muqmu li tz’iib’anb’il esil. Laj Ammaron kixnaw naq naru tixkanab’ sa’ ruq’ aj Mormon.
Naq wan tana’ kaahib’ xka’k’aal chihab’ xyu’am, laj Mormon tixxokeb’ lix perel ch’iich’ laj Nefi ut taatz’iib’aq chiruheb’ chirix lix tenamit.
Naq junlaju chihab’ xyu’am laj Mormon, kitikla jun pleet sa’ xyanqeb’ laj Nefita ut laj Lamanita. Eb’ laj Nefita ke’xq’axeb’ ru laj Lamanita, ut kiwan li tuqtuukilal wi’chik.
A’b’an eb’ laj Nefita ke’numta xmaa’usilaleb’, jo’kan naq li Qaawa’ kirisiheb’ li oxib’ chi tzolom, ut kiraqe’ li k’anjel re sachb’a-ch’oolej ut re k’irtesink. Li Santil Musiq’ej ink’a’ chik kixb’eresiheb’ li tenamit.
Naq o’laju chihab’ xyu’am laj Mormon, ki’ula’aniik xb’aan li Jesukristo. Laj Mormon kixk’ul chik xna’leb’ chirix li Kolonel ut lix chaab’ilal.
Laj Mormon kiraj jultikank aatin chiru li tenamit, a’b’an li Jesus kixye re naq ink’a’, xb’aan naq ke’numta xmaa’usilaleb’ li tenamit. Po’resinb’il xch’ooleb’ rik’in li Dios.
Ka’ch’in chik chirix a’an kitikla jun chik li pleet. Laj Mormon nim xteram ut kaw xmetz’ew, ut eb’ laj Nefita ke’xxaqab’ re tixjolomi lix teepeb’ aj pleet.
Eb’ laj Nefita ke’xpleetiheb’ laj Lamanita chiru k’iila chihab’. Laj Mormon kixyal xq’e chixwaklesinkileb’ xch’ool lix tenamit re naq te’pleetiq re xkolb’al li rochocheb’ ut lix junkab’aleb’.
A’b’anan, eb’ laj Nefita ke’numta sa’ li maak, jo’kan naq li Qaawa’ ink’a’ kixtenq’aheb’.
Laj Mormon kixye reheb’ laj Nefita naq te’kole’q xyu’am wi te’xjal xk’a’uxl ut te’kub’eeq xha’. A’b’an li tenamit ink’a’ ke’raj xb’aanunkil.
Ke’xnima rib’ rik’in xmetz’eweb’, ut ke’ok chixyeeb’al naq te’xkamsi chixjunileb’ laj Lamanita. Xb’aan xmaa’usilaleb’ laj Nefita, laj Mormon kixye naq ink’a’ chik taawanq choq’ aj taqlanel reheb’.
Eb’ laj Lamanita ke’ok chixq’axb’aleb’ ru laj Nefita sa’ li junjunq chi pleet. Laj Mormon kixk’e xch’ool naq tixjolomiheb’ wi’chik li teep aj pleet reheb’ laj Nefita.
A’an kixnaw naq eb’ laj Nefita aj maakeb’, ut ink’a’ te’ruuq chi numtaak sa’ li pleet. Ink’a’ ke’xjal xk’a’uxl chi moko ke’tijok re xpatz’b’al xtenq’ankileb’.
Laj Mormon kirisi chixjunileb’ li tz’iib’anb’il esil sa’ li tzuul b’ar wi’ laj Ammaron kixmuqeb’ chaq, ut kitz’iib’ak choq’ reheb’ li aniheb’ sa’ junaq kutan te’ril li tz’iib’anb’il esil a’an.
A’an kiraj naq chixjunileb’, jo’eb’ ajwi’ laj Judio, te’xnaw chirix li Jesukristo, te’xjal xk’a’uxl ut te’kub’eeq xha’, ut te’xyu’ami li evangelio ut te’osob’tesiiq.
Li Musiq’ej kixye re laj Mormon naq tixk’eheb’ li kok’ perel ch’iich’ re laj Nefi, li wan wi’ li profeetil aatin chirix lix k’ulunik li Kristo, rik’ineb’ li perel ch’iich’ re laj Mormon.
Laj Mormon kixk’ameb’ xb’e laj Nefita toj sa’ li ch’och’ Kumorah, b’ar wi’ ke’xkawresi rib’ re te’pleetiiq wi’chik rik’ineb’ laj Lamanita.
Laj Mormon ki’ok chi tixk. A’an kixnaw naq a’inaq roso’jikil li pleet. A’an ink’a’ kiraj naq eb’ laj Lamanita te’xtaw li loq’laj tz’iib’anb’il esil ut te’xsach.
Jo’kan naq kixk’e lix perel ch’iich’ laj Mormon re laj Moroni li ralal, ut kixmuq li jun ch’ol chik chi perel ch’iich’ sa’ li tzuul Kumorah.
Eb’ laj Lamanita ke’xpleetiheb’ ut ke’xkamsiheb’ chixjunileb’ laj Nefita, ka’ajwi’ kaahib’ xka’k’aal ke’kana. Laj Mormon kit’ane’ chi toch’enaq.
Kiraho’ xch’ool laj Mormon xb’aan xk’ihaleb’ laj Nefita li ke’kamsiik, a’b’an kixnaw naq ke’kam xb’aan naq ke’xtz’eqtaana li Jesus.
Laj Mormon ak kixyal xq’e chixk’utb’al li yaal chiruheb’ laj Nefita. A’an kixye reheb’ naq k’a’jo’ x’aajelil ru naq te’wanq xpaab’aal chirix li Jesukristo.
A’an kixyal xq’e chixk’utb’al chiruheb’ naq te’wanq xyo’onihom xb’aan lix tojb’al rix li maak xb’aan li Jesukristo, ut naq taawanq li tz’aqal rahok rik’ineb’, a’an li saq ruhil rahok narahok wi’ li Kristo.
Ut laj Mormon kixtz’iib’aheb’ li hu kixtaqla chaq rik’in laj Moroni, li ralal, li kixk’ut ajwi’ chaq li evangelio chiruheb’ laj Nefita.
Laj Mormon kitz’iib’ak chirix lix xuwajel maa’usilaleb’ laj Nefita. A’an kixye re laj Moroni naq tiikaq chixpaab’ankil li Jesukristo.
Eb’ laj Lamanita ke’xkamsi laj Mormon ut chixjunileb’ laj Nefita, ka’ajwi’ kikana chi yo’yo laj Moroni, li kixchoy xtz’iib’ankileb’ li tz’iib’anb’il esil.