Chʼol 46
Li Jesukristo naxtzoleb’ laj Nefita ut natijok rik’ineb’
Chi wulajaq, laj Nefi ut lix komoneb’ li tzolom ke’xtzoleb’ li wankeb’ chi ch’utch’u. Toja’ naq eb’ li tzolom ke’tijok re naq te’xk’ul li Santil Musiq’ej.
Laj Nefi ki’ok sa’ li ha’ ut kikub’e xha’. Chirix a’an, kixkub’siheb’ xha’ xkomoneb’ chik li tzolom.
Chirix naq ke’kub’e xha’, eb’ li tzolom ke’xk’ul li Santil Musiq’ej. Chanchan naq ke’sute’ rix xb’aan xam, ut eb’ li anjel ke’kub’e chaq sa’ choxa ut ke’k’anjelak chiruheb’.
Naq toj wankeb’ li anjel rik’ineb’ li tzolom, li Kolonel kichal ut kixaqli sa’ xyanqeb’.
Li Kristo kixtaqlaheb’ laj Nefita chi wiq’laak chi ch’och’. A’an kixye reheb’ lix tzolom naq te’tijoq.
Naq toj yookeb’ chi tijok, li Jesus kinajto’ ka’ch’in rik’in li tenamit, kiwiq’la, ut kitijok chiru lix Choxahil Yuwa’.
Li Jesus kixb’antioxi re lix Choxahil Yuwa’ naq kixk’e li Santil Musiq’ej reheb’ lix tzolom. Chirix a’an kixpatz’ naq li Santil Musiq’ej taak’ehe’q ajwi’ re yalaq ani taapaab’anq re li raatineb’ li tzolom.
Li Jesus kirosob’tesiheb’ lix tzolom naq yookeb’ chi tijok. Kirileb’ chi sa xse’, ut ke’wan xsaqalil ru jo’ chanru li rilob’aal ut li raq’ a’an.
Li Jesus kitijok wi’chik choq’ reheb’ lix tzolom. Kisaho’ xch’ool rik’in xnimaleb’ xpaab’aal.
Li Kristo kixye reheb’ li tenamit naq te’xkanab’ tijok, a’b’an naq ink’a’ te’xkanab’ tijok sa’ xch’ooleb’. Toja’ naq kixk’e reheb’ li loq’laj wa’ak.
Maa’ani kixk’am chaq li kaxlan wa chi moko li viin, a’b’an li Kolonel kixk’e reheb’ rik’in sachb’a-ch’oolej.
Li Jesukristo kixye reheb’ laj Nefita naq lix evangelio taak’ame’q chaq wi’chik sa’ li ruchich’och’ sa’ roso’jikeb’ li kutan.
A’an kixye reheb’ naq te’xtzoleb’ li loq’laj hu, ut kixye re laj Nefi naq taatz’iib’aq sa’ li hu chirix naq kitz’aqob’resiman ru li rela’ lix profeetil aatin laj Samuel li Lamanita.
Chirix a’an, li Jesus kixtzol li tenamit rik’ineb’ li loq’laj hu. A’an kixye reheb’ naq te’xk’ut chirib’ileb’ rib’ li k’a’aq re ru kixk’ut a’an chiruheb’.
Li Jesus kisutq’i sa’ choxa ut eb’ lix tzolom ke’xtzoleb’ li tenamit. Eb’ li ke’paab’an ke’kub’e xha’ ut ke’xk’ul li Santil Musiq’ej.
Eb’ laj Nefita ke’ok chixpaab’ankil chixjunileb’ li taqlahom.